YouVersion Logo
Search Icon

Juan 7

7
Wawqinkunapis Jesúsman mana criyipäkushqan
1Tsaypitanami Galileacho kaykaq markakunapa Jesús purirqan. Judea provinciapami itsanqa aywayta mana munarqantsu Israel autoridäkuna wanutsiyta munaptin.
2Israel runakunapa Ramäda fiestanpaq#Lev. 23.34; Deut. 16.13. walka junaqlana pishiykaptinmi 3wawqinkuna Jesústa kayno nirqan: <<Milagru rurashqaykita discïpuluykikuna rikananpaq Judeaman ayway. 4Reqishqa kayta munarqa manami kaylachötsu milagruta rurankiman, sinöqa lapan runakuna rikananpaq ruray>>.
5Jesúspa wawqinkuna tsayno nirqan payman mana criyishpanmi.
6Tsaymi wawqinkunata Jesús kayno nirqan: <<Noqa aywanäpaq manami höra chayamunraqtsu. Qamkunami itsanqa imay hörapis aywapäkunkiman. 7Qamkunataqa runakuna manami chikishunkitsu. Noqatami itsanqa jutsayuq kashqanta niptï chikipäkaman. 8Tsay fiestamanqa qamkunala aywapäkuy. Noqa aywanäpaq manami hörä chayamunraqtsu>>.
9Tsayno nirmi Galileacho Jesús quëdakurqan.
Ramäda fiestaman Jesús aywashqan
10Wawqinkuna aywakärishqanchönami Jesúspis pakaylapa Ramäda fiestaman aywarqan. 11Fiestacho Jesústa ashirpis mana tarirmi Israel autoridäkuna kayno nipäkurqan: <<¿Maychöraq tsay runa kaykan?>>
12Jerusaléncho juntaraykaq wakin runakunaqa Jesús ali runa kashqantami nipäkurqan. Wakinnami nipäkurqan lutanta yachaykätsishqanta. 13Itsanqa Israel autoridäkunata mantsakushpanmi kikinpura pakaylapa parlapäkurqan.
14Fiesta pulancho kaykaptinnami templu patiuman yaykur Jesús yachatsiyta qalaykurqan. 15Yachatsishqanta mayaykurmi Israel runakuna espantashpan kayno nipäkurqan: <<Ley yachatsiqkunawanpis mana puriykarqa ¿imanöpataq kay runa tsayjinanpa yachaykun?>>
16Tsayno niptinmi Jesús kayno nirqan: <<Yachatsishqäkunaqa manami yarpayniläpitatsu kaykan, sinöqa kachamaqnï Tayta Diospitami. 17Pipis Tayta Dios munashqanta rurayta munarqa yachatsishqäkuna Diospita kashqanta o yarpayniläpita kashqanta tantiyakunqami.
18<<Kikinpa yarpaynilanpita yachatsiqkunaqa alabashqa kayta munalarmi yachatsipäkun. Noqami itsanqa kachamaqnï Tayta Dios alabashqa kananpaq rasun kaqlata yachaykätsï. 19Qamkunaqa Moisés qelqashqan leykunata chaskikurpis manami mayqanikipis cumpliykankitsu. ¿Imanirtaq wanutsimayta munarkaykanki?>>
20Runakunanami kayno nipäkurqan: <<¿Pitaq qamta wanutsiyta munaykäshunki? ¡Supaymi qamta löcutaykätsishunki!>>
21Tsaymi Jesús kayno nirqan: <<Jamay junaqcho milagruta rurashqäpitami#Juan 5.1-9. qamkunaqa rabyakurkaykanki. 22Tantiyakäriy. Olqu wamrata señalanantsipaqmi Moisés yachatsirqan.#Lev. 12.3. (Moisés yachatsiptinpis tsay costumbri karqan Abrahampita patsami.)#Gén. 17.10. Moisés qelqashqankunata cumplir ¿manaku jamay junaq kaptinpis olqu wamrata señalapäkunki? 23Olqu wamraykikunata jamay junaqchöpis señalaykarqa ¿imanirtaq rabyaparkaykämanki jamay junaqcho qeshyaq runata aliyätsishqäpita?#Juan 5.9-10, 16. 24Mana tantiyakuypaqa manakaqkunata ama parlapäkuytsu. Shumaq tantiyakuykur parlapäkuy>>.
Maypita kashqantapis Jesús wilakushqan
25Tsaymi Jerusaléncho taq wakin runakuna kayno nipäkurqan: <<¿Manaku kay runataqa wanutsinanpaq ashirkaykan? 26Lapanpa nawpancho yachatsiptinpis ¿imanirtaq pipis mana rimapantsu? ¿Tayta Dios kachamushqan Cristo kashqantatsuraq autoridäkunapis yarparkaykan? 27Tsayno kaptinpis musyantsimi may markapita kashqantapis. Tayta Dios kachamushqan Cristo shamuptinqa maypita kashqantapis manami pipis musyanqatsu>>.
28Tsayno parlaykashqanta musyarmi templu patiucho yachaykätsir qayakuypa Jesús kayno nirqan: <<Pï kashqäta reqimaptikipis y maypita shamushqäta musyaptikipis manami kikïpa munayniläpitatsu shamushqä, sinöqa Tayta Dios kachamaptinmi shamushqä. Paytaqa manami reqipäkunkitsu. 29Pay kachamashqa kaptin noqami itsanqa reqï>>.
30Tsayno niptinmi autoridäkuna Jesústa prësu tsaritsiyta munapäkurqan. Itsanqa höra manaraq kaptinmi tsaripäkurqantsu. 31Atska runakunami payman criyir kayno nipäkurqan: <<Tayta Dios kachamushqan Cristo shamur kay runa milagruta rurashqanpita ¿mastatsuraq ruranqa?>>
Fariseukuna Jesústa prësu tsarimunanpaq kachashqan
32Jesúspaq parlarkaykashqanta mayaykurmi mandaq cürakuna y fariseukuna templu täpaq wardiakunata kacharqan Jesústa prësu tsarimunanpaq. 33Prësu tsariqkuna chayananpaqmi Jesús kayno niykarqan: <<Walka tiempulanami qamkunawan kaykäshaq. Kachamaqnï kaqmannami aywakushaq. 34Noqa aywashqä kaqmanqa manami aywayta kamäpakunkipaqtsu. Ashimashpaykipis manami taripäkamankipaqtsu>>.
35Jesús tsayno niptinmi Israel autoridäkuna kikinpura parlar kayno nipäkurqan: <<Mana tarinantsipaqqa ¿mayparaq aywakunqa? ¿Juk lädu nacioncho taq marka mayintsikunamantsuraq yachatsiq aywakunqa? Tsaychöqa capazchari griego runakunatapis yachatsinqapaq. 36¿Imanirtaq <ashirpis manami tarimankitsu> niykämantsi? ¿Imanirtaq <aywashqäman manami chayayta kamäpakunkitsu> niykämantsi?>>
Kawatsikuq yakupaq nishqan
37 Ramäda fiesta diya junaqmi#Lev. 23.36; Núm. 29.35. lapan runakuna mayananpaq Jesús fuertipa kayno nirqan: <<Pipis yakunaykaq kaqqa noqaman shamur uputsun.#Juan 4.13-14. 38Tayta Diospa palabran nishqannömi yärakamaqkunapa shonqunpita kawatsikuq yaku mayunöraq yarqamunqa>>.
39Tsayno nishpanmi Jesús tantiyatsirqan payman yärakuq runakuna Espíritu Santuta chaskipäkunanpaq kashqanta. Tsay witsanqa Espíritu Santu manami shamurqanraqtsu. Gloriaman Jesús kutikuptinraqmi shamurqan.
Runakuna apänakushqan
40Jesús tsayno nishqanta mayaykurmi wakin runakuna kayno nipäkurqan: <<Moisés nishqanno shamunanpaq kaq profëtami payqa kaykan>>.#Deut. 18.15, 18.
41Wakin runakuna kayno nipäkurqan: <<Payqa Tayta Dios kachamushqan Cristumi>>.
Wakin runakunanami kayno nipäkurqan: <<¿Imanöpataq Galileapitaqa Cristo shamunman? 42Tayta Diospa palabranmi niykan rey Davidpa aylunpita Cristo kananpaq kashqantami.#2Sam. 7.12-13; Sal. 89.3-4; 132.11-12. Tsaynöpis niykan David tashqan Belénchöraq yurinanpaq kashqantami>>.#Miq. 5.2.
43Tsayno nirmi Jesúspita apänakurqan. 44Wakinkuna prësu tsariyta munarpis manami mayqanpapis valornin karqantsu tsarinanpaq.
Israel autoridäkuna mana criyishqan
45Tsaypitanami templu täpaq wardiakuna kutikurqan mandaq cürakuna y fariseukuna kaykashqan kaqman. Chayaptinmi tapupäkurqan kayno nir: <<¿Imanirtaq Jesústa prësu mana tsaripäkamushqankitsu?>>
46Tsaymi wardiakuna kayno nipäkurqan: <<¡Pay parlashqannöqa manami pipis parlantsu!>>
47Tsawraqa fariseukuna kayno nipäkurqan: <<¿Qamkunatapis criyiratsishushqankitsu? 48Tsay runataqa manami mayqan autoridäkunapis ni fariseo mayïkunapis criyipäkuntsu. 49Moisés qelqashqan leykunata mana yachaq runakunalami paytaqa criyipäkun. ¡Tsay runakunaqa maldicionädumi karkaykan!>>
50Tsayno niptinmi Jesúsman aywaq fariseo runa Nicodemo#Juan 3.1-2. kayno nirqan: 51<<Leynintsikuna nishqanno pitapis acusanantsipaqqa kikin parlashqantaraq puntata mayashun y rurashqankunataraq shumaq musyashun>>.
52Tsaymi fariseukuna kayno nipäkurqan: <<¿Qampis favornin sharkunaykipaq paypa marka mayinku kaykanki? Tayta Diospa palabranta shumaq liyiy. ¡Manami imaypis nimantsitsu Galileapita profëta yurimunanpaq kashqanta!>>
53[Tsaypitanami wayinkunapana lapan kutikärirqan.

Currently Selected:

Juan 7: qvmB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy