ABALAWI 5
5
Emisango chiokhuyiniaho obwonooni
1“Emisango okhuula chikholwe khulwa okhuyiniaho obwonooni buno: Omundu yesi naba nalangwa okhutsia mushina imbeli wabandu, okhuboola obuloli khushialutsi noho eshiahulile, ne nalaboola obuloli obwo ta, aba neshikha.
2“Ne omundu yesi natiila khushindu shiosi shiosi shiomusilo nalamanyile ta, yibe inyama yeyisolo nabulimo eyifwile noho yeing'ombe, noho ebindu bimoolanga khwiloba, olwa eshionoono eshio shimumanyishila aba neshikha.
3“Omundu yesi naba natiila khushindu shiosi shiosi shieimeelo yomundu eshiomusilo nalamanyile ta, olwa eshionoono eshio shimumanyishila aba neshikha.
4“Omundu yesi yesi naba nayukha okhwitsuba nomunwakwe, okhukhola likhuwa libe lilayi noho libi, olwa eshionoono eshio shimumanyishila aba neshikha.
5“Omundu naba neshikha khulwa okhukhola elala khu ako, okhuula yeyame obwonooni bwakholile. 6Okhuula yandereere isie OMWAMI Nyasaye, likondi lisubini noho imbusi khulwa obwonooni bwakholile obwo. Mana omwisaaliisi amutise khulwa obwonoonibwe.
7“Ne omundu oyo naba nalanyalilwa okhunyoola likondi noho imbusi eyokhundereera ta, okhuula areere amahusi kabili noho emisosole chibili chiaamakuuku, elala libe liomusango kwobwonooni, ne elindi liomusango omusambe. 8Omundu oyo abireere khumwisaaliisi, oularanjiliile okhuhaana likondi liomusango kwobwonooni. Aliborole likosi, habula alakhalachila elala omurwe tawe. 9Mana omwisaaliisi amiitse malala khumalasile akomusango kwobwonooni okwo halubeka weshimalilo shiemisango. Nako akatong'a akaratsie hasi weshimalilo shiemisango eshio. Kuno nomusango kwokhurusiaho obwonooni. 10Olunyuma areere eliakhabili okhuba omusango omusambe okhulondana nelilako. Ne munjila eyo nolwa omwisaaliisi alatisa omundu oyo khulwa obwonooni bwakholile, ne omundu oyo alaleshelwa.
11“Ne omundu oyo naba nalanyala, okhunyoola amahusi kabili noho emisosole chibili echiamakuuku ta, okhuula areere obuusie obunyushe obuhela ikilo ndala, khulwa omusango kwobwonooni. Ne shialarakhwo amafura, noho obubaane ta, shichila shikuli omusango kweimele ta, habula nokwobwonooni. 12Areere obusie obwo khumwisaaliisi, naye omwisaaliisi afumbarekhwo ifuusi khubwo okhuba eshilolelo mbu, bwosi buhaanilwe OMWAMI Nyasaye, mana abusambile khushimalilo shiemisango halala nebihaanwa bindi ebio. Okwo nikwo omusango kwokhurusiaho obwonooni. 13Nolwa omundu oyo alaleshelwa obwonoonibwe ario. Ne obusie butong'a bulaba obwomwisaaliisi shinga olwa kakholungwa nomusango kweimele.”
Emisango chiemirungo khu OMWAMI Nyasaye
14OMWAMI Nyasaye naboolela Musa ari, 15“Omundu yesi naba niyonoona mukhukorwa khulwa okhulekha okhurunga ebili ebitakatifu khwisie, okhuula yandeerere omusangokwe kwomurungo. Okhuula yandeerere likondi limiiku noho imbusi eyibulakhwo nobulema bwosi bwosi ta. Obukusi bwalio bulaba okhulondana nende eshichelo shiarebwaho. Okwo nikwo omusango kweshikha. 16Khandi okhuula arunje buli shindu eshialaarunga ta khubindu ebitakatifu, khandi ameetekhwo eshitonye shiakharano. Mana ashireere omwisaaliisi. Naye khuomwisaaliisi amutise nelimiiku elo, mana alaleshelwa obwonoonibwe.
17“Omundu yesi niyonoona khulwa okhukhola shilala khubindu ebia isie OMWAMI Nyasaye ndakaana mbu, bilakholwa ta, kata naba niyetsukhana aba neshikha khandi okhuula arunje omurungo khulwa obwonooni obwo. 18Areerere omwisaaliisi likondi limiiku noho imbusi eyibulakhwo obulema bwosi bwosi, liachelile obukusi bwalio, obuhela obukusi bwomusango kweshikha. Mana omwisaaliisi amutise khulwa liaba nakholile nalamanyile ta, ne omundu oyo alaleshelwa. 19Okwo nikwo omusango kweshikha, shichila omundu oyo ali neshikha imbeli wanje isie OMWAMI Nyasaye.”
Currently Selected:
ABALAWI 5: OLUPR
Highlight
Copy
Compare
Share
Want to have your highlights saved across all your devices? Sign up or sign in
