ROMANOS 1
1
Alillachu capanguichi nishcami
1Jesucristota servij Pablomi cani. Paimanda villachun cachashcami cani. Taita Diosmanda ali villaita villachun, shicanyachi tucushcami cani.
2Chashna villanataca Diosca pundallatami, pai ima nishcata villajcunahuan villachishpa, jucha illaj Shimicunapi escribichishca carca. 3Chai Shimipimi Diospaj Churi, ñucanchi Apunchi Jesucristomanda villajun. Paica, runa aichayu cashcamandaca, Davidpaj miraimi carca. 4Paica, Taita Diospaj Churipachami, paica ninan ushaita charijmi ni tucurcami. Paica, huañushca puracunamanda causarishpami, Diospaj jucha illaj Espiritumanda shina ni tucurca. 5Paimandami Diospaj ninan juyaitapash, villachun cachai tucunatapash chasquircanchi. Tucui llactacunapi causajcuna, paipaj shutita juyashpa, paita crishpa cazunajuchunmi, villachun cacharca. 6Paicuna purapica, cangunapashmi Jesucristopaj causangapaj cayai tucushcacuna canguichi.
7Roma pueblopi tucuilla causanajuj cangunamanmi escribimuni. Cangunaca, Taita Dios juyashcacunami canguichi. Paipajlla causanajuchun cayai tucushcacunami canguichi. Ñucanchi Taita Diospash, Apunchi Jesucristopash ninan juyaita, casilla ali causaiguta cangunaman carachunmi munani.
Roma pueblomanmi, Pabloca ringapaj munashca
8Pundaca, ñuca Taita Diostami cangunamandaca Jesucristopi pashi nijuni: Canguna alipacha cazushpa crishpa catinajujtaca, tucui cai pachapimi uyanajun. 9Diosta ñuca mañajushpaca na cungashpami, cangunamandapash mañajuni. Chaitaca, Taita Diosllata yachapanmi. Paita tucui shunguhuan servijushpami, paipaj Churimamdaca na shaijushpa, ali villaita villajuni. 10Shinallata Taita Diospaj munai cajpica, imashnallapash cunanllata cangunata ricungapaj rishpa ali chayangapaj munashpami, ninanda mañajuni. 11Canguna ashtahuan shinllitapacha catichun, Diospaj Espíritu ñucaman imaguta caramushcatapash yarichingapajmi, cangunataca ricungapaj munani. 12Cangunapash, ñucapash paitallata crij cashpami, ashtahuan aliguta catingapaj, shujmanda shujmanda yarichirinajungapaj shamunata munani.
13Ashtahuangarin huauquicuna, panicuna, cangunapajman shamungapaj cutin cutin munajushcataca yachachunmi munani. (Shina cashpapash cunangamanmi jarcai tucushcani). Caishuj na israelcunapipash, canguna purapishnallata granota fucuchinshna mirachingapajmi munani. 14Griego nishca gentecunamambash, na griegocunamambash, alipacha yachajushcacunaman, na yachajushca gentecunamambash villanatapachami charini. 15Shinamandami, Roma pueblopi causaj cangunamambash, ali villaita villangapaj ninanda munajuni.
Ali villaica, ninan ushaitami charin
16Ali villaita villanataca, na pinganayachinichu. Ali villaica, maijan crijpipash quishpichingapajmi, Taita Diospaj ushaita charin. Pundaca, Judea llactamanda gentetarami quishpichin, shinallata griego gentetapashmi quishpichin. 17Ali villaica, crishcamandami imatapash cashcatapacha rurashcatashna Taita Dios chasquinata, ashtahuan crishpa catichun ricuchijun. Shinallata crishpa causanatapashmi ricuchijun. “Ashtahuangarin imatapash cashcatapacha ruraj runaca, crishcamandallami causanga” nishpami, escribishcapica villajun.
Tucui gentecunami juchata rurashca
18Taita Dios ninanda fiñarishcataca, jahua pachamandami ricuchimujun. Paita na manllajcunata, imatapash cashcatapacha na rurajcunata fiñashpa llaquichinatami ricuchimujun. Paicunaca, na llullashpa villajuj shimitami, imatapash cashcatapacha na rurashpa jarcanajun. 19Ashtahuangarin Taita Diosmanda imatami yachan, chaitaca Taita Diosllata ricuchijpimi yachan. 20Diosca, causaita causaicaman ninan ushaita charij cajta, Diospacha cajtaca, pipaj ñavipi na ricurinallataca, cai pachata pai rurashcamandapachami aligutapacha ricuchijun. Chaita tucui imatalla rurashcacunata ricuchishpami entendichishca. Shinamandami, na yachashcanichu nitaca na ushan. 21Paicunaca, Taita Diostaca rijsircami. Shina rijsishpapash, Taita Diostashnaca na punchapambagumi cangui ninajurcachu, pashi nitallapash na ninajurcachu. Ashtahuangarin paicunapaj yuyaicunapash yangacuna tucushpami, paicunapaj shinlli shungupash yanayashcashna tucurca. 22Alipacha yachajushcami canchi ninajushpapash, paicunaca shinlli shungumanmi tigrarca. 23Shina cashpami, na tucurij punchapamba Taita Diosta alicachinapaj randica, huañuna genteman rijchajta, jahuata purij alasyu animalcunata, chuscu chaquita charij animalcunata, llucajuj animalcunatara alicachinajurca.
24Chaimandami, paicunapaj shungu munashca mapacunata rurashpa causanajuchun, Taita Diospash saquirca. Shinamandami, paicuna purallata paicunapaj cuerpocunata huaglichishpa causanajurca. 25Shina cashpami, Taita Diospaj na llullaj Shimita catinajushcata saquishpa, llullatara catinajurca. Tucuita Ruraj Diosta alicachinapaj randica, Diosllata rurashcacunatarami alicachinajurca. Diosca, causaita causaicaman ninanda alicachi tucunatami charin. Shina cachun.
26Chashna nalicuna cajpimi, pinganayai nali munaicunata rurachun, Taita Diosca saquirca. Chaimandami paicunapaj huarmicunaca, jarihuan causanapaj randica, pai purallata nalita rurashpa causanajurca. 27Shinallatami jaricunapash, huarmihuan causanataca saquishpa, jari purallata paicunapura nina japirinshna munarinajushpa jatun nali pinganayaita ruranajurca. Chashna nalita ruranajushpami, cuna cashcata cujpi paicunallata chingagrinata japinajun.
28Paicunallata Taita Diosta catingapaj na munajpimi, paicunapaj yuyaipi yarishcata rurashpa causanajuchun, Taita Diosca saquirca. Napash ruranacunatara ruranajuchunmi saquirca. 29Paicunaca, imatapash cashcatapacha na rurashpa, huainayashpa, jatun nalita rurashpa, charijyashpa, imatapash nalitalla rurashpa causana, munaicunahuan jundacunami. Paicunaca, shujcuna imata charishcacunatapash ñucapaj cashcanman yashpa ricujcuna, huañuchijcuna, paicunapura fiñanajujcuna, umachijcuna, imatapash nalitalla yarijcunami. 30Shujcunata huasha parlajcuna, Taita Diostapash na ricunayachijcuna, nalicachishpa rimajcuna, jariyashpa jatun tucujcunami. Nalita ruranatalla ashtahuan mushujta yarijcuna, taitata mamatapash na cazujcunami. 31Shinlli shungucuna, mandashcatapash napacha cazujcuna, pitapash na juyajcunami. Fiñanajushpapash napacha ali tucujcuna, pitapash na llaquijcunami. 32Taita Dios llaquichinata ali yachashpata chashna nalicunata rurajcunaca, huañushpa chingagrinatapachami charin. Na chashna rurajcunalla chingagringachu, ashtahuangarin chashna ruranajujpi alicachishpa cushijujcunapashmi chingagringa.
Currently Selected:
ROMANOS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.