DEUTERONOMI 28

Ki jingkyrkhu namar ka jingkohnguh

(Leb. 26:3-13; Deu. 7:12-24)

1 # Leb. 26:3-45; Deu. 11:13-17. “Te kan jia, lada men shahshkor biang biang ïa ka ktien jong U Trai uba U Blei jong me, ïa ka ban sumar ban leh ruh ïa ki hukum jong u baroh kiba nga hukum ïa me ha kane ka sngi, ba U Trai uba U Blei jong me un pynkyntiew ïa me ha khlieh ki jaid bynriew ka pyrthei baroh: 2te kine ki jingkyrkhu baroh kin wan ha me, bad kin lap ïa me, lada men shahshkor ïa ka ktien U Trai uba U Blei jong me. 3Ka jingkyrkhu ïa me ha ka shnong, bad ka jingkyrkhu ïa me ha ka lyngkha. 4Ka jingkyrkhu ïa u soh ka met jong me, bad ïa u soh ka khyndew jong me, bad ïa u soh ki jingri jong me, ïa ka jingroi ki masi jong me, bad ïa ki kynhun ki langbrot jong me. 5Ka jingkyrkhu ïa ka shang jong me, bad ïa ka jingtylliat jong me. 6Ka jingkyrkhu ïa me haba me wan hapoh, bad ka jingkyrkhu ïa me haba me leit shabar ruh.

7“U Trai u shoh ïap ha khmat jong me ïa ki nongshun jong me kiba ïeng ïaleh pyrshah ïa me: tang da kawei ka lynti kin ïawan ïaleh ïa me, hynrei, kin ïaphet ïap noh na me keiñ hynñiew ki lynti. 8U Trai un hukum ïa ka jingkyrkhu halor jong me ha ki thiar jong me, bad ha kiei kiei baroh ba me ktah da la ka kti; bad un kyrkhu ïa me ha kata ka ri ïa kaba U Trai uba U Blei u ai ha me. 9U Trai un pynïeng ïa me ban long u paidlang bakyntang ha lade hi, kumba u la smai ha me; lada men sumar ïa ki hukum U Trai uba U Blei jong me, bad ba men ïaid ruh ha ki lynti jong u. 10Te ki briew ka pyrthei baroh kin ïohi ba la khot kyrteng ïa me da ka kyrteng U Trai; te kin ïasheptieng ïa me. 11Bad U Trai un pynroi kyrhai ïa me ha kiei kiei ki babha, ha u soh ka met jong me, bad ha u soh ki jingri jong me, bad ha u soh ka khyndew jong me, ha kata ka ri ïa kaba U Trai u la smai ha ki kpa jong me ban ai ha me. 12U Trai un plie ha me ïa ka jingkynshew babha jong u, ïa ka bneng keiñ, ban pynhap ïa u slap ha ka ri jong me ha la ka aïom, bad ban kyrkhu ïa ka jingtrei ka kti jong me baroh; te men ai kylliang ha ki bun ki jaid bynriew, hynrei, me men ym pan kylliang. 13Bad U Trai te un pynlong ïa me ka khlieh, ym ka tdong keiñ; bad men long tang halor, bad ym hapoh; lada men shahshkor ïa ki hukum U Trai uba U Blei jong me, kiba nga hukum ïa me ha kane ka sngi, ïa ka ban rakhe bad ban leh ïa ki; 14bad men ym da ïaid bakla noh na kine ki ktien baroh ïa kiba nga hukum ïa me ha kane ka sngi, sha kamon ne sha kadiang, ïa ka ban leit bud ïa kiwei pat ki blei ban shakri ïa ki.

Ka jingtim namar ka jingbymkohnguh

(Leb. 26:14-46)

15“Hynrei, kan jia, lada men ym shahshkor shuh ïa ki ktien U Trai uba U Blei jong me, ïa ka ban rakhe ban leh ruh ïa ki hukum jong u bad ïa ki aiñ jong u baroh kiba nga hukum ïa me ha kane ka sngi; ba kine ki jingtim baroh kin ngat ha me, bad kin lap ïa me. 16Ka jingtim ïa me ha ka shnong, bad ka jingtim ïa me ha ka lyngkha ruh. 17Ka jingtim ha ka shang jong me, bad ha ka jingtylliat jong me. 18Ka jingtim ha u soh ka met jong me, bad ha u soh ka khyndew jong me, bad ha ka jingroi ki masi jong me, bad ha ki kynhun ki langbrot jong me. 19Ka jingtim ïa me haba me wan hapoh, bad ka jingtim ïa me haba me leit shabar.

20“U Trai un phah ha me ïa ka jingtim, ïa ka jingjynjar, bad ïa ka jingshitom, ha kiei kiei baroh ba ktah ka kti jong me ïa ka ban leh, haduh ba men da jot thiaw, bad haduh ba men da duh syndon khoit; namar ka jingbymman ki jingleh jong me, da kiba me la kyntait noh ïa nga. 21U Trai un pynsnoh ïa ka jingïapkhlam ha me, haduh ba un da pynduh noh khoit ïa me na kata ka ri, sha kaba me leit ban ïoh ïa ka. 22U Trai un shoh ïa me da ka jingkhrew, bad da ka pang khieshoh, bad da ka jingpang lyng-a, bad da ka jingthang rhem, bad da ka jingtyrkhong, bad da ka jingswai, bad da kaba bthuh ruh; bad kin ïabeh ïa me haduh ba men da jot thiaw. 23Bad ka sahit bneng jong me kaba halor ka khlieh jong me kan long ka rnong, bad ka khyndew kaba hapoh jong me kan long u nar. 24U Trai un pynhap ïa u slap ha ka ri jong me da u pui pui bad ka dpei: na ka sahit bneng kan hiar halor jong me, haduh ba men da jot noh khoit keiñ.

25“U Trai un pynkyllon ïa me ha khmat ki nongshun jong me: tang da kawei ka lynti men leit ïaleh ïa ki, hynrei, men phet ïap na khmat jong ki da ki hynñiew lynti: bad un pynsakma ïa me sha ki hima ka pyrthei baroh. 26Bad ka metïap jong me kan long ka jingbam ïa ki sim bneng baroh, bad ïa ki mrad ka khyndew, bad yn ym don u briew ban beh kynsho ïa ki. 27U Trai un shoh ïa me da ka thung pong ka ri Ijipt, bad da ka jingpang lang snam, bad da ka sarew, bad da u 'ñiangtrew, na kiba ym lah ban pynkhiah ïa me. 28U Trai un shoh ïa me da ka jinglamwir, bad da ka jingmatlah, bad da ka jingshaïong ka dohnud: 29te men shu par ha kaba mynsngi, kumba par u bamatlah ha ka ba-dum, bad men ym roi ha ki lynti jong me: hynrei, men long tang uba la banbeiñ bad uba la shah lute ha la ka rta, bad yn ym don u briew ruh u ban pyllait ïa me. 30Men ïatehktien ka tnga, te uwei pat un ïoh thiah bad ka: men tei ïa ka ïing, te men ym ïoh shongneh ha ka: men thung ïa ka brisoh, te men ym ïoh lum ïa ki soh jong ka. 31Yn pynïap ïa u masi dab jong me ha khmat jong me, te men ym ïoh bam na u: ïa ka kadda jong me, yn rong da ka bor na khmat jong me, te kan ym wan phai pat sha me: ïa ki langbrot jong me, yn ai ha ki nongshun jong me, bad men ym ïoh uei uei ruh u ban pyllait noh.

32“Ïa ki khun jong me, shynrang bad kynthei, yn ai ha kiwei pat ki kynja bynriew, te men shu khmih da la ki khmat, bad men nang tlot ngai da ka jingkwah hir hir ïa ki baroh shi sngi: te men ym don bor shuh ha la ka kti. 33Ïa u soh ka ri jong me, bad ïa ki jingtrei jong me baroh, ka jaid bynriew ïa kaba mem ju tip kan bam noh; bad men long tang uba la banbeiñ bad ba la kshot#28:33 kshot: Khñiot. man la ka sngi: 34kumta, men lamwir da kaba ïohi ki khmat jong me ïa kaba men ïohi. 35U Trai un shoh ïa me na ki khohsiew, bad na ki kjat da u 'ñiangsynrang basniew eh, ïa uba ym lah pynkhiah shuh, naduh ka poh'jat haduh ka shynrong khlieh jong me.

36“U Trai un wallam ïa me, bad ïa u syiem jong me ïa uba men thung halor jong me, sha ka jaid bynriew ïa kaba ma me lymne ki kpa jong me kim ju ithuh; hangta ruh, men shakri ïa kiwei pat ki blei, ïa u dieng, bad u maw. 37Bad men jia long ka jingkyndit, ka jingphawar beiñ, bad ka jingkynshi, hapdeng kita ki jaid bynriew baroh sha kiba U Trai un ïalam ïa me. 38Ïa ki symbai shibun men kit shabar sha ka lyngkha, hynrei, men ïalum tang khyndiat hapoh; naba ki puit kin bam duh ïa ki. 39Men thung ïa ki brisoh, bad men khyllad ruh ïa ki, hynrei, men ym ïoh dih na ka Waiñ, lymne ïalum ïa ki soh; naba ki khñiang kin ïabam ïa ki. 40Men ïoh ki dieng Olib ha ki phang jong me baroh phar, hynrei, men ym ïoh sleh da kata ka umphniang; naba ki soh Olib jong me kin khlur noh. 41Men pynkha ïa ki khun shynrang bad kynthei, hynrei, kin ym long ki jong me; naba kin ïaleit sha ka jinglongmraw. 42Ïa ki dieng jong me, bad ïa ki soh ka ri jong me baroh, ki puit kin ïabam duh noh. 43Uta u nongwei uba hapdeng jong me un kiew ha khlieh eh jong me; te men hiar ha ka jingrit eh. 44Un ai kylliang ha me, ma me te men ym ai kylliang ha u: u, un long ka khlieh, me te, men long ka tdong keiñ. 45Te kine ki jingtim baroh, kin ngat ha me, bad kin bud ïa me, bad kin lap ïa me, haduh ba men da jot thiaw; namar mem shym la shahshkor ïa ka ktien U Trai uba U Blei jong me, ïa ka ban sumar ïa ki hukum jong u, bad ïa ki aiñ jong u ïa kiba u la hukum ïa me: 46bad kin ïalong halor jong me, ka dak bad ka jingphylla, bad halor u symbai jong me ha la ka rta:

47“Naba mem shym la shakri ïa U Trai uba U Blei jong me da ka jingkmen, bad ka jingsngewbha ka dohnud, namar ka jingshlei kyrhai kiei kiei baroh: 48Namar kata, men shakri ïa ki nongshun jong me ïa kiba U Trai un phah pyrshah ïa me, ha ka jingthngan, bad ha ka jingsliang, bad ha ka jinglyngkhuit, bad ha ka jingkyrduh ïa kiei kiei baroh: bad un buh ka lyngkor nar ha ka ryndang jong me, ha ban da u la pynjot noh thiaw ïa me. 49#1 Kor. 14:21.U Trai un wallam ïa ka jaid bynriew pyrshah ïa me na sha jngai, naduh ka bakut ka pyrthei keiñ, kaba stet kat kumba her ka pukni; ka jaid bynriew kaba men ym sngewthuh ïa ka ktien jong ka; 50ka jaid bynriew kaba itriem ka khmat, ka ban ym suidñiew ïa u tymmen, lymne leh isynei ïa u khynnah: 51te kan bam duh ïa u soh ka jingri jong me, bad ïa ki soh ka ri jong me, ha ban da la pynjot noh thiaw ïa me: ka ban ym iehnoh ruh ïa me, ïa u Kew, lane ïa ka Waiñ, lane ïa ka umphniang, lane ïa ka jingroi ki masi jong me, lane ki kynhun ki langbrot jong me, ha ban da la pynjot noh thiaw ïa me. 52Bad kan ker kut ruh ïa me ha ki khyrdop jong me baroh, tad ynda kin kyllon kram ki kynroh bajrong bad baskhem jong me, ha kiba me ju shaniah, kylleng ka ri jong me baroh: bad kan ker kut ruh ïa me ha ki khyrdop jong me baroh ha ka ri jong me baroh, ïa kaba U Trai uba U Blei jong me u la ai ha me. 53Bad men bam ïa u soh ka met jong me hi, ïa ka doh ki khun jong me keiñ, shynrang bad kynthei, ïa kiba U Trai uba U Blei jong me u la ai ha me; ha kata ka jingker kut, bad ha kata ka jingshipa, da kaba ki nongshun jong me kin ïa-pynjynjar ïa me. 54Kumta, uta u briew uba leh jem kynshing hapdeng jong phi, bad uba subani eh, te ka khmat jong u kan peit sniew ïa la u para, bad ïa ka tnga shong lem jong u, bad ïa kita kiba dang sah na ki khun jong u ïa kiba un iehnoh sah: 55kumta, un ym ai hano hano ruh na ki na kata ka doh ki khun jong u ïa kiba un bam, naba um don ei ei ruh ba dang sah ïa u; ha kata ka jingker kut, bad ha kata ka jingshipa, da kiba ki nongshun jong me kin ïa-pynjynjar ïa me ha ki khyrdop jong me baroh. 56Kata ka briew kaba leh jem kynshing bad ba subani eh hapdeng jong phi, ka bym ju nud ban buh ïa la ka poh'jat ka sla'jat ha ka khyndew namar ka jingleh kynshing bad ka jingsubani, te ka khmat jong ka kan peit sniew ïa u tnga shong lem jong ka, bad ïa la u khun, bad ïa la ka khun; 57#2 Syiem. 6:28,29; JngSnei. 4:10.bad ïa la i khunlung iba mih na ka kpoh jong ka, bad ïa la ki khun ïa kiba kan kha; naba kan bam ïa ki ha kaba rieh namar ka jingkyrduh ïa kiei kiei baroh: ha kata ka jingker kut, bad ha ka jingshipa, da kiba ki nongshun jong me kin ïa-pynjynjar ïa me ha ki khyrdop jong me.

58“Lada men ym sumar ïa ka ban leh ïa ki ktien jong kane ka hukum baroh ïa kiba la thoh ha kane ka kitab, ba men ïoh sheptieng ïa kane ka kyrteng ba-donburom bad ba-itieng, U Trai Uba U Blei Jong Me; 59te U Trai un pynlong ïa ki jingïapthem ha me kiba ishyrkhei, bad ïa ki jingïapthem ki khun jong me, kita ki jingïapthem kiba khraw, bad kiba ïaineh slem, bad ki jingpang kiba jur eh, bad kiba ïaineh slem keiñ. 60Nalor kane shuh, un pynwan ha me ïa ki jingpang ka ri Ijipt baroh, ïa kiba me la sheptieng; te kin ïadambit ha me. 61Ïa ka kynja jingpang baroh keiñ, bad ïa ka kynja jingïapthem baroh ruh, ïa ki bym shym la thoh ha ka kitab jong kane ka hukum, ïa kita U Trai un pynwan ha me, ha ban da la pynjot noh thiaw ïa me. 62Te yn iehnoh ïa phi tang khyndiat ha ka jingkheiñ, haba phi ju long paidbah kat ki khlur ka bneng; naba mem mon ban kohnguh ïa ka ktien U Trai uba U Blei jong me. 63Te kan jia, ba kumba U Trai u la ju kmen halor jong phi ban leh bha ïa phi, bad ban pynroi ïa phi; kumta, U Trai un kmen halor jong phi ïa ka ban pynjot noh thiaw ïa phi, bad ban pynduh noh ïa phi; kumta, yn rat noh ïa phi na kata ka ri sha kaba me leit ban ïoh ïa ka. 64Bad U Trai un pynsakma ïa me hapdeng ki jaid bynriew baroh, naduh bakut haduh ka bakut ka pyrthei, te hangta, men shakri ïa kiwei pat ki blei, ïa kiba ma me, lymne ki kpa jong me, kim ju tip, kiba da u dieng bad u maw keiñ. 65Te hapdeng kine ki jaid bynriew, men ym shem ïa kaba suk, lymne ka poh'jat jong me kan ym ïoh shongthait: hynrei, U Trai un ai ha me hangta, ka dohnud bakyiuh, bad ïa ki khmat ba nang tlot, bad ïa ka jingsngewsih sat ka mynsiem: 66te ka jingim jong me, kan shu sdien ha ka jingartatien ha khmat jong me; te men sheptieng synñia sngi, bad men ym thikna ïa la ka jingim: 67ha kaba mynstep men sa ong, ‘A ban da miet noh!’ bad ha kaba mynmiet men ong, ‘A ban da shai noh!’ namar kata ka jingsheptieng ka dohnud jong me da kaba men sheptieng, bad namar ka jingïohi ki khmat jong me ïa kaba men ïohi. 68Te U Trai un ïalam ïa me sha ka ri Ijipt pat da ki lieng bah, na ka lynti shaphang kaba nga la kren ha me, ‘Men ym ïohi shuh ïa ka: hangta te, yn die noh ïa phi ha ki nongshun jong phi ban long ki mraw shynrang bad ki mraw kynthei, bad yn ym don shuh ban thied ïa phi.’ ”

Currently Selected:

DEUTERONOMI 28: KHB

Highlight

Copy

Compare