ABALAWI 7
7
Emisango chikhoyile okhukholwa
1Akaloondakhwo kano namalako akemisango chiemirungo, niko amatakatifu muno. 2Eshihaanwa shiomusango kweshikha shilererungwa habundu aha beleranga ebihaanwa biemisango emisambe. Nako amalasile kakwo kalamitsulwa khutsimbeka tsiosi khushimalilo misango. 3Omwisaaliisi ayiniekhwo amasinya kakwo koosi akeyisembe, amasinya kafwimbanga khumala, 4tsifuko tsiombi namasinya kalikhwo, akali hashikhuulu nende akali khushitakhaliira. 5Omwisaaliisi okhuula asambe amasinya ako koosi khushimalilo shiemisango kabe omusango okukholiilwe isie OMWAMI Nyasaye. Okwo nikwo omusango okweshikha. 6Buli oweshisaatsa muluyia olwabesaaliisi anyala okhukuliakhwo nebutswa okhuula kulilwe habundu hatakatifu, shichila nomusango okuli omutakatifu muno.
7Omusango okweshikha kuli shinga omusango kwobwonooni, shichila liliho lilako elala khuchio chiosi elili mbu, omwisaaliisi ouchikhola okhuula abukule inyama yachio. 8Ne omwisaaliisi oukhola omusango omusambe kwomundu yesi, okhuula abukule liseelo lieyisolo yomusango okwakholile okwo. 9Buli omusango kweimele okufumbukhwa mumayika nende biosi ebikasilibwa khushifulia noho khuluchio bilabetsanga ebiomwisaaliisi oukukholile. 10Nebutswa buli omusango okweimele okutsokasibwe namafura kata okusiyiilwe kulabetsanga okwabasiani boosi ba Haroni, okhuula bakabane okuherana.
Emisango echiokhureera omulembe
11“Akalondakhwo kano niko amalako akemisango echiokhurea omulembe, echiomundu anyala okhukholela isie OMWAMI Nyasaye. 12Omundu naba niyakholela omusango kwokhukhupila orio, okhuula akurere halala nende amandasi akabulamwo limela, akatsokasibwe namafura, nebisikuti ebibulamwo limela ebibashilwekhwo namafura, nende amandasi akobusie obunyushe obutsokasiibwe obulayi namafura. 13Okhumeeta khuchio okhuula areere nende amandasi kalimwo limela. 14Ne omwisaaliisi oyo, okhuula areere eshitonye shilala khubuli eliandasi eliomusango okwo okhuba eshihaanwa eshiahule khwisie OMWAMI Nyasaye. Ne bilabetsanga biomwisaaliisi ouhanyile amalasile kemisango chiokhureera omulembe khushimalilo shiemisango. 15Ne inyama yemisango echio, okhuula iliibwe khunyanga yene eyachikholelekhwo. Alalekhakhwo inyama eyo okhukona okhuula okhushia tawe.
16“Nebutswa omusangokwe nikuba nikuli okweshihaanwa shieshitsubo noho okweshihaanwa eshia ahaana mukhuchama, inyama yakwo yilalibwa yosi khunyanga eyo ta, habula eyitong'a yilibwe khunyanga yilondakhwo. 17Nebutswa inyama yakwo eyitong'a okhuula khunyanga yakhataru, yisambwe nomulilo. 18Ne inyama yosi yosi yokhumusangokwe kwokhureera omulembe niyakhalibwa khunyanga yakhataru, shiemba ndafuchilila omusango okwo tawe. Omusangokwe okwo shikulabalwakhwo okweinganga khuye tawe, habula kulaba okwomusilo. Ne omundu yesi ouliakhwo inyama yakwo alanyoola eshinyasio. 19Inyama eyitisiakhwo khushindu shiosi eshiomusilo, yilalibwa tawe; okhuula yisambwe nomulilo. Nebutswa omundu yesi omusiiyikhu anyala okhuliakhwo inyama eyo. 20Nebutswa omundu yesi oulali omusiikhu ta, naliakhwo inyama yemisango chianje echiokhureera omulembe, okhuula arusibwe muluyia olwa Abaisiraeli. 21Ne omundu yesi natiilakhwo khushindu shiomusilo, kata shibe shiobwonooni bwomundu, noho isolo eyili eyomusilo kata eshisinyo eshili omusilo, mana nalia inyama yemisango chianje chiokhureera omulembe, okhuula arusibwe muluyia olwa Abaisiraeli.”
22OMWAMI Nyasaye nalachilisia Musa ari, 23“Boolela abandu ba Isiraeli mbu, ‘Mulaliakhwo amasinya keing'ombe kata kelikondi noho akeimbusi ta. 24Amasinya akeisolo ifwile butswa eyene nende aka isolo yirirwe neisolo yindi yomubulimo, munyala okhukekhoonyela khulwa okhukhola omulimo kundi kwosi, nebutswa shimulakaliekhwo tawe. 25Omundu yesi ouliakhwo amasinya akeisolo yomusango okusambiilwe isie OMWAMI Nyasaye nomulilo, okhuula arusibwe muluyia olwa Abaisiraeli. 26#Obucha. 9:4; Abal. 17:10-14; 19:26; Okhuk. 12:16,23; 15:23Okhumeetakhwo, mushimenyo shienywe shiosi shiosi mulaliakhwo amalasile akelinyonyi kata keisolo ta. 27Omundu yesi ouliakhwo amalasile kosi kosi, okhuula arusibwe muluyia olwa aba Isiraeli.’ ”
28OMWAMI Nyasaye nalachilisia Musa ari, 29“Boolela abandu ba Isiraeli mbu, omundu yesi ounderera omusangokwe okwokhureera omulembe, okhurula khukwo okhuula yandeerere isie OMWAMI Nyasaye eshitonye eshiahule. 30Yanderere namakhonoke omwene omusango omusambe. Yanderere amasinya nende itakata kho mbu, bibe omusango omwahule okuhanilwe isie OMWAMI Nyasaye. 31Omwisaaliisi asambile amasinya ako khushimalilo shiemisango, nebutswa itakata ahelesie Haroni nabasianibe. 32Eshiatakho shieshilenje eshisaatsa shihaanwe khumwisaaliisi shinga eshihaanwa eshiahule. 33Khu omwisaaliisi ouhaana amalasile nende amasinye komusango okwokhureera omulembe okwo. 34Itakata neshihaanwa eshiahule, nashio eshiatakho shieshilenje shisaatsa neshihaanwa eshiahule eshia isie OMWAMI Nyasaye ndabukula okhurula khu Abaisiraeli neshihelesia abesaaliisi. 35Kuno nikwo omukabo okwa isie OMWAMI Nyasaye ndahelesia Haroni nabasianibe okhurula khumisango chianje emisambe, okwabalaamilwa okhurula khunyanga eyandabahulila okhukhalabana shinga abesaaliisi banje. 36Khandi isie OMWAMI Nyasaye ndalachilisia mbu abandu ba Isiraeli bahelesinjie abolwibulo lwa Haroni ebindu ebio okhurula khunyanga yabaahulilwakhwo. Okhuula bakholenje bario mutsinzibulo tsiabwe tsiosi.”
37Ako niko amalako kemisango emisambe, echieimele, echiobwonooni, echieshikha, echiokhwahulwa, nende echiokhurera omulembe. 38Ako niko amalako ako OMWAMI Nyasaye yalachilisia Musa khushikulu shia Sinai, khunyanga eya yaboolela abandu ba Isiraeli okhureerera OMWAMI Nyasaye emisango olwa bali nibali mushitsiimi shia Sinai.
Currently Selected:
ABALAWI 7: OLUPR
Highlight
Copy
Compare
Share
Want to have your highlights saved across all your devices? Sign up or sign in
