Filemón 1
1
Carta qalaykunan
1Wilakuq mayï kuyay Filemón:
Noqa Pablumi, Jesucristupa wilakuyninta wilakushqäpita carcilcho kaykar Timoteuwan kay cartata apaykätsimü. 2Salüdüta qoykulanki panintsi Apiata, wilakuq mayintsi Arquiputa#Col. 4.17. y wayikicho juntakaykur Tayta Diosta alabaq wawqi panintsikunatapis. 3Papänintsi Tayta Dios y Señor Jesucristo kuyapäshushpayki ali kawanaykipaq yanapaykuläshunki.
Yärakuq mayinkunawan Filemón ali kawashqan
4Wawqi Filemón, manakushqä hörami qampaq Tayta Diosta imaypis agradëcikü. 5Señor Jesucristuman yärakuykashqaykita y yärakuq mayintsikunawan kuyanakuykashqaykitami wilamashqa. 6Tsaymi manakuykä Jesucristuman yärakunaykipaq y noqantsi rayku wanushqanpita ali kaqkunata ruranaykipaq.
7Wawqi Filemón, kuyakuq kashpayki yärakuq mayintsikunata shakyaykätsishqaykita musyarmi noqapis pasaypa kushikü.
Onésimuta Filemón chaskinanpaq Pablo ruwakushqan
8-10Wawqi Filemón, Jesucristupa wilakuyninta wilakushqäpitami carcilcho wichqaraykä. Tsaynöpis awkinnami kaykä. Prësu kaykashqäman ashmayniki Onésimo#Col. 4.9. chayamuptin ali wilakuyta wilapaptïmi Jesucristuta chaskikushqa. Tsaymi kananqa tsurïnöna kaykan.
Tsayno kaptinmi qamta ruwakü Onésimuta kachamuptï ali chaskinaykipaq. Jesucristupa apostolnin kar qamta obligarpis obligämanmi. Tsayno karpis manami obligayta munätsu, sinöqa kuyakuq kaptikimi Onésimuta ali chaskiykunaykipaq ruwakü.
11Ashmayniki karpis nawpata manami shumaqlaqa yanapashurqaykitsu. Kananmi itsanqa Jesucristuta chaskikushqana kar qamtapis y noqatapis ali yanapamäshun. 12Tsaymi pasaypa lakiykarpis Onésimuta kutiykätsimü. [Payta kikïtano chaskiykulay.] 13Ali wilakuyta wilakushqäpita prësu wichqarashqäyaq trukayki yanapamänanpaq quëdatsikuptïpis alimi kanman. 14Tsayno kaptinpis ashmaynikitaqa manami tsararäkümantsu, sinöqa kikikiraqmi ninkiman yanapamänanpaq o mana yanapamänanpaqpis.
15Capazchari Tayta Dios kamakätsishqa Onésimo juk tiempula qampita yarqamunanpaq. Tsaymi kananqa Jesucristuta chaskikushqana kar imayyaqpis wawqikina kaykan. 16Kananpita mananami ashmaynilaykinatsu kanqa, sinöqa kuyay wawqintsinami. Tsayno kaykaptinqa noqa kuyashqäno makikiman kutimuptin qampis kuyaykulanki. 17Tsaymi yärakuq mayï kaptiki ruwakü noqata chaskimashqaykino paytapis chaskiykunaykipaq.
18Ashmayniki Onésimo suwapäshushqayki kaptinqa o jaqayki kaptinqa noqami pägaläshayki. 19Päganäpaq kaqtaqa kikïmi qelqaykämü. Itsanqa ama qonqaytsu Jesucristupa ali wilakuyninta wilapashqäpita qampis jaqä kashqaykita. 20Wawqi Filemón, yärakuq mayï kaptikimi ruwakü kay nishqäta ruranaykipaq. Ruwakushqäta ruraptikiqa kushikushaqmi.
21Kay cartatami apaykätsimü imatapis nishqäta ruranaykipaq kashqanta musyar. Nishqäpita mastaraq ruranaykipaq kashqantapis musyämi. 22Tayta Diosta manakushqaykino carcilpita yarqamurqa watukuq shamushaqmi. Chayamuptï patsatsimänaykipaq juk cuartuta jakaykatsilay.
Carta ushanan
23Epafrasmi#Col. 1.7; 4.12. salüdunta qampaq apatsikamun. Paypis Jesucristupa ali wilakuyninta wilakushqanpitami noqawan juntu prësu wichqaraykan. 24Tsaynölami wawqintsi Marcos,#Hech. 12.12, 25; 13.13; 15.37-39; Col. 4.10. Aristarco,#Hech. 19.29; 27.2; Col. 4.10. Demas#Col. 4.14; 2Tim. 4.10. y Lucaspis#Col. 4.14; 2Tim. 4.11. salüdunkunata apatsikamun. Paykunami lapanchöpis yanapaykäman.
25Señor Jesucristo kuyapäshushpayki imaypis yanapaykuläshunki. [Amén.]
Currently Selected:
Filemón 1: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.