DEUTERONOMI 30

Ki jingisynei bakhraw ba la kular ïa kiba kylla-ka-bamut

1“Te kan jia, ynda kine kiei kiei baroh ki la wan ha me, kata ka jingkyrkhu bad kata ka jingtim, ïa kiba nga la buh ha khmat jong me, bad men kynmaw ïa ki hapdeng kita ki jaid bynriew baroh, sha kiba U Trai uba U Blei jong me u la beh ïa me, 2bad men wan phai pat ruh sha U Trai uba U Blei jong me, bad men kohnguh ruh ïa ka ktien jong u katba kum kita baroh ïa kiba nga hukum ïa me ha kane ka sngi, ma me bad ki khun jong me, da la ka dohnud baroh, bad da la ka mynsiem baroh; 3ba ynda kumta, U Trai uba U Blei jong me un pynphai ïa ka jinglongmraw jong me, bad un leh isynei ruh ïa me, bad un phai, bad un ïalum ruh ïa me napdeng kita ki jaid bynriew baroh, sha kiba U Trai uba U Blei jong me u la pynsakma ïa me. 4#Mat. 24:31; Mrk. 13:27.Lada la beh noh ïano ïano ruh na me haduh ka bakut ka bneng, nangta, U Trai uba U Blei jong me un ïalum ïa me, bad nangta ruh, un wallam ïa me: 5bad U Trai uba U Blei jong me un wallam keiñ ïa me sha kata ka ri kaba ki kpa jong me ki la ïoh, te me ruh men ïoh ïa ka; bad un leh bha ïa me, bad un pynroi ïa me nalor ki kpa jong me. 6Bad U Trai uba U Blei jong me un otsher ïa ka dohnud jong me, bad ïa ka dohnud u symbai jong me, ïa ka ban ieit ïa U Trai uba U Blei jong me da la ka dohnud baroh, bad da la ka mynsiem baroh, khnang ba men ïoh im. 7Bad U Trai uba U Blei jong me un buh ïa kine ki jingtim baroh halor ki nongshun jong me, bad halor kita kiba isih ïa me, kiba la pynshitombeiñ ïa me. 8Te men ïoh wan phai pat bad men kohnguh ruh ïa ka ktien jong U Trai, bad men leh ïa ki hukum jong u baroh, ïa kiba nga hukum ïa me ha kane ka sngi. 9Bad U Trai uba U Blei jong me un pynroi kyrhai ïa me ha ki kam ka kti jong me baroh, ha u soh ka met jong me, bad ha u soh ka jingri jong me, bad ha u soh ka ri jong me, ïa ka ban bha: naba U Trai un leh kmen pat halor jong me ïa ka ban bha, kumba u la leh kmen halor ki kpa jong me: 10lada men shahshkor ïa ka ktien U Trai uba U Blei jong me, ïa ka ban sumar ïa ki hukum jong u, bad ïa ki aiñ jong u, ïa kiba la thoh ha kane ka kitab jong ka hukum; bad lada men phai sha U Trai uba U Blei jong me da la ka dohnud baroh bad da la ka mynsiem baroh.

11“Namar kane ka hukum ïa kaba nga hukum ïa me ha kane ka sngi, kam long ba la buhrieh na me, lymne kam long kaba jngai. 12#Rom. 10:6,7.Kam long ha bneng, ba men ong, ‘Uei u ban leit kiew sha bneng na ka bynta jong ngi, bad ban wallam ïa ka ha ngi, ba ngin ïohsngew ïa ka, bad ba ngin ïoh leh ïa ka?’ 13Lymne, kam long sha shiliang ka duriaw, ba men ong, ‘Uei u ban leit shalor ka duriaw na ka bynta jong ngi, bad ban wallam ïa ka ha ngi, ba ngin ïohsngew ïa ka, bad ba ngin ïoh leh ïa ka?’ 14#Rom. 10:8.Hynrei, kata ka ktien ka hajan eh ïa me, ha ka shyntur jong me, bad ha ka dohnud jong me, ba men ïoh leh ïa ka.

15“To khmih, nga la buh ha khmat jong me ha kane ka sngi, ïa ka jingim bad ïa ka babha, bad ïa ka jingïap bad ïa ka basniew; 16da kaba nga hukum ïa me ha kane ka sngi, ban ieit ïa U Trai uba U Blei jong me, ban ïaid ha ki lynti jong u, bad ban sumar ïa ki hukum jong u, bad ïa ki aiñ jong u, bad ïa ki jingbishar jong u, ba men ïoh im bad men ïoh roi, bad ba U Trai uba U Blei jong me un kyrkhu ïa me ha kata ka ri sha kaba me leit ban ïoh ïa ka. 17Hynrei, lada ka dohnud jong me kan kylla noh, ba men ym shahshkor shuh, hynrei, la ring noh ïa me, bad men mane ïa kiwei pat ki blei, bad shakri ïa ki; 18te nga maham ïa phi ha kane ka sngi, ba phin jot noh thiaw shisha; bad ba phin ym pynslem ki sngi jong phi ha kata ka ri, sha kaba me leit sha shiliang ka Jordan ban leit ïoh ïa ka. 19Nga pynsmai da ka bneng bad ka khyndew ha kane ka sngi, ban sakhi pyrshah ïa phi, ba nga la buh ha khmat jong phi, ïa ka jingim bad ïa ka jingïap, ïa ka jingkyrkhu bad ïa ka jingtim: namar kata, to jied ïa ka jingim, khnang ban ïoh im, ma me bad u symbai jong me: 20#Jen. 12:7; 26:3; 28:13.ba me lah ban ieit ïa U Trai uba U Blei jong me, ba men kohnguh ïa ka ktien jong u, bad ba men snoh ha u: namar u long ka jingim jong me, bad ka jingjlan ki sngi jong me: ba men ïoh shongneh ha kata ka ri kaba U Trai u la smai ha ki kpa jong me, ha u Abraham, ha u Isaak, bad ha u Jakob, ïa ka ban ai ha ki.”

Currently Selected:

DEUTERONOMI 30: KHB

Highlight

Copy

Compare