Juan 16
16
1<<Lapan kaykunata niykä noqaman imaypis yärakärimänaykipaqmi. 2Sinagögapitapis qarqupäkushunkipaqmi. Tayta Dios munashqanno rurarkaykashqanta yarparmi wanutsipäkushunkipaq. 3Tsayno rurapäkushunki noqata mana reqimar ni Taytätapis mana reqirmi. 4Qamkunata kayno niykä nishqäno pasashuptiki lapanpis nishqänöla kashqanta tantiyakärinaykipaqmi. Nawpataqa manami wilarqäraqtsu tsayno pasashunaykipaq kashqanta. Kananmi itsanqa aywakunäpaqna kar wilaykä.
Espíritu Santu shamunanpaq Jesús nishqan
5<<Kananqa kachamaqnï Taytä kaqman kutikunäpaqnami kaykä. Tsayno kaptinpis maypa aywanäpaq kashqanta manami mayqanikipis tapumankitsu. 6Tapumänaykipa trukanqa tsaykunata nishqäpitami lakishqa karkaykanki. 7Rasunpami kayno nï: Qamkunapaq mas ali kaykan noqa aywakushqämi. Mana aywakuptïqa Yanapakuq Espíritu Santu#Juan 14.16; 15.26. manami shamunqatsu. Aywakurmi itsanqa payta kachamushaq.
8<<Espíritu Santu shamurnami runakunata tantiyatsinqa jutsayuq kashqanta, Tayta Dios munashqanno kawapäkunanpaq kashqanta y juzgashqa kananpaq kashqanta. 9Jutsayuq kashqanta tantiyatsinqa noqata mana chaskikärimaptinmi. 10Tayta Dios munashqanno kawapäkunanpaq tantiyatsinqa Taytä kaqman kutikuptïmi. Kutikuptï manami rikapäkamankipaqnatsu. 11Juzgashqa kananpaq kashqanta tantiyatsinqa kay patsapa mandaqnin#16.11 Kay patsapa mandaqninpaq parlarqa Satanáspaqmi Jesús parlarqan. vincishqana kaptinmi.
12<<Atskaraqmi kaykan qamkunata yachatsinäpaq. Lapanta yachatsiptïqa manami tantiyapäkunkipaqtsu. 13Rasun kaqta tantiyatsikuq Espíritu Santu shamurnami Diospa wilakuyninta lapanta tantiyatsishunki. Payqa manami kikinpa yarpaynilanpitatsu tantiyatsishunki, sinöqa noqa nishqäkunalatami. Tsaynölami ima pasananpaq kaqkunatapis tantiyatsishunki. 14Noqa nishqäkunata tantiyatsishunki noqata alabamänaykipaqmi. 15Taytä nishqankunaqa noqa nishqäkunami kaykan. Tsaymi Espíritu Santu nishqäkunata tantiyatsishunaykipaq nishqä.
Lakikushqanpita kushikunanpaq Jesús nishqan
16<<Walkalanami pishiykan mana rikapäkamänaykipaq. Tsaypita warantinkunaqa yapaymi rikapäkamankipaq>>.
17Tsayno niptinmi discïpulunkuna jukninpis jukninpis kayno nipäkurqan: <<Tsayno nishpan ¿imataraq niykämantsi? ¿Imanirraq niykämantsi: <Walkalanami pishiykan mana rikapäkamänaykipaq>? ¿Imanirraq niykämantsi: <Tsaypita warantinkunaqa yapaymi rikapäkamankipaq>? Tsaynöpis ¿imanirraq niykämantsi Taytan kaqman aywakunanpaq kashqanta? 18<Walkalanami pishiykan> nishqanqa ¿ima ninantaq? Manami tantiyantsitsu imapita parlaykashqantapis>>.
19Discïpulunkuna tapukuyta munashqanta musyarmi Jesús kayno nirqan: <<¿<Walkalanami pishiykan mana rikapäkamänaykipaq> y <tsaypita warantinkunaqa yapaymi rikapäkamankipaq> nishqäpitaku yarpachakurkaykanki? 20Rasunpami kayno nï: Aywakuptï Diosta mana cäsukuq runakuna kushikärinqami. Qamkunami itsanqa lakikushpayki waqapäkunkipaq. Tsayno lakikurpis nirkurqa kushikärinkipaqmi. 21Warmikuna wachay nanay tsariptin waqarpis yuripakurirnaqa kushikärinmi. Tsaymi nanaywan nakashqantapis mana yarpannatsu. 22Tsaynölami qamkuna kanan lakikurpis yapay tinkuptintsi kushikärinkipaq. Tsay kushikuytaqa manami pipis qechushunkipaqtsu. 23Yapay tinkuptintsiqa mananami imatapis tapumankipaqnatsu.
<<Rasunpami kayno nï: Noqapa jutïcho imatapis manakärishqaykitami Taytä qoshunkipaq. 24Noqapa jutïcho manami Taytäta imatapis manakärishqankiraqtsu. Kananpitaqa jutïcho manakäriy. Manakur chaskipäkunkimi. Tsaynöpami pasaypa kushikärinkipaq.#Mat. 7.7-11; Stg. 1.5-6.
25<<Kananyaqqa tumatsipaylapami qamkunata yachatsishqä. Nirkurnami itsanqa mana tumatsipaylapana Tayta Diospa wilakuyninta yachatsishayki. 26Tsay witsanqa manami noqanatsu qamkunapaq Taytäta manakuykäshaq, sinöqa kikikikunami jutïcho manakärinki. 27Tsayno manakärinki Taytä kuyashuptikimi. Paymi kuyashunki paypita shamushqäta criyir kuyamaptiki. 28Taytä kaqpita kay patsaman shamushqa karmi Taytä kaqman kutikushaqpaq>>.
29Tsayno niptinmi discïpulunkuna kayno nipäkurqan: <<¡Kananmi itsanqa nimashqaykita tantiyapäkü! ¡Mana tumatsipaylapanami parlapaykämanki! 30Kananqa tantiyakärïmi lapanta musyashqaykita. Tsaymi yachaq kashqaykita musyananpaq pipis tapuykäshunkinatsu. Kananmi itsanqa Tayta Dios kaqpita shamushqaykita criyipäkü>>.
31Tsaymi Jesús kayno nirqan: <<¿Tsayraqku criyipäkunki? 32Walka junaqlanami pishiykan japaläta kachariykamar wakpa kaypa aywakärinaykipaq. Tsayno aywakuptikipis manami japalätsu kaykäshaq, sinöqa Taytämi noqawan kaykanqa.
33<<Lapan kaykunata wilapashqä noqaman yärakamar jawkala kawapäkunaykipaqmi. Kay patsacho kawashqaykiyaqqa nakankiraqmi. Tsayno kaptinpis valurakäriy. Noqami kay patsacho lapan mana alikunata vincishqä>>.#Rom. 8.37; 2Cor. 2.14; 1Juan 5.4-5; Apoc. 3.21; 5.5.
Currently Selected:
Juan 16: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.