YouVersion Logo
Search Icon

Juan 4

4
Samaria warmiwan Jesús parlashqan
1 Fariseukunami musyapäkurqan Juan bautizashqanpita mas atska runakunata Jesús bautizaykashqanta y mas atska discïpulunkuna kashqanta. 2(Itsanqa manami kikintsu Jesús bautizarqan, sinöqa discïpulunkunalami.) 3Fariseukuna musyashqanta wilaptinmi Judeapita Jesús kutirqan Galileaman.
4Galileaman chayananpaqmi Samariaparaq pasanan karqan. 5Tsayno aywarmi Sicar markaman chayarqan. Tsay marka kaykan tsurin Joséta Jacob qoykushqan chakran tinkuqchömi.#Gén. 33.19; Jos. 24.32. 6Tsaychömi kaykan Jacob uchkutsishqan pözu. Pulan junaqnöna kaykaptinmi tsay pözuman chayaykur Jesús utikashqa jamaykurqan. 7Samaria warmi yakukuq tsayman chayaptinmi Jesús kayno nirqan: <<Yakulayki, mamïta>>.
8(Jesús jamapashqanyaqmi discïpulunkuna markapa aywarqan mikuy rantiq.)
9Tsawraqa warmi kayno nirqan: <<Israel runa kaykarqa ¿imanirtaq Samaria warmi kaykaptï yakuta manakamanki?>>
Tsayno nirqan Samaria runakunawan Israel runakuna chikinakuptinmi.
10Tsawraqa Jesús kayno nirqan: <<Tayta Diospita imata chaskinaykipaq kashqanta musyar y noqa pï kashqätapis musyarqa yakuta manakamankimanmi. Manakamaptikiqa kawatsikuq yakutami kamaripäman>>.#Isa. 44.3; Jer. 2.13; 17.13; Juan 7.37-39.
11Tsawraqa warmi kayno nirqan: <<Tayta, kay pözuqa hondumi kaykan. Jorqunaykipaq imaykipis mana kaykaptinqa ¿maypitataq tsay kawatsikuq yakuta jorqamunkiman? 12Unay ayluntsi Jacobmi kay pözuta uchkutsirqan. Kay pözupitami yakuta upurqan uywankuna, tsurinkuna y kikinpis. Tsay yakupita mas ali kaq yakuta qomänaykipaqqa manami paypita mas munayniyuqtsu kaykanki>>.
13Tsawraqa Jesús kayno nirqan: <<Kay pözupita yaku upuq kaqqa yapaypis yakunaykanqami. 14Noqa kamaripashqä yakuta upuq kaqmi itsanqa imaypis mana yakunanqatsu. Tsay kamaripashqä yaku shonquncho pukyuno kaptinmi imayyaqpis kawanqa>>.
15Tsawraqa warmi kayno nirqan: <<Tayta, imaypis mana yakunänäpaq ni kay pözumanpis manana kutiykämunäpaq tsay yakuta kamaripaykalämay>>.
16Tsawraqa Jesús kayno nirqan: <<Ayway runaykita qayamuy>>.
17Niptinmi warmi kayno nirqan: <<Manami runä kantsu, tayta>>.
Tsawraqa Jesús kayno nirqan: <<Rasun kaqtami niykanki. 18Qamqa pitsqa runawannami tashqanki. Kanan taykashqayki runa manami runaykitsu. Tsaymi runayki mana kashqanta nimarqa rasun kaqta nimashqanki>>.
19Tsayno niptinmi warmi kayno nirqan: <<Tayta, qamqa Diospa profëtan imachi kaykanki. 20Noqakunapa unay aylükunaqa taqay jirkachömi Tayta Diosta adorapäkuq. Qamkunaqa nirkaykanki Jerusalénchöraq adoranantsipaq kashqantami>>.
21Tsawraqa Jesús kayno nirqan: <<Rasunpami kayno nï: Taqay jirkamanpis ni Jerusalénmanpis mana aywaypa Tayta Diosta adorapäkunaykipaq kaq tiempu chayaykämunnami. 22Qamkunaqa Diosta adorarpis wilakuyninta manami musyapäkunkitsu. Salvakuq runa Israelpita kaptinmi noqakunaqa wilakuyninta musyapäkü.
23<<Tiempu chayamushqanami Tayta Diosta rasunpa adoraqkuna Espíritu Santu munashqanno lapan shonqunwan adorapäkunanpaq. Tsayno adoranantsitami Tayta Dios munan. 24Tayta Diosqa Espïritumi kaykan. Tsaymi payta adoraqkuna Espíritu Santu yanapaptin lapan shonqunwan adoranman>>.
25Tsawraqa warmi kayno nirqan: <<Cristo shamunanpaq kashqanta musyämi, tayta. Pay shamurnami tsaykunata tantiyatsimäshun>>.
26Tsawraqa Jesús kayno nirqan: <<Shamunanpaq kaqqa noqami kaykä>>.
27Discïpulunkuna kutiykurmi warmiwan parlaykaqta tariykur pasaypa espantakärirqan. Itsanqa manami mayqanpis tapurqantsu imapita parlashqanta y imata tapushqantapis.
28Warminami puyñunta kachariykushpan markaman aywar runakunata kayno wilarqan: 29<<Juk runami pözu kaqcho kaykan. Paymi nimashqa imano kashqätapis. Rikaq aku aywashun. ¿Manatsuraq Tayta Dios kachamushqan Cristo kaykan?>>
30Tsayno niptinmi runakuna aywapäkurqan Jesús kaykashqan kaqman. 31Manaraq chayaptinmi discïpulunkuna Jesústa kayno nirqan: <<Rabí, mikapakurishunraq>>.
32Tsayno niptinmi Jesús kayno nirqan: <<Noqapa mikuynïqa kaykan mana reqishqayki mikuymi>>.
33Tsawraqa discïpulunkuna kikinpura kayno nipäkurqan: <<¿Piraq mikuyta apapämushqa?>>
34Tsayno yarpashqanta tantiyarmi Jesús kayno nirqan: <<Noqapa mikuynïqa kachamaqnï nimashqanta cumplinäyaq rurashqämi kaykan. 35Musyapäkunkimi runakuna kayno nishqanta: <Murushqantsipita chusku killataraqmi cosechantsi>. Tsayno niptinpis noqaqa kaynömi nï: Rikapäkuy. Chakrakunacho mikuykuna poquraykannami. Shuntaypaqnami kaykan.#4.35 Poquraykaq mikuykunataqa Jesús tinkutsirqan payta chaskikunanpaq listu kaykaq runakunamanmi. 36Tsay cosëchacho aruqkunami runakuna mana ushakaq kawayta tarinanpaq arupäkunqa. Tsayno arushqanpita Tayta Diosmi päganqa. Tsaymi muruqpis y cosëchata shuntaqpis kushikärinqa.#4.36 Muruqkuna y cosëcha shuntaqkunapis kaykan Diospa wilakuyninta wilakuqkunami. Muruqkuna wilakuptinqa manami wilakushqanta chaskipäkunraqtsu. Cosëcha shuntaqkuna wilakuptinnami chaskipäkun.
37<< <Juk murushqantaqa juknami cosechan> nipäkushqanqa rasun kaqmi kaykan. 38Tsaynölami qamkunatapis kachashqä juk murushqanta cosechamunaykipaq. Tsaymi wakinkuna nakar murushqanta qamkunana shuntamunkipaq>>.
39<<Jesúsmi nimashqa imano kashqätapis>> nir tsay warmi wilakuptinmi atska Samaria runakuna Jesúsman criyipäkurqan. 40Tsaymi Jesús kaqman aywaykur ruwakärirqan paykuna kaqcho qoyänanpaq. Tsayno ruwakuptinmi paykunawan ishkay junaq qoyarqan. 41Tsaycho wilapaptinmi atska runakuna Jesúsman criyipäkurqan. 42Tsawraqa warmita kayno nipäkurqan: <<Manami qam nimashqalaykipitatsu criyipäkü, sinöqa kikïkuna mayarmi musyapäkü lapan runakunata salvananpaq Cristo rasunpa kashqanta>>.
Autoridäpa tsurinta Jesús aliyätsishqan
Mateo 8.5-13; Lucas 7.1-10
43Tsaycho ishkay junaq qoyarkurnami Galileaman Jesús kutikurqan. 44Jesús nishqannölami Tayta Diospa profëtanta markanchöqa mana chaskikärintsu.#Mat. 13.57; Mar. 6.4; Luc. 4.24. 45Tsayno kaptinpis marka mayinkuna Pascua fiestapaq Jerusalénman aywar milagrukunata rurashqanta rikashqa karmi#Juan 2.23-24. payta chaskikärirqan.
46Galileacho kaykarnami Caná markaman Jesús yapay kutirqan. Tsaychömi yakuta vïnuman nawpata tikratsirqan.#Juan 2.1-11. Capernaúm markachönami reyta yanapaq juk autoridäpa tsurin qeshyaykarqan. 47Judeapita Galileaman Jesús chayashqanta musyaykurmi tsay autoridä ruwakuq aywarqan. Chayaykurmi ruwakurqan wayinman aywaykur antsa qeshyaykaq tsurinta aliyätsinanpaq. 48Tsawraqa Jesús kayno nirqan: <<Milagru rurashqäta mana rikarqa qamkuna manami criyipäkunkitsu>>.
49Tsayno niptinpis tsay runa kaynömi nirqan: <<Tayta, tsurï manaraq wanushqanyaq jukla aywaykuläshun>>.
50Tsayno niptinmi Jesús kayno nirqan: <<Wayikipa kutikuyna. Tsuriki aliyashqanami>>.
Jesús nishqanta criyirmi kutikurqan. 51Capernaúmman chayaykaptinnami ashmayninkuna taripaq aywaykur kayno nirqan: <<¡Tsuriki aliyashqanami, tayta!>>
52Tsawraqa ashmayninkunata tapurqan imay höra aliyashqantapis. Tsaymi kayno nirqan: <<Qanyan tardi la ünami aliyashqa>>.
53Tsayno wilaptinmi tsay runa tantiyarqan Jesús tsay höra kayno nishqanta: <<Tsuriki aliyashqanami>>. Tsaymi wayincho kaqkunawan Jesúsman yärakärirqan.
54Judeapita Galileaman kutiykur tsay wamrata aliyätsishqanwanqa ishkay kutinami milagruta Jesús rurarqan.

Currently Selected:

Juan 4: qvmB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy