DEUTERONOMI 29

Ka jutang hapdeng U Blei bad ki Israel ha ka ri Moab

1Kine ki long kita ki ktien jong kata ka jutang ïa kaba U Trai u la hukum ïa u Moses ban thaw bad ki khun Israel ha ka ri Moab, nalor kata ka jutang kaba u la thaw bad ki, ha Horeb.

2Te u Moses u la pyrta ïa ki khun Israel, bad u la ong ha ki, “Phi la ïohi ïa kita baroh kiba U Trai u la leh ha khmat jong phi ha ka ri Ijipt ha u Pharaoh, bad ha ki shakri jong u baroh, bad ha ka ri jong u baroh ruh: 3ïa kita ki jingtynjuh bakhraw ïa kiba ki khmat jong phi ki la ïohi, ïa kita ki dak khyllah, bad ïa kita ki kam phylla bakhraw: 4#Rom. 11:8.pleng U Trai um shym la ai ha phi ka dohnud ban shemphang, bad ïa ki khmat ban ïohi, bad ïa ki shkor ban ïohsngew, naduh kane ka sngi. 5Bad nga la ïalam ruh ïa phi, sawphew snem, ha kata ka ri khlaw: ki jaiñ jong phi kim shym la man rim ha phi, bad ka juti jong me ruh kam shym la man rim ha ka sla'jat jong me. 6Phim shym la bam kpu, lymne phim shym la dih ka Waiñ, lane ka 'iad rot: khnang ba phi lah ban tip ba ma nga, nga long U Trai uba U Blei jong phi. 7#Jkñ. 21:21-30; 21:31-35.Te ynda phi la ïawan sha kane ka jaka, u Sihon u syiem ka Heshbon, bad u Og u syiem ka Bashan, ki la ïamih noh pyrshah ïa ka ban ïaleh thma ïa ngi, bad ngi la jop ïa ki: 8#Jkñ. 32:33.bad ngi la ïashim ïa ka ri jong ki, bad ngi la ai ïa ka kum ka bynta pateng ha ki Reuben, bad ha ki Gad, bad ha ka shiteng ka jaid Manasseh. 9To sumar, namar kata, ïa ki ktien jong kane ka jutang, to leh ruh ïa ki, ba phin roi ha kiei kiei baroh ba phi leh.

10“Phi baroh phi ïaïeng ha kane ka sngi ha khmat U Trai uba U Blei jong phi: ki rangbah ki jaid jong phi, ki tymmen basan jong phi, bad ki myntri jong phi, u paidbah Israel baroh keiñ, 11ki khynnah jong phi, ki tnga jong phi, bad u nongwei jong me uba ha ka dara jong me, naduh u nongthoh dieng haduh u nongtong um jong me; 12ba men ïoh rung hapoh ka jutang U Trai uba U Blei jong me, bad hapoh ka jingsmai jong u, ïa kaba U Trai uba U Blei jong me u pynlong bad me, ha kane ka sngi: 13khnang ba un ïoh pynskhem ïa me ha kane ka sngi, ïa ka ban long u paidlang ha lade hi, bad ba u un ïoh long U Blei ïa me, kumba u la ong ha me, bad kumba u la smai ha ki kpa jong me, ha u Abraham, ha u Isaak, bad ha u Jakob. 14Bad ym tang bad phi hi, nga pynlong ïa kane ka jutang, bad ïa kane ka jingsmai; 15hynrei, bad uta uba ïeng hangne lem bad ngi ha kane ka sngi ha khmat U Trai uba U Blei jong ngi, bad uta ruh u bymdon hangne lem bad ngi ha kane ka sngi:

16“(Namar phi tip kumno ngi la ïashong sah ha ka ri Ijipt; bad kumno ngi la ïawan hapdeng kita ki jaid bynriew ba phi la ïaid lait ïa ki; 17bad phi la ïohi ïa ki jingijli jong ki, bad ïa ki blei synrum jong ki, da u dieng bad u maw, da ka rupa bad ka ksiar, kiba la don hapdeng jong ki:) 18#Ki Kam. 8:23; Heb. 12:15.ba ïoh kan long hapdeng jong phi u briew, ne ka briew, ne ka ïing, ne ka jaid, kiba ka dohnud jong ki ka phai noh ha kane ka sngi na U Trai uba U Blei jong ngi, ïa ka ban leit shakri ïa ki blei jong kine ki jaid bynriew; ba ïoh kan long hapdeng jong phi u thied uba sei ïa ka umksang, bad u jhur kthang; 19bad kan jia ruh, haba u ïohsngew ïa ki ktien jong kane ka jingtim, te un kyrkhu ïa lade ha la ka dohnud, un ong, ‘Ngan ïoh ka jingsuk, la nga ïaid ha ka jingpyrkhat mutlop la ka dohnud hi, ban nang pynbuaid ïa uba sliang:’ 20U Trai un ym riej ïa u, hynrei, te ka jingbitar U Trai bad ka jingsngewthut rhem jong u kin mih tdem pyrshah ïa uta u briew, bad kita ki jingtim baroh ïa kiba la thoh ha kane ka kitab kin ïaisah halor jong u, bad U Trai un pyndam noh ïa ka kyrteng jong u napoh ka bneng. 21Te U Trai un pynkyrpang ïa u sha ka basniew napdeng ki jaid Israel baroh, katba kum kita ki jingtim ka jutang baroh, ïa kiba la thoh ha kane Ka Kitab Ka Hukum. 22Bad kumta, kata ka pateng bynriew ka ban mih na ki khun jong phi, ki ban long hadien jong phi, bad u nongwei u ban wan na ka ri ba jngai, kin ïa-ong, haba ki ïohi ïa ki jingïapkhlam kata ka ri, bad ïa ki jingpang kiba U Trai u la pynngat ha ka; 23#Jen. 19:24,25.bad kata ka ri baroh kan long kyndok, bad mluh, bad ka jinging, khlem bet ha ka, lymne sei soh, lymne mih phlang ha ka, kum ka jingpynjot ïa ka Sodom, bad ka Gomorra, ka Admah, bad ka Seboim, ïa kiba U Trai u la pynjot ha la ka jingbitar, bad ha la ka jingshla lep; 24wat ki jaid bynriew baroh te kin ïa-ong, ‘Balei ba U Trai u la leh kumne ïa kane ka ri? ka mut aïu kane ka jingrhem ka jingbitar bakhraw?’ 25Te kin ïa-ong, ‘Namar ba ki la klet ïa ka jutang U Trai uba U Blei ki kpa jong ki, ïa kaba u la thaw bad ki, mynba u la ïalam noh ïa ki na ka ri Ijipt; 26namar ba ki la leit ïashakri ïa kiwei pat ki blei, bad ki la ïamane ïa ki, ki blei ïa kiba kim ju ithuh, bad ïa kiba u, um shym la ai ha ki: 27kumta te, la meh ka jingbitar U Trai pyrshah ïa kane ka ri, ïa ka ban pynwan ha ka, ïa kita ki jingtim baroh ïa kiba la thoh ha kane ka kitab: 28bad U Trai u la rat noh ïa ki na ka ri jong ki ha ka jingbitar, bad ha ka jingshla lep, bad ha ka jingsngewsih bakhraw, bad u la bred ruh ïa ki sha kawei pat ka ri, kumba ka long ha kane ka sngi.’

29“Kita kiei kiei ruh kiba rieh ki dei ki jong U Trai uba U Blei jong ngi: hynrei, kita kiei kiei ruh ïa kiba la pynpaw ki dei ki jong ngi, bad jong ki khun jong ngi ha la ka rta, ba ngin ïoh leh ïa ki ktien jong kane ka hukum baroh.

Currently Selected:

DEUTERONOMI 29: KHB

Highlight

Copy

Compare