Éxodo 40

Sagrädu Tolduta ichitsipäkushqan

1Tsaypitanami Moisésta Tayta Dios kayno nirqan: 2<<Wata qalaykunan killa punta kaq junaqcho Tinkunantsi Sagrädu Tolduta ichitsinki. 3Tinkunantsi Toldu ruriman Pactu Babulta churaykur cortïnata churanki pipis babulta lutala mana rikananpaq. 4Mësatapis ruriman yaykarkatsir manëjunkunata jananman shumaq churanki. Candelabrutapis yaykarkatsir mechërukunata puntanman churanki. 5Inciensuwan qoshtatsinanpaq qori altartapis churanki Pactu Babulta tsaparaq cortïna nawpanman. Sagrädu Tolduman yaykuna cortïnatapis churanki.

6<<Nirkurna sacrificiuta rupatsina altarta Tinkunantsi Toldu yaykuna nawpanman churanki. 7Broncipita lavatoriutapis Tinkunantsi Toldupita altarman aywana chawpinman jamaykatsir tsayman yakuta winanki. 8Tsayta ruraykurna Tinkunantsi Sagrädu Toldupa patiunta cortïnawan intëru tumaqta tsapanki. Tsayman yaykuna punkuta tsaparänanpaq kaq cortïnatapis churanki.

9<<Lapanta kamakarkatsirna sagrädu aceitita winapanki Sagrädu Tolduman y lapan tsaycho kaykaqkunamanpis. Tsaynöpami lapanpis sagrädu kar noqapana kanqa. 10Tsaynöpis sagrädu aceitita winapanki sacrificiuta rupatsina altarman y manëjunkunaman. Tsaynöpami tsay altar sagrädu kanqa. 11Lavatoriuman y jamakunanmanpis sagrädu aceitita winapanki. Tsaynöpami sagrädu kanqa.

12<<Nirkurna Aarónta y tsurinkunata Tinkunantsi Toldu patiuman pushaykur armatsinki. 13Nirkur sagrädu röpata Aarónta jatiparkur sagrädu aceitita umanman winapanki. Tsawraqa noqata sirvimaq cüranami kanqa. 14Nirkur Aarónpa tsurinkunata qayaykur tünicata jatipanki. 15Papäninta winapashqaykinöla tsurinkunapa umanmanpis sagrädu aceitita winapanki. Tsaynöpanami paykuna y paykunapita miraqkunapis sirvimaq cürakuna imayyaqpis kanqapaq>>.

16 Tayta Dios nishqannölami lapanta Moisés rurarqan.

17Egiptupita yarqapäkamushqan wata cumplirkuptinmi mushuq wata qalaykunan killa punta kaq junaqcho Sagrädu Tolduta ichitsipäkurqan. 18Sagrädu Tolduta ichitsinanpaqqa puntata jawiräkunantaraqmi Moisés churatsirqan. Tsay jawiräkunanman marcukunata ichirkatsir traviskunata churatsirqan. Tsaynölami tushakunatapis ichirkatsir 19tsay jananman toldukunawan qatatsirqan. Nirkur tsay jananman janay janay wakin toldukunawan qatatsirqan. Tayta Dios nishqannölami lapan tsaykunata Moisés ruratsirqan.

20Nirkurnami Israel runakunawan Tayta Dios rurashqan pactuta#Éxo. 34.28. babul rurinman churarqan. Babul wintukuna qerukunatapis argöllankunapa pasarkatsir tsapananwan tsaparqan. 21Tsaypitanami Pactu Babulta aparqan Sagrädu Toldu ruriman. Tsayman churaykurmi mana rikakänanpaq cortïnata churarqan. Moisésta Tayta Dios nishqannölami lapan tsaykunata rurarqan.

22Tsaypitanami Tinkuna Tolduman mësata aparqan Pactu Babulta tsaparaq cortïnapa jukaq lädunman churananpaq. Tsaytami churarqan norti kaq läduman. 23Mësa jananman tantatapis churarqan Tayta Diospa nawpancho kananpaq. Moisésta Tayta Dios nishqannölami lapan tsaykunata rurarqan.

24Candelabrutapis Tinkuna Toldu ruriman apaykurmi mësa nawpan sur kaq läduman churarqan. 25Nirkur mechërukunaman atskita ratatsirqan Tayta Diospa nawpancho rataränanpaq. Moisésta Tayta Dios nishqannölami lapan tsaykunata rurarqan.

26Qoripita rurashqan altartapis Tinkuna Tolduman apaykurmi churarqan tsaparaq cortïnapa jukaq lädunman. 27Nirkurnami tsay altarcho ali asyaq#40.27 Wakin runakunaqa mushkuq nipäkun. inciensuwan qoshtatsirqan. Moisésta Tayta Dios nishqannölami lapan tsaykunata rurarqan.

28Tsaypitanami Sagrädu Tolduman yaykuna punkuman cortïnata churarqan. 29Nirkurnami sacrificiuta rupatsina altarta Moisés churarqan Tinkuna Toldu yaykunan nawpanman. Tsaychömi rupatsina sacrificiuta y tsaki mikuy ofrendatapis rupatsirqan. Moisésta Tayta Dios nishqannölami lapan tsaykunata rurarqan.

30Tsaypitanami lavatoriuta churarqan Tinkuna Toldupita altarman aywana chawpinman. Nirkur tsay lavatoriuman yakuta winatsirqan maylakärinanpaq. 31Tsay yakuwanmi Moisés, Aarón y Aarónpa tsurinkunapis makinta y chakinta maylakärirqan. 32Moisésta Tayta Dios nishqannölami paykunaqa imaypis tsayno maylakäriq Tinkuna Tolduman yaykunanpaq y altarman aywananpaqpis.

33Nirkurnami Sagrädu Toldupa patiunta cortïnawan tumariq tsapatsirqan. Tsayman yaykuna punkuta tsaparänanpaq kaq cortïnatapis churatsirqan. Tsaynömi Sagrädu Tolduta Moisés ichitsiyta usharqan.

Tinkuna Tolduman Tayta Dios chayashqan

Números 9.15-23

34Tinkuna Sagrädu Tolduta Moisés ichitsiyta usharkuptinnami pukutay tsapakurkuptin kikin Tayta Dios tsayman chayarqan.#1Rey. 8.10-11; Isa. 6.4; Eze. 43.4-5; Apoc. 15.8. 35Pukutay tsaparaptinmi Moisés yaykuyta mana kamäpakurqantsu.

36Sagrädu Toldupita pukutay sharkuptinnami Israel runakuna toldunkunata shuntarkur aywapäkuq. 37Pukutay mana sharkuptinqa jinalanchömi patsarpäkuq. 38Junaqpami Sagrädu Toldu janancho pukutay punuraq. Tsakaypanami Sagrädu Toldu janancho nina rataraq. Tsaytaqa lapan Israel runakunami rikapäkurqan. Pukutaypis ninapis tsayno karqan Israel runakuna chunyaq jirkapa purir Canaánman chayashqanyaqmi.#Éxo. 13.21-22.

Currently Selected:

Éxodo 40: qvmB

Highlight

Copy

Compare