2 Timoteo 1
1
Apóstol Pablo saludakunqan
1Noqa Pablutam Jesucristupa apostolnin kanäpaq Dios Yaya churamashqa. Jesucristuman confiakurmi Dios Yaya prometinqannö mana ushakaq kawayta tarishkä. 2Timoteo,#Hech. 16.1-3. kuyay tsurïnö kaptikim kay cartata cartakamü. Taytantsik Dios Yaya y Señornintsik Jesucristo llakipäshurniki alli päsakuychö kawakunaykipaq yanapaykulläshuy.
Mana mantsakuypa willakunanpaq ninqan
3Unay castäkuna serviyanqan y noqapis servinqä Dios Yayata mañakurmi paqasta junaqtapis qampaq agradëcikü. 4Waqar quëdamunqaykita yarparmi kushikunapaq kutimuyta munä.
5Musyämi Dios Yayaman confiakur pay munanqannö kawakunqaykita. Awilayki Loida y mamayki Eunicipis Dios Yayaman confiakur kawakuyanqannömi qampis kawaykanki. 6Tsaynö kawakurqa mana mantsakur imaypis Dios Yayata serviy. Payta servinaykipaqmi Dios Yaya churashushkanki makïta umaykiman churar qampaq mañakunqä höra. 7Manam mantsakunapaqtsu Dios Yaya churamashkantsik, sinöqa mana mantsapäkur willakunapaq, pïmaytapis kuyanapaq y shumaq tantiyakur imatapis ruranapaqmi.
8Tsaynö kaykaptinqa mana penqakur Jesucristupa willakuyninta willakuy. Alli willakuyninta willakunqäpita prësu qaykurätsiyämaptinpis ama penqakuytsu. Imaykata sufrirpis alli willakuyninta willakuy. Tsaynö willakunaykipaqmi Dios Yaya yanapaykäshunki.
Dios Yaya salvamanqantsikta Pablo willakunqan
9Dios Yayam salvamarnintsik qayamashkantsik pay munanqannö santu kanapaq. Manam imatapis allita ruranqantsikpitatsu salvamashkantsik, sinöqa jutsasapa kaykashqa llakipämarnintsikmi salvamashkantsik. Kay patsata manaraq kamarmi Jesucristuman churamarnintsik tsaynö llakipämashkantsik. 10Llakipämanqantsiktam musyatsimashkantsik salvamaqnintsik Jesucristuta kay patsaman kachamur. Paymi willakuyninchö ninqannö wañuyta venciskir mana ushakaq kawaytana qaramashkantsik.
11Alli willakuyninta [mana Israel runakunata] willakunäpaq Dios Yaya churamashqa kaptinmi apostolnin kar yachatsikuykä. 12Willakunqäpita carcelchö sufrirpis Jesucristumanmi confiakü. Paymi qorikamänan junaqyaq poderösu kayninwan yanapamanqa. Tsaymi carcelchö qaykurarpis penqakütsu.
13Timoteo, Jesucristupa willakuyninta yachatsinqänölla qampis yachatsikuy. Jesucristo kuyashunqaykinölla payman creyikur pïmaywanpis kuyanakur kawakuy. 14Jesucristupa willakuyninpaq pipis llutankunata yachatsikuptinqa wawqikunata y panikunata mana chaskiyänanpaq tantiyatsiy. Paykunata tantiyatsinaykipaqmi Espíritu Santu yanapashunki. Paymi yanapamänapaq imaypis noqantsikwan kaykan.
Pabluta Onesíforo yanapanqan
15Musyanqaykinömi Asia provinciachö täkuq wawqikuna y panikuna llapan dëjayämashqa. Tsaynöllam Figeluwan Hermógenespis aywakuyashqa.
16Onesíforutawan ayllunkunata Señor Jesucristo yanapaykullätsun. Carcelchö qaykuraptïmi mana penqakuypa imaypis yanapamashqa. 17Tsaynöllam Romaman chaykamurpis tarimanqanyaq ashimarqan. 18Musyanqaykinömi Éfeso markachöpis alli yanapamashkantsik. Runakunata juzganan junaq Señor Jesucristo payta llakipaykullätsun.
Currently Selected:
2 Timoteo 1: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.