Eclesiastés 8

1Yachayyuq kaymi kushikuypaq. Yachayyuq runam imaypis kushishqa kaykan.

2Dios Yayapa puntanchö prometinqaykinölla rey nishunqaykita imaypis cäsuy. 3Reypa contran ama shäriytsu ni mana alli runakuna rurayanqanta ama ruraytsu. Reymi tsaynö kaqkunata mana llakipaypa castiganqa.

4Tsaynöllam rey ninqanta pïmaypis cumplinan. Paytaqa imata ruraptinpis manam ni pipis amatsayta puëdintsu. 5Rey ninqanta cäsukuq runaqa manam castigashqatsu kanqa. Yachayyuq karmi rey mandakunqanta imanö cumplinanpaqpis yarpachakun. 6Cumplinanpaq aja kaptinpis yarpachakur y pacienciakurmi cumplinqa. 7Peru manam musyankitsu ni pipis willashunkitsu waraykuna ima päsananpaq kanqanta.

8Manam ni pipis wañuypita qeshpintsu ni imay junaq wañunanpaq kanqanta akrayta puëdintsu. Wañuypita defendikunaykipaq manam ni ima armapis kantsu. Mana alli kanqaykipis manam wañuypita salvashunkitsu.

9Kay patsachö imanir llapan päsanqankunata tantiyanäpaq yarpachakur y runakuna runa majinta imanir sufritsiyanqanta yarpachakurmi tsaykunata tantiyashkä.

Alli runa y mana alli runa imanö kayanqan

10Tsaynöllam rikashkä wakin runakuna sagrädu templuman aywarpis mana allikunata rurayanqanta. Wañuskiptinmi llutan rurayanqantapis qonqaskir aläbar pampayan. Tsaymi llakikuypaq.

11Mana alli ruraq runata jutsanpita sas mana castigayaptinmi wakin kaqpis llutanta rurayänanpaq yarpäyanqa.

12Mana alli ruraq runakuna pachak (100) kuti jutsata rurayaptinpis y atska wata kawayaptinpis noqam musyä Dios Yayapita mantsakuqkuna allipaq cäsukuyanqanta. 13Mana alli runaqa Dios Yayapita mana mantsakur manam allitsu kawanqa ni atska watatsu kawanqa. Tsaypa rantinmi tsay runa llantu päsaqnölla ushakanqa.

14Rikashkämi alli runakuna jutsa ruraqkunanö alläpa ñakaqta. Tsaynöllam rikashkä mana alli runakuna allita ruraqkunanö alli kawaqta.#Sal. 73; Jer. 12.1-4; Hab. 1.2-4. Tsaymi llakikuypaq. 15Tsaykunapaq llakikunqantsikpa rantin kushishqa kawakushun. Kay patsachö ñakarpis mikushun, upyashun y kushishqa kawakushun.

16Kay patsachö imanir llapan päsanqankunata musyayta munarmi shumaq yarpachakushkä. Tsaymi rikashkä puñuytapis mana tariypa runakuna aruyanqanta.

17Tsaynöllam tantiyashkä Dios Yaya kay patsachö llapan ruranqanta ni pipis mana tantiyanqanta. Imanöpa yarpachakurpis manam tantiyashuntsu. Yachayyuq runa <<noqam tantiyä>> nirpis manam rasunpaqa tantiyantsu.

Currently Selected:

Eclesiastés 8: qxn

Highlight

Copy

Compare