Yuörö 19

Ŋutu ti Yisaraele i mere Sinai

1A nagon Ŋutu ti Yisaraele aje kö ’yu jur lo Ejipeto i mukök na yapa tomusala lonyit nu, a se ’dure i yöbu na Sinai i ŋilu lor. 2A nagon se aje ŋiörö kaŋo Repidim yu nu, a ’dure i yöbu na Sinai, a ’beggi kemialan i yöbu, a Ŋutu ti Yisaraele ’bikikiŋdye mera nyu i komor na lu mere. 3A Mose kije ki ko ŋun yu, a MATAT luŋgi lepeŋ i mere adi, Do de kulya sona ko kötumit na Yakobo, kweja adi do de takiŋdya Ŋutu ti Yisaraele adi, 4Ta aje met ŋo na konakin nan Ŋutu ti Ejipeto kunu, Köti gwoso nagon nan a ’dukuŋdyö ta ko köpukön ti yuku na a joŋdi ta köyö ni. 5#1 Pet 2.9#Nyö 4.20; 7.6; 14.2; 26.18; Tit 2.14 Ama soŋinana ko ta ’diri a yiŋga gworo liŋ anyen ’debba tomoret nio, a ta mo gwe a tukwörien nio lomore i kiden na gweyajin liŋ ti Ŋutu; kogwon kak liŋ a nio, 6#Kwe 1.6; 5.10 a ta mo gwe köyö a koanejin ti mor, ko a jur lo gelwe a loke. Kilo a kulyaesi logon do ködyö jamakin Ŋutu ti Yisaraele.

7A Mose ko poŋdi a luŋgi temejik ti Ŋutu, a petakiŋdye kilo saresi liŋ kase i komor logon MATAT a sarakin lepeŋ kulo. 8A Ŋutu liŋ ruŋge ko gworo geleŋ adi, ŋo liŋ nagon MATAT a kulyari kine yi de kökon. A Mose nyököddi kulyaesi ti Ŋutu kulo ko MATAT yu. 9A MATAT kulyani ko Mose adi, Mete, nan lo popo konut ni i luru lo piddya, anyen kulo Ŋutu böŋö yiyiŋga na jambi nan ko do nu, Köti anyen se böŋö yuyuŋ do ŋupi.

A Mose nyönyökökiŋdye MATAT kulyaesi ti Ŋutu kulo. 10A MATAT kulyani ko Mose adi, Iti ko kulu Ŋutu yu, ko geluŋdye lepeŋat kaŋo i lo lor ko ko ’bure, ko ti se lalaji boŋgwat kase,

11ko ti se gwe ajo i lor tomusala lonyit; kogwon i lor tomusala MATAT mo po kak i mere Sinai a Ŋutu liŋ memeddya.

12 # Eb 12.18-20 A do ködyö tiŋdi lokökorit i lorga na mere kogwon kulya ti Ŋutu, a do saŋi lepeŋat adi, Kunyar ta ’börik, an ta ko kija ta i mere ki, kode ’bo ’yu lokökorit lonyit; ko ŋa lo ’bo ’yu mere lo a mo tatuani tatua; 13ti lele ŋuto gwe ti ’bo ’yu ŋilo ŋuto, ama ti nye gugubani ko ŋurupö, kode ŋuruki kak; kode nye a turu ’buti kode nye a ŋuto logon a ’bo ’yu ŋilo mere a nye mo tine kölöki jörun. Ko kili ’ba a kuta parik a ti se poŋdi i mere nyona. 14A Mose luluru kak i mere tojo ko kulo Ŋutu ni, a nye geluŋdye Ŋutu kulo, a se lalaji boŋgwat kase. 15A nye kulyani ko Ŋutu kulo adi, Gwe ta ajo na ’durökiŋdye lor tomusala lonyit nu; an ta ko mijun nyona ko Ŋutu wate kwöŋ.

16 # Kwe 4.5 # Nyö 4.11, 12 A ko gwe sona i lor tomusala lonyit, i ko ’bure nanyit, a kipya lo ki peji peja, a ki meme ’dekti meme ’dekta, a luru lo piddya gwe i mere, a tore kutani kuta parik, a Ŋutu liŋ lo gwon i mera kulo böböŋdi böböŋdu. 17A Mose joŋdi Ŋutu kaŋo i mera i torumbö ko Ŋun; a se gwo ’de i mukök na mere.

18A mere Sinai purine puri a köpuröt kogwon MATAT a po kak i loki nanyit ko kimaŋ; a köpuröt lonyit puriörö ki gwoso köpuröt lo pirit namet, a mere liŋ böböŋdi böböŋdu bia parik. 19A ko tore a kuta bia parik, a Mose jambi jambu, a Ŋun ruŋge nye i kipya lo ki lukata. 20A MATAT poŋdi kak i mere Sinai i kwe na mere; a MATAT luŋuddi Mose tojo i kwe na mere, a Mose kiyaddi ki. 21A MATAT kulyani ko Mose adi, Lulurara kak, ko sare sar Ŋutu kulo adi ti se ködyö gwe ti ri ’diu-ŋdya ’börik ko MATAT ni i diŋa na lepeŋ, an kulye kase jore twatwa.

22Köti ti koanejin logon po nyona ko MATAT ni kulo, ti se ködyö geluŋdye ’börik kaŋo a loke, an MATAT gwuuŋdyö kaŋo i tatuja na se. 23A Mose waddi MATAT adi, Ŋutu kulo ti bulö po nyona i mere Sinai; kogwon do lepeŋ aje saŋu yi adi, Tetenakiŋdye ta lokökori-tan lorga ŋilo mere, ko geluŋdye ta lepeŋ a loke lo rurwan. 24A MATAT kulyani ko lepeŋ adi, Iti, lulurara kak, a do kiyene ki Köti baruŋdya Arona, ama ko köluŋdyö koanejin se ko Ŋutu i ri ’diuŋdya na ’börik anyen kiyuŋdya köyö ko MATAT ni, an nan gwuuŋdyö kaŋo i tatuja na se. 25Nyena a Mose lulurara kak ko Ŋutu kulo yu, a jamakiŋdye se.

Currently Selected:

Yuörö 19: BBE

Highlight

Copy