Eclesiastés 7

Alli kawanapaq yätsinqankuna

1Alli runa kanqantsikta pïmaypis parlanqanmi chaniyuq perfümipitapis mas alli.#Prov. 22.1.

Wañunqantsik junaqmi yurinqantsik junaqpitapis mas alli.

2Ushakaqlla kaykarqa kawanqantsikyaq wañukuqlla kanqantsikta yarpäshun.

Fiestaman aywanqantsikpa rantinmi mas alli aya täpapukuq aywanqantsik.

3Asikunqantsikpa rantinmi mas alli waqanqantsik.

Llakikurqa qaqllantsik jukläyaptinpis shonquntsikchö alli kawanapaq yarpachakuntsik.

4Yachayyuq runaqa wañuqlla kanqantam tantiyan.

Peru mana yachayyuq runam sïqa ni imatapis mana yarpachakuypa fiestan fiestan purikun.

5Mana yachayyuq runa aläbamanqantsikpita mas allim kanman yachayyuq runa consejamanqantsik.

6Mana yachayyuq runaqa shiraka rupar pashtaqnömi llutalla imapitapis asikun.

Tsaynö kanqanmi manakaqllapaq.

7Yachayyuq kanqantsikta yarparpis runa majintsikta sufritsirqa mana yachayyuqmi kaykantsik.

Pipis qarayta chaskipäkurmi mana alli rurayman churakan.

8Ima aruytapis kushishqa qallaykurmi ushaskirqa masraq kushikuntsik.

Imallapitapis sas piñanqaykipa rantinmi mas alli pacienciakunqayki.

9Imapitapis sas ama piñakunkitsu.#Stg. 1.19.

Mana yachayyuq runakunallam tsaynö piñanakuyan.

10Ama ninkitsu: <<¿Imanirraq unayqa imapis mas alli karqan?>>

Tsaynö nirmi mana yachayyuq runanö parlaykanki.

11Kay patsachöqa yachayyuq kanqayki allim.

Peru yachayyuq kanqaykiwan rïcu kanqaykim sïqa mas alli kaykan.

12Yachayyuq kay y rïcu kaypis imayka peligrupitam tsapäshunki.

Tsaymi yachayyuq runaqa rïcu runapitapis mas alli kawayta tarin.

13Dios Yaya wiksütsinqantaqa manam ni pipis derechayta puëdintsu.#7.13 Wiksütsinqan ninanqa desgraciakunata Dios Yaya mandamunqan ninanmi. Manam pipis derechayta puëdintsu ninanqa manam pipis tsay desgraciapita qeshpiyta puëdintsu ninanmi.

Tsaymi Dios Yaya permïtinqanta shumaq tantiyanki.

14Tranquïlu kawanapaq permïtishqa kaykaptinqa kushishqa kawakunki.

Ñakaychö kanapaq permïtishqa kaykaptinqa tantiyanki kushikuypis llakikuypis Dios Yayapita kanqanta.

Peru waray warantin imanö kanaykipaq kanqantapis manam musyankitsu.

15Kay vïdachömi rikashkä alli runa kaykarpis manaraq höranchö wañuqta.

Tsaynöllam rikashkä mana alli runa kaykarpis atska wata kawaqta.

16Ama jutsannaq tukunkitsu ni yachayyuq tukunkitsu.

Tsaynö karqa kikillaykim mana alliman chanki.

17Tsaynölla jutsata rurankitsu ni upa kankitsu.

Tsaynö karqa kikillaykim wañuyta ashinki.

18Tsay ninqäkunata cäsukuy.

Tsaynöpam jutsannaq tukunkitsu ni jutsata rurankitsu.

Dios Yayapita mantsakur tsaynö kawaptikiqa llapan ruranqaykipis allim kanqa.

19Yachayyuq karmi imayka peligrupita qeshpintsik.

Tsaymi markata mandaq chunka runakunapitapis yachayyuq runa mas alli kaykan.

20Kay patsachöqa manam ni pipis kantsu allillata ruraq y jutsata imaypis mana ruraqqa.#1Juan 1.8, 10.

21Runakuna llapan niyanqanta ama cäsunkitsu.

Tsaynö mana cäsurmi serviqniki washayki rimanqantapis musyankitsu.

22Qampis atska kutim jukpaq rimashkanki.

Tsayta manam nëgankimantsu.

Yachayyuq kananpaq yarpachakunqan

23Kay patsachö imanir llapan päsanqankunata tantiyanäpaqmi yarpachakushkä. Peru mayjina yarpachakurpis manam tantiyayta puëdishkätsu. 24Tantiyanapaqmi alläpa aja. Tsaytam pipis tantiyayta puëdintsu.

25Tsaynö kaptinpis yachayyuq kanäpaq y llapan päsanqankunata tantiyanäpaqmi masraq yarpachakurqä. Tsaynöpam tantiyarqä mana alli kay y mana yachayyuq kay mana alli kanqanta.

26Tsaynöllam tantiyarqä mañösa warmi wañuypitapis mas mantsaypaq kanqanta. Tsay warmipa shonqunmi trampanö y rikrankunapis waskawan watashqanö. Dios Yaya munanqannö kawaq runam tsaynö warmipita witikun. Peru jutsa ruraq runam sïqa tsay warmiwan kakun.#Prov. 5; 7.

27Yachatsikuq kar alli yarpachakunqätam kanan nishayki: 28Kay patsachö imanir llapan päsanqankunata tantiyanäpaq mayjina yarpachakurpis manam shumaq tantiyayta puëdïtsu. Peru imanö kaptinpis tantiyashkä Dios Yaya munanqannö kawaq runakuna wallkalla kayanqantam. Waranqa (1,000) ollqukunapita jukllayllatam tarishkä Dios Yaya munanqannö kawaqta. Peru waranqa warmikunapitaqa manam ni jukllayllatapis tarishkätsu Dios Yaya munanqannö kawaqta.

29Tsaynöllam tantiyashkä jutsannaq kawanapaq Dios Yaya kamamanqantsikta. Tsaynö kawanapaq kamashqa kaykarmi llutan rurayman churakashkantsik.

Currently Selected:

Eclesiastés 7: qxn

Highlight

Copy

Compare