Apudunet 34

Ngamoru nadapal ngache

1Tolimok Ekapolon Akuj Musa tama, “Tokul ngamoru ngaarei nadapal na ikwaan ka nangoon a ekingaren, sodi egirak ayong ngakiro nakolong ayakasi namoru na ekingaren nakolong ibwangi iyong. 2Tonyou iyong moi nataparach, todoku kidiama emoru a Sinai kitoriam ayong alokidiama. 3Nyiirukut ka itwaan tani ipei, nabo emam itwaan eanyungario alowae a eche a emoru. Nyechamitae ngamesekin kori ngaatuk edakasi akeju a emoru.” 4Sodi tokul Musa ngamoru ngache ngaarei. Ani iwalari, nataparach elilim, yaa kidiama emoru a Sinai, loger lo adungokinitor Ekapolon Akuj.

5Bu Ekapolon Akuj eyei lodou towaa ka Musa kaneni. Abu Ekapolon Akuj tolim ekiro keng, lo erai Ekapolon Akuj.#34:5 Ekapolon Akuj; kingolik 3:14. 6Kitor Ekapolon Akuj ngaren Musa, tolim tama, “Ayong lo arai Ekapolon Akuj, arai Akuj naajokon noi, nabo arai Akuj a ngisien. Arai ayong Akuj na nyangoyeene atipei, nabo edodiunit amina naationon atarai nakamunoi. 7#Apud 20:5-6; Ekim 14:18; Etal 5:9-10; 7:9-10 Erichakinit ayong akichikichiket kang anabunge a ngalesea,#34:7 anabunge a ngalesea; kingolik 20:6. nabo arimakini aronis ka akisech. Nakaneni nyaisikini ayong akirirare ngide ka ngide a ngide kotere akisech a ngikauriak kech, tanang nalesea na ngauni ka na ngoomwon.”

8Toriedik Musa atipei tatap ereet ngalup, sodi kilip. 9Tolim ngesi tama, “Ekapolon, ani kijoikinito iyong dir ngakiro kang, bua kare erukosi ka sua. Ichanaka ngitunga lugu, nakaneni torimakinae sua aronis ka akisech kosi, sodi kitacham sua atarautu ngitunga kon a alope.”

Etiliwor Achamunet akitetet

(Apudunet 23:14-19)

10Tolimok Ekapolon Akuj Musa tama, “Kichamakin tokona ayong ka Ngisirael. Asubakini ayong ngakiro nakailiilok iteete kesi. Nyesubakina ayong ngakiro na ikote nguna alobukut a eche, anakwapea kadaang. Ingolikinete ngitunga daang ngakiro nakailiilok asubakini ayong, Ekapolon Akuj, kainyo asubakini ayong ibore niketubulon anikus. 11Kiwapa ngitalio lu kainakinit ayong esi akolongit naga. Ani iloose esi ngaren, etwarakini ayong Ngiamor, ka Ngikanaan, ka Ngiiti, ka Ngiperes, ka Ngiipi ta Ngiebus. 12Tochoito ichamakinosi ka ngitunga a akwap ana ilomarete esi, kainyo eliwor ibore ngini elokit loaronon anikus. 13#Etal 16:21 Nakaneni toyatasi ngikenoi kech lua ngakipeyos, tobwangabwangata ngapirio kech na italeunitoe, sodi totubutuboto ngakisikwaanet a akuj kech anabe Achera.#34:13 Achera; kingolik eger a ngakiro alosal a Abibilia.

14“Nyiilipa akuj ache, kainyo Ekapolon Akuj, na erai ekiro keng Etereku, erai Akuj a etereku. 15Nyiichamakinosi ka ngitunga a akwap kangina kainyo na ilipeta kesi ngakujo kech kipeyokis ngakipeyos, kinyaraunete kesi esi kimuja ka kesi. Ani kikokis neni, inyamete esi akimuj kech na ipeyokinito kesi ngakujo kech. 16Epedorete talokookus akiut ngide kech lupesur lu ibatarete kesi katongero ayong, toliworos ilipito ngakujo kech nagelayek.

17 # Apud 20:4; Lawi 19:4; Etal 5:8; 27:15 “Nyiisubakis ngakujo a ngasua sodi kilipa. #Apud 12:14-20; Lawi 23:6-8; Ekim 28:16-25

18“Kirichakisi esukukuu a ngamugati anapadok. Elap lo enyaritae Abib, tanyama ngamugati napadok a ngirwa a ngikan-kaarei loger lokolong kadungokinea ayong esi, kainyo irotokinete kolong esi elap ngolo alo Misiri.

19“Ikoku nisapat daang ni idounio ekingaren ka ibarasit daang ni euriunio ekingaren, erai ikang. 20#Apud 13:2 Nakaneni ilokonyuunete esi itasikiria ni euriunio ekingaren toliwor ikus ani ilokonyikinioto imesek nados keng. Ani pekilokonyuut esi toliwor ikus, tobila emosiring keng. Kilokonyuutu ikoku nisapat daang toliwor ikus. #Apud 13:13

“Emam itwaan ebuni ngaren kang emam akipeyos etingit.

21 # Apud 20:9-10; 23:12; 31:15; 35:2; Lawi 23:3; Etal 5:13-14 “Tosuba ngitichisio kus a ngirwa a ngikan-kapei nakaneni nyiisuba ngitichisio akolongit na ngakan-kaarei, tani kerai ngirwa lu itaare, kori lu elemere ngamanat. #Lawi 23:15-21; 23:39-43; Ekim 28:26-31

22“Kirichakisi esukukuu a ngalemet lo elemere ngakanoi na ekingaren, ka esukukuu loa ngikalea lo egerere ageor ngirwa lu elosio ekaru adaun.

23“Ekaru epei, echamit ngitunga kus lukiliok epote ngaponet ngauni kepeyoto ayong Ekapolon Akuj na arai Akuj a Ngisirael. 24Ani ketwarak ayong ngibukui lu eyakasi ngaren kus kerumor, sodi eatak akwap kus, emam nabo itwaan eremi akwap kus ngaponet nauni daang iponeta esi akilip Ekapolon Akuj na erai Akuj kus.

25 # Apud 12:10 “Nyiilemut ngamugati na eyei ekitoe lo itubui nakipeyokinioto esi ayong akipeyos a ibarasit. Warasi akiring adio a ibarasit ani eario kotere esukukuu a Adeparet eperi kiwalak. #Etal 24:2; 26:2

26“Yaunutu kai a Ekapolon Akuj ngikinyam lua ekingaren a ngalemet kus.

“Nyiidorokis imesek kori ikale a ngakile a itiokeng.”

27Tolimok Ekapolon Akuj Musa tama, “Kigirak ngakiro nugu, kainyo ngakiro nugu kesi kichamakinor ayong ka iyong, ta Ngisirael.” 28Kiboikin Musa inaa kiruko ka Ekapolon Akuj a ngirwa a ngitomwon-omwon, akwaar ka apaaran. Emam ibore ni amat ngesi kori ni anyam. Kigirak ngesi ngakiro a achamunet namoru nadapal. Ngakiro nguna kesi ngitalio lutomon.

Atiyaun Musa alomoru a Sinai

29Na atiyaunor Musa alomoru a Sinai etingit ngitalio lutomon, emaunit ereet keng, kainyo eruorosi sek ngesi ka Ekapolon Akuj. Nakaneni peayeni Musa atamar emaunit ereet keng. 30Taanyungasi Aron ka ngitunga daang ereet a Musa imaunit sodi toema kesi aapiyar diyete keng. 31Abu Musa tanyarau kesi, sodi toloto Aron ka ngikarikok daang a ngitunga nia Musa, kisuruor Musa kesi. 32Ani erumor tochunun Ngisirael daang kiriama Musa. Nak Musa kesi ngitalio daang lusek ainakini Ekapolon Akuj alomoru a Sinai. 33Ani erumori Musa akisuruor kesi, kimuk ereet keng a awaru. 34Toliwor ani elomari Musa loeam a Akuj akiruor ka Ekapolon Akuj, talacha awaru aloreet keng. Ani epuduni nikalapatan, tolimok Ngisirael ngakiro daang na adungokinitae ngesi atamar tolimo. 35#2 Kor 3:7-16 Kingolikis ngitunga ereet keng imaunit. Sodi kimukok Musa awaru loreet keng nabo tanang na elosio akiruor ka Ekapolon Akuj.

Currently Selected:

Apudunet 34: ABIBILIA

Highlight

Copy