DEUTERONOMI 25

1“Lada mih ka jingïakajia hapdeng ki briew, bad ba kin ïawan sha ka jingbishar, ba ki nongbishar kin ïabishar ïa ki; te kin ïa-pynksan ïa u bahok, bad kin ïa-pynrem ïa u bymman; 2te lada uta u riewbymman u long uba dei ban ïoh sympat, u nongbishar un pynthiah ïa u, bad un phah sympat ïa u ha khmat jong u, katba kum ka jingpalat jong u, da kaba ñiew ki thri. 3Un ai sawphew thri ïa u, hynrei, un ym pyntam: ba ïoh, lada un pyntam, bad un sympat ïa u bun thri nalor kine, te ïa u para jong me yn imat ba ibeiñ ha khmat jong me.

4 # 1 Kor. 9:9; 1 Tim. 5:18. “Men ym khum ïa ka shyntur u masi dab haba u ïuh khlur Kew.

Shaphang kaba pynmih symbai ïa u para

5 # Mat. 22:24; Mrk. 12:19; Luk. 20:28. “Lada ki para ki ïashong lem, bad uwei na ki un ïap noh, bad um don khun, ka tnga jong uta u baïap kan ym shongkurim shawei ïa u nongwei: u para u tnga jong ka un leit ha ka, bad un shim ïa ka, ban long ka tnga jong u, bad ban leh ïa ka ïa kaba dei ka kam u hynmen. 6Te ai ba uta ïa uba kan kha nyngkong, un ïoh ka kyrteng u hynmen jong u, uba la ïap, ba yn ym pyndam noh ïa ka kyrteng jong u na Israel. 7#Rut. 4:7,8.Te lada uta u briew um mon ban shim ïa ka tnga u hynmen jong u, te ai ba ka tnga u hynmen jong u kan leit kiew sha ka khyrdop sha ki tymmen basan, bad kan ong, ‘U para u tnga jong nga um treh ban pynmih ïa ka kyrteng u hynmen jong u ha Israel, un ym pyndep ïa kaba dei ka kam u hynmen.’ 8Ynda kumta, kita ki tymmen basan ka shnong jong u, kin khot ïa u bad kin kren ha u: te lada u kren skhem, bad u ong, ‘Ngam mon ban shim ïa ka;’ 9hadien kata, ka tnga u hynmen jong u kan wan ha u ha khmat kita ki tymmen basan, bad kan loit noh ïa ka juti jong u na ka sla'jat jong u, bad kan bynthiew ha ka khmat jong u; bad kan ïathuh kan ong ruh, ‘Kumta keiñ yn leh ïa uta u briew u ban ym tei ïa ka ïing u hynmen jong u.’ 10Kumta, yn khot ïa ka kyrteng jong u ha Israel, ‘Ka ïing jong uta ïa uba la loit noh ïa ka juti jong u.’

Kiwei pat ki aiñ

11“Haba ar ngut ki briew ki ïaleh, bad ba ka tnga uwei na ki, kan wan hajan ïa ka ban pyllait ïa la u tnga na ka kti jong uta uba shoh ïa u, bad ka kner noh ïa la ka kti, bad ka da bat ïa u na ka rain jong u: 12te men ot noh ïa ka kti jong ka, ka khmat jong me kan ym isynei ïa ka.

13 # Leb. 19:35,36. “Men ym buh ha la ka pla ïa ki mawser kiba ïapher, uba khraw bad uba rit keiñ. 14Men ym buh ha la ïing ïa ki jingthew ba ïapher, ba khraw bad ba rit. 15Men buh ïa u mawser ba biang bad bahok keiñ; ïa ka jingthew kaba biang bad bahok de men buh: ba yn pynslem ïa ki sngi ka rta jong me ha kata ka ri ïa kaba U Trai uba U Blei jong me u ai ha me. 16Naba baroh kiba leh ïa kiei kiei ruh kat kita, baroh keiñ kiba leh bymhok, ki long kiba ijli ha U Trai uba U Blei jong me.

Ka hukum ban pyndam noh ïa ka jingkynmaw ïa u Amalek

17 # Eks. 17:14; 1 Sam. 15. “To kynmaw ïa kaba la leh u Amalek ïa me ha kata ka lynti mynba phi la mih noh na ka ri Ijipt; 18kumno ba u la ïashem bad me ha kata ka lynti, bad ba u la pynïap ïa ki bakhatduh jong me, baroh keiñ kiba tlot shadien jong me, mynba me la lwait bad la thait; bad um shym la sheptieng ïa U Blei. 19Namar kata, kan jia, ynda U Trai uba U Blei jong me u la ai ha me ïa ka jingshongthait na ki nongshun jong me baroh sawdong, ha kata ka ri ïa kaba U Trai uba U Blei jong me u ai ha me kum ka bynta pateng ban ïoh ïa ka, ba men pyndam noh khoit ïa ka jingpynkynmaw ïa u Amalek napoh ka bneng; men ym klet.

Currently Selected:

DEUTERONOMI 25: KHB

Highlight

Copy

Compare