DEUTERONOMI 26

Ka rukom shaphang ki soh nyngkong bad kaba ai kawei na ka shiphew

1 # Eks. 22:29; 23:19; 34:26; Jkñ. 18:12,13. “Kan long te, ynda me la wan sha kata ka ri ïa kaba U Trai uba U Blei jong me u ai ha me kum ka jingïoh pateng, bad ba me la ïoh ïa ka, bad me la shong duh ha ka; 2#Eks. 23:19.ba men shim na u soh nyngkong jong ka khyndew baroh, ïa uba men wallam na ka ri jong me ïa kaba U Trai uba U Blei jong me u ai ha me; men buh ruh ha ka shang, bad men leit sha kata ka jaka ïa kaba U Trai uba U Blei jong me un jied ban buh ïa la ka kyrteng ha ka. 3Bad men leit sha uta u lyngdoh u ban long ha kita ki sngi, bad men ong ha u, ‘Nga phla ha kane ka sngi ha U Trai uba U Blei jong me, ba nga la wan sha kata ka ri ïa kaba U Trai u la smai ha ki kpa jong ngi ban ai ha ngi.’ 4Te uta u lyngdoh, un shim ïa ka shang na ka kti jong me, bad un buh ïa ka ha khmat ka duwan U Trai uba U Blei jong me.

5“Bad men ïathuh, men ong ruh ha khmat U Trai uba U Blei jong me, ‘U kpa jong nga u la long u kynja Syria u ban sa jot noh, bad u la leit hiar sha ka ri Ijipt, bad u la shong basa hangta bad khyndiat ki briew; te hangta, u la man ka jaid bynriew bakhraw, badonbor, bad babun. 6Te ki Ijipt ki la leh sniew ïa ngi, bad ki la ïa-pynjynjar ïa ngi, bad ki la ïaban halor jong ngi da ka jingpynlong mraw kaba jur eh. 7Te ynda ngi la ïakyrpad sha U Trai uba U Blei ki kpa jong ngi, U Trai u la sngew ïa ka jingkyrpad jong ngi, bad u la khmih ha ka jingjynjar jong ngi, bad ïa ka jingtrei shitom jong ngi, bad ïa ka jingbanbeiñ ïa ngi: 8te U Trai u la ïalam noh ruh ïa ngi na ka ri Ijipt da ka kti badonbor, bad da ka ksang'ti ba la kner, bad da ka jingshitom bakhraw, bad da ki dak khyllah, bad da ki jingphylla ruh: 9bad u la wallam ïa ngi sha kane ka jaka, bad u la ai ha ngi ïa kane ka ri, ka ri keiñ kaba tuid da ka dud bad ka ngap. 10Mynta te, ha khmih, nga la wallam ïa u soh nyngkong jong kata ka ri, ïa kaba ma me, A Trai, me la ai ha nga.’ Bad men buh ïa u, ha khmat U Trai uba U Blei jong me, bad men mane ha khmat U Trai uba U Blei jong me. 11Men leh kmen ruh ha ka babha baroh ïa kaba U Trai uba U Blei jong me u la ai ha me, bad ha ka ïing jong me, ma me, bad u Lebi, bad u nongwei uba hapdeng jong phi.

12 # Deu. 14:28,29. “Ynda me la ai pyndep ïa kaba shiphew na ka jingmih jong me baroh ha kata ka snem ka balai, kaba long ka snem jong kaba ai ïa kaba shiphew, te men ai ha u Lebi, ha u nongwei, ha u khunswet, bad ha ka riewkynthei, ba kin ïoh bam hapoh ki khyrdop jong me, bad ba kin kdang ruh; 13ynda kumta, men sa ong ha khmat U Trai uba U Blei jong me, ‘Nga la pynmih noh ïa kiei kiei ki bakyntang na ka ïing jong nga, bad nga la ai ruh ïa ki ha u Lebi, bad ha u nongwei, ha u khunswet, bad ha ka riewkynthei, kat kum ki hukum jong me baroh ïa kiba me la hukum ïa nga: ngam shym la leh palat ïa ki hukum jong me, lymne ngam shym la klet noh. 14Ngam shym la bam na ka ha la ka jingïambriew, lymne ngam shym la shim na ka, ïa kaba tngit, lymne ngam shym la ai ruh na ka bynta ki baïap: nga la shahshkor ïa ka ktien U Trai uba U Blei jong nga, bad nga la leh ïa kiei kiei baroh kat kumba me la hukum ïa nga. 15To khmih na ka jaka shongneh bakhuid jong me, na ki bneng keiñ, bad to kyrkhu ruh ïa u paidlang jong me ki Israel, bad ïa ka ri ïa kaba me la ai ha ngi, kumba me la smai ha ki kpa jong ngi, ka ri keiñ batuid da ka dud bad ka ngap.’

U paidlang bakyntang ha U Trai

16“Ha kane ka sngi, U Trai uba U Blei jong me u la hukum ïa me ban leh ïa kine ki aiñ bad ïa ki jingbishar: namar kata, to men sumar ban leh ïa ki da la ka dohnud baroh, bad da la ka mynsiem baroh. 17Me la shim ïa U Trai ha kane ka sngi ban long U Blei ïa me, bad ban ïaid ha ki lynti jong u, bad ban sumar ïa ki aiñ jong u, bad ïa ki hukum jong u, bad ïa ki jingbishar jong u, bad ban shahshkor ïa ka ktien jong u: 18#Eks. 19:5; Deu. 4:20; 7:6; 14:2; Tit. 2:14; 1 Pet. 2:9.U Trai ruh u la shim ïa me ha kane ka sngi ban long u paidlang la u jong hi, kumba u la kular ïa me, bad ba men sumar ïa ki hukum jong u baroh; 19ba un pynkyntiew ïa me kham ha khlieh eh ïa ki jaid bynriew baroh ïa kiba u la thaw, ha ka jingïaroh, bad ha ka nam, bad ha ka burom ruh; bad ba men long ruh u paidlang bakyntang ha U Trai uba U Blei jong me, kumba u la kren.”

Currently Selected:

DEUTERONOMI 26: KHB

Highlight

Copy

Compare