1 Corintios 1
1
Carta qalaykunan
1Jesucristupa apostolnin kanäpaq Tayta Dios qayamashqa kaptinmi noqa Pablo wawqintsi Sósteneswan kay cartata apaykätsimü.
2Corinto markacho#Hech. 18.1. Tayta Dios kuyashqan wawqi panikuna: Qamkunapaqmi Tayta Dios kayno nirqan: <<Paykunaqa Jesucristucho santumi karkaykan>>. Tsayno kaptikimi qayashushqanki pay munashqanno santu kawapäkunaykipaq. Tsaynölami maycho taqkunatapis payman lapan yärakuqkunata qayashqa. Tsaymi Jesucristuqa paykunapapis y noqantsipapis Señornintsi kaykan. 3Papänintsi Tayta Dios y Señor Jesucristo kuyapäshushpayki ali kawapäkunaykipaq yanapaykuläshunki.
Tayta Diosta Pablo agradëcikushqan
4Tayta Diostami qamkunapita imaypis agradëcikü. Jesucristuwan juklaylano kaptikimi kuyapäshushpayki imaypis yanapaykäshunki. 5Lapanchöpis yanapashuptikimi tantiyakurkaykanki y ali wilakurkaykanki. 6Jesucristupa wilakuyninta chaskikunaykipaq yanapashushqaykinölami kananpis yanapaykäshunki. 7Tsaymi Señor Jesucristo kutimunanyaq shuyarpaptiki ima yachaynikikunapis pishïshunkitsu. 8Paymi yanapaykäshunki kutimur pay munashqanno kawaykaqta tarishunaykipaq. 9Tayta Diosqa promitishqanta imaypis cumplinmi. Paymi Tsurin Señornintsi Jesucristuwan juklaylano kawapäkunaykipaq qayashushqanki.
Juk shonqula kawananpaq yachatsishqan
10Wawqi panikuna, Señor Jesucristupa jutinchömi ruwakü mana apänakuypa juk shonqula y juk yarpayla kawapäkunaykipaq. 11Panintsi Cloépa aylunkuna shamurmi wilamashqa kikikikunapura chikinakur y rimanakur kawarkaykashqaykita. 12Wakinnikishi noqata qatirämashqaykita nirkaykanki, wakinnikishi Apolusta#Hech. 18.24. qatirashqaykita nirkaykanki, wakinnikishi Cefasta#1.12 Cefasqa Pedrupa jukaq jutinmi karqan. qatirashqaykita nirkaykanki y wakinnikinashi Jesucristuta qatirashqaykita nirkaykanki.
13Tsayno nirqa manakaqkunatami nirkaykanki. ¿Jesucristuqa atskaman rakikashqatsuraq kaykan? ¿Noqatsuraq qamkuna rayku cruzcho wanushqä? ¿Noqapa jutïchötsuraq bautizakärishqanki? 14Tayta Diostami agradëcikü qamkuna kaqcho kar Crisputa#Hech. 18.8. y Gayulata#Hech. 19.29; Rom. 16.23. bautizashqäpita. 15Tsayno kaptin manami mayqanikipis nipäkunkimantsu noqapa jutïcho bautizakushqaykita. 16Tsaynöpis Estéfanaspa#1Cor. 16.15. aylulantami bautizashqä. Tsaypita mastaqa manami pita bautizashqätapis yarpätsu. 17Manami runakunata bautizar purinäpaqtsu Jesucristo kachamashqa, sinöqa ali wilakuyninta wilakur purinäpaqmi. Wilakuyninta wilakurqa manami yachaq kashqäta runakuna yarpänanpaqtsu wilakü. Yachaq tukur wilakurqa Jesucristo cruzcho wanushqantami manakaqman churäman.
Jesucristupa wilakuyninta chaskikuqkunata Tayta Dios salvashqan
18Jesucristo cruzcho wanushqanta wilakuptïmi infiernuman qaykushqa kananpaq kaqkunaqa nipäkun manakaqkunata wilakushqäta. Tsayno niptinpis salvashqa kaqkunapaqqa tsay wilakuy Tayta Diospa poderninmi kaykan.#Rom. 1.16. 19Tayta Diospa palabranchöpis kaynömi qelqaraykan:
<<Yachaq runakunapa yarpayninkunatami upatakätsishaq.
Tantiyakuqkunatapis manana tantiyakärinanpaqmi pantakätsishaq>>.#Isa. 29.14.
20Tsayno kaptinqa yachaqkuna yachashqanpis ¿imapaqtaq välin? Ley yachatsiqkuna yachashqanpis ¿imapaqtaq välin? Kay patsacho yachaqkuna apänakushqanpis ¿imapaqtaq välin?#Job 12.17; Isa. 19.12. Jesucristuta mana chaskikuq runakuna yachashqanpis Tayta Diospaqqa manakaqlami kaykan.#Isa. 44.25. 21Paymi yachaq kar kamakätsirqan runakuna mayjina yachaq karpis payta mana reqipäkunanpaq. Tsaymi wilakuynin manakaq kashqanta yarpapäkuptinpis wilakuyninta chaskikuqkunataraq salvan.
22Israel runakunaqa Jesucristuta chaskikärinanpaq milagrukunataraqmi rikayta munapäkun. Griego runakunanami munapäkun yachaqkuna nishqanno Diospa wilakuynin kananta. 23Tsayno munaptinpis noqakunaqa Jesucristo noqantsi rayku cruzcho wanushqantami wilakärï. Tsayno wilakäriptïmi Israel runakuna rabyakärin.#1.23 Israel runakuna yarparqan Dios kachamushqan Cristo imayyaqpis mandaq kananpaq kashqantami. Wanushqanta wilakäriptinmi rabyakärirqan. Mana Israel runakunanami manakaqkunata wilakushqäta yarpapäkun. 24Tayta Dios qayashqan kaqkunami itsanqa Israel runa karpis y mana Israel runa karpis tantiyakärin Jesucristo Tayta Diospa podernin y yachaynin kashqanta.#1.24 Jesucristo Tayta Diospa podernin kashqanta nirqa Jesucristuta chaskikuqkunata Tayta Dios munayninwan salvashqantami niykan. Jesucristo Tayta Diospa yachaynin kashqanta nirqa Jesucristo cruzcho wanushqanpita payta chaskikuqkunata Tayta Dios salvashqantami niykan. 25Tsaymi wilakushqä upa runakunalapaq kashqanta yarpapäkuptinpis mas ali kaykan yachaq runakunapa yarpayninpitapis. Tsaynömi Jesucristo cruzcho wanushqanta manakaqman churaptinpis payman yärakuqkunataqa Tayta Dios munayninwan salvaykan.
26Wawqi panikuna, Tayta Dios qayashushqayki witsan imano kashqaykitapis yarpapäkuy. Qamkunaqa juk ishkaylami yachaq karqayki, juk ishkaylami munayniyuq karqayki y juk ishkaylami rïcu karqayki. 27Mana yachaq kashqaykita runakuna yarpaptinpis qamkunatami Tayta Dios akrashushqanki yachaqkuna tantiyakur penqakärinanpaq. Tsaynölami munayniynaq kashqaykita yarpapäkuptinpis Tayta Dios akrashushqanki munayniyuq runakuna tantiyakur penqakärinanpaq.#1.27 Manami yachaq kashqanpitatsu ni munayniyuq kashqanpitatsu runakunata Tayta Dios salvan, sinöqa Jesucristuman yärakushqanpitami. Tsayta tantiyarmi runakuna penqakärinqa yachaq kashqanman y munayniyuq kashqanman atiënikushqanpita. 28Manakaqman churashqan runakunata salvananpaq Tayta Dios tsayno akraptinmi musyantsi pipis yachaq kashqanpitaqa ni munayniyuq kashqanpitaqa mana salvakunanpaq kashqanta. 29Tsayno kaptinqa Tayta Diospa nawpancho manami pipis alabakunqatsu.
30Qamkunataqa Jesucristucho kanaykipaqmi Tayta Dios salvashushqanki. Noqantsi raykumi Jesucristuta Tayta Dios churarqan yachaynintsi kananpaq, salvamaqnintsi kananpaq, perdonamaqnintsi kananpaq y rantimaqnintsi kananpaq. 31Tsayno kaykaptinqa ama alabakushuntsu. Tayta Diospa palabranchöpis kaynömi qelqaraykan: <<Pipis alabakunanpa trukanqa Tayta Diosta alabatsun>>.#Jer. 9.23-24.
Currently Selected:
1 Corintios 1: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.