EKSODOS 13

Kaba pynkyntang khuid ha U Blei ïa uba la kha nyngkong

1Te U Trai u la kren ha u Moses, u da ong: 2#Jkñ. 3:13; Luk. 2:23.“To pynkyntang ha nga ïa uba la kha nyngkong baroh, ïa kaei kaei baroh keiñ ïa kaba la kha nyngkong hapdeng ki khun Israel, na u briew bad na u mrad de: u long u jong nga.”

Ka Jingkhawai Niam U Kpu Bakhlem Thiat

3Te u Moses u la ong ha u paidbah, “To kynmaw phi ïa kane ka sngi, ha kaba phi la wan noh na ka ri Ijipt, na kata ka ïing ka jingpynlong mraw; naba da ka kti badonbor U Trai u la ïalam noh ïa phi nangta: wat bam ïa u kpu ba dei thiat. 4Ha kane ka sngi phi la wan noh ha u 'nai Abib. 5Te ynda U Trai u la ïalam ïa me sha ka ri ki Kanaan, bad ki Hit, bad ki Amor, bad ki Hib, bad ki Jebus de, ïa kaba u la smai ha ki kpa jong me ban ai ha me, ka ri kaba tuid da ka dud bad ka ngap, men leh ïa kane ka kam ha une u bnai. 6Hynñiew#13:6 Hynñiew: Ha ki edition bamynshuwa jong Ka Baibl la don da ka kyntien hynriew kaba ïapher na kaba don ha ka Hebrew Bible. sngi men bam ïa u kpu bakhlem thiat, te ha ka bahynñiew sngi kan long Ka Jingkhawai Niam ha U Trai. 7Phin bam ïa u kpu bakhlem thiat hynñiew sngi; bad wat ai ban ïohi bad me ïa u kpu ba dei thiat, bad wat da ai ban ïohi ïa u thiat, ha ki phang jong me baroh. 8Men pynpaw ruh ha u khun jong me ha kata ka sngi, da kaba ong, ‘Ïa kane nga leh, namar kata, ïa kaba U Trai u la leh ha nga, mynba nga la wan noh na ka ri Ijipt.’ 9Kane te kan sa long ka dak ïa me ha ka kti jong me, bad kum ka jingpynkynmaw hapdeng ki khmat jong me, khnang ba ka hukum U Trai kan da long ha ka shyntur jong me: namar da ka kti badonbor U Trai u la ïalam noh ïa me na ka ri Ijipt. 10Namar kata, men sumar ïa kane ka hukum ha la ka aïom man la ka snem.”

Kiba la kha nyngkong

11“Bad ynda U Trai te u la wallam ïa me sha ka ri ki Kanaan, kumba u la smai ha me bad ha ki kpa jong me bad un ai ruh ïa ka ha me, 12#Luk. 2:23.te me ruh men pynkyntang ha U Trai ïa uba la kha nyngkong baroh, bad ïa uba la kha nyngkong baroh na ki mrad ruh ba me don; ki shynrang keiñ kin long ki jong U Trai. 13Bad ïa uba la kha nyngkong na ka kadda baroh ruh men siewspah da u khun langbrot#13:13 u khun langbrot: Ha ki edition bamynshuwa jong Ka Baibl la don da ka kyntien u khun blang kaba ïapher na kaba don ha ka Hebrew Bible.; te lada men ym siewspah ïa u, to kdiah te ïa ka ryndang jong u: bad baroh ïa uba la kha nyngkong jong u briew hapdeng ki khun jong me men da siewspah ruh. 14Te haba u khun jong me un sa kylli ïa me lashai lashisngi, u da ong, ‘Kaei kane?’ men ong ha u te, ‘Da ka kti badonbor U Trai u la ïalam noh ïa ngi na ka ri Ijipt, na ka ïing ka jingpynlong mraw keiñ. 15#Luk. 2:23.Ka la jia te mynba u Pharaoh da kaba eh u da pyllait noh ïa ngi, ba U Trai u la pynïap ïa uba la kha nyngkong baroh ha ka ri Ijipt, ïa uba la kha nyngkong na u briew, bad ïa uba la kha nyngkong na u mrad ruh. Namar kata, nga kñia ainguh ha U Trai ïa uba la kha nyngkong baroh, uba long shynrang; hynrei, ïa uba la kha nyngkong na ki khun jong nga baroh nga siewspah keiñ.’ 16Kane te kan long ka dak ha ka kti jong me, bad ki jingteh hapdeng ki khmat jong me: namar da ka kti badonbor U Trai u la wallam ïa ngi na ka ri Ijipt.”

U rishot lyoh bad u rishot ding

17Te, mynba u Pharaoh u la pyllait noh ïa uta u paidbah, U Blei um shym la ïalam ïa ki na lynti ka ri ki Philistia, la kata ka la jan ruh; naba U Blei u la ong, “Ba ïoh uta u paidbah un kylla, haba ki ïohi ïa ka thma, bad un leit phai pat sha ka ri Ijipt.” 18Hynrei, U Blei u la ïalam ïa uta u paidbah sawdong, na ka lynti ka ri khlaw ka Duriaw Basaw: da kaba kieng atiar ruh ki khun Israel ki la ïaleit mih artet na ka ri Ijipt. 19#Jen. 50:25; Jos. 24:32.Bad u Moses u la shim lem bad u ïa ki shyieng jong u Joseph; naba u la pynsmai skhem ïa ki khun Israel, u da ong, “U Blei shisha un da wan-i ïa phi; phi ruh phin ïarah ïa ki shyieng jong nga artet lem bad phi.” 20Te ynda ki la ïamih noh na Sukkoth, ki la shong dara ha Etham, harud ka ri khlaw. 21Bad U Trai u la ïaid ha shuwa jong ki mynsngi ha u rishot lyoh, ban ïalam lynti ïa ki; bad mynmiet ruh ha u rishot ding, ban ai jingshai ïa ki; ba ki lah ban ïaid mynsngi bad mynmiet ruh: 22um shym la shim noh ïa uta u rishot lyoh mynsngi, lymne ïa uta u rishot ding mynmiet, na khmat uta u paidbah.

Currently Selected:

EKSODOS 13: KHB

Highlight

Copy

Compare