MARCOS 1
1
Bautizaj Juanmi villajushca
(Mat. 3:1-12; Luc. 3:1-9,15-17; Juan 1:19-28)
1Taita Diospaj Churi Jesucristomamda ali villaica, cashnami callarirca: 2Profeta Isaías escribishca shimipimi, cashna nijun:
“Ricui, ñucamanda villajtami canda ñaupashpa richun cachani.
Paimi, cambaj punda rishpa, can purina ñandaca alichijunga.
3Jichushca pambapi caparij runaguca, cashnami nin:
‘Jatun Diosman, ñanda alichipaichiyari.
Quingu quingu chaqui ñangunatapash derechapaichiyari’ ninmi” nijushcami.
4Shina nishcashnami Juanga, jichushca pambapica, gentecunata bautizajurca. Paicunamanmi cashna villajurca: “Juchayu cashcamanda ninanda llaquirishpa Diospajman tigrarichi, bautizarichi. Shina rurajpica Diosmi, cangunapaj juchacunata anchuchinga” nishpami villajurca. 5Shina villajujpimi, Judea llactapi tucui causajcunapash, Jerusalenbi tucui causajcunapash, Juanbajman shamunajurca. Paicunataca, paicunapaj juchacunata villajpimi Juanga, Jordán shuti jatun yacupi bautizajurca.
6Juanga, camello animalpaj milmata rurashca churajunata churajushca, cara chumbita chumbilishcami carca. Paica, langosta nishca jurucunata, sachapi tiaj balun mishquita micushpami causajurca. 7Cashna nishpami villajurca: “Ñucapaj jipa shamujmi, ñucata yali ninan ushaita charin. Shina cajpimi ñucaca urai cumurishpa, paipaj chaquipi churajushpa huatarishcata pascaitallapash na ushana cani. 8Ñucaca, yacuhuanllami cangunataca bautizajuni. Ashtahuangarin ñucapaj jipa shamujmi cangunataca, Diospaj jucha illaj Espirituhuan bautizanga” nijurcami.
Jesusta bautizashcatami villajun
(Mat. 3:13-17; Luc. 3:21-22)
9Chai punllacunapimi, cashna tucurca: Galilea llactapi tiaj Nazaret shuti pueblomandami Jesusca, Jordán yacupi bautizajuj Juanbajman shamurca. Chaipimi Jesusca bautizarirca. 10Yacumanda Jesús llujshijushpaca, jahua pacha ñapash pascarijtami ricurca. Shinallata Diospaj Espiritutapash, palomagushna paipaj uma jahuaman urai shamujtami ricurca. 11Jahua pachamandapash, cashna rimajmi uyarimurca: “Canga, ñuca juyashca Churigumi cangui. Canmandami ninanda cushijuni” nijmi uyarirca.
Jesusmanmi, diabloca nali yuyaita cujushca
(Mat. 4:1-11; Luc. 4:1-13)
12Chai jipallami, Diospaj Espirituca jichushca pambaman Jesustaca pusharca. 13Chai jichushca pambapimi, chuscu chunga punllacaman millai animalcunapaj chaupipi causajurca. Chaipimi Satanasca, Jesusman nali yuyaita cujurca. Chaipica angelcunapashmi, Jesusta servinajurca.
Jesusca, Diospajta rurai callarishcami
(Mat. 4:12-17; Luc. 4:14-15)
14Prezuna huasipi Juanda churashca jipaca Jesusmi, Galilea llactaman shamushpa, Taita Dios mandajujmanda ali villaita villajurca. 15Paica cashnami nijurca: “Chai juyailla punllacunaca, ña pactamushcami. Juchayu cashcamanda ninanda llaquirishpa, Diospajman tigrarichi. Cai ali villaitaca, crinami canguichi. Taita Dios mandanaca, ñami pactamushca” nijurcami.
Jesusca, pijita japinajuj chuscu runacunatami cayashca
(Mat. 4:18-22; Luc. 5:1-11)
16Jesusca, Galilea cucha manñata yalijushpami, pijita japishpa causaj Simón, Andrés shuti ishcai huauqui puracuna, pijita linllihuan japinajujta ricurca. 17Paicunatami cashna nirca:
—Ñucata catihuaichi. Pijita japinshna gentecunata tandachimuchunmi, cangunataca yachachisha— nircami.
18Shina nijpimi, pijita japinajushca linllicunata saquishpa, Jesusta catishpa rinajurca.
19Jesusca, chaimanda ashaguta rishpallami Jacobohuan, Juanhuan huauquipura barcopi linllicunata alichishpa tianajujta ricurca. Paicunaca, Zebedeo shuti runapaj churicunami carca. 20Paicunaca, Jesús cayajpimi, paicunapaj taita Zebedeotaca, pijita japishpa ayudajcunahuan canoapi saquishpa, Jesusta catishpa rinajurca.
Mapata rurachij aya jundashca runamandami villajun
(Luc. 4:31-37)
21Chaimanda rishpaca, Capernaum shuti pueblomanmi chayanajurca. Chaipimi, samana punlla chayajpica, tandanajuna huasiman rishpa yachachijurca. 22Jesusca, mandashca shimita yachachijcunashnaca na yachachijurcachu. Ashtahuangarin yachachina ninan ushaita charishpa yachachijujpimi, gentecunaca manllarishpa uyanajurca. 23Paicuna tandanajuna huasipica, mapata rurachij aya jundashca shuj runami tiajurca. Paimi ninanda caparishpa, 24cashna nirca:
—¡Aij! Nazaret pueblomanda Jesús. Canga, ¿imapajta ñucanchitaca fiñachingapaj shamungui? ¿Ñucanchita tucuchingapajchu shamurcangui? Canga, Taita Dios cachamushca Jucha Illaj cajtaca rijsinimi— nircami.
25Shina nijujpimi, chai ayataca:
—¡Upallai, chai runamandaca llujshishpa ri!— nishpa Jesusca, shinllitapacha rimarca.
26Shina nijpimi, chai runataca chujchuchishpa, ninanda caparichishpa mapata rurachij ayaca llujshirca. 27Shina llujshijpimi, gentecunaca ninanda manllarishpa, paicunapura cashna ninajurca:
—¿Caica imata tucun? Cai runaca, nara uyashca shuj mushujtamari yachachijun. Ninan ushaitamari charin. Mapata rurachij ayacunatapash llujshi nijpica, cazushpa llujshinllashnaca— ninajurcami.
28Jesús chashna rurashcataca, tucui Galilea llactapimi ñapash yachanajurca.
Pedropaj suedratami, Jesusca alichishca
(Mat. 8:14-15; Luc. 4:38-39)
29Tandanajuna huasimanda llujshishpaca Jacobotapash, Juandapash pushashpami Jesusca, Simonbaj, Juanbaj huasiman chayarca. 30Chai huasipica, Simonbaj suedrami, tabardillo ung:uihuan sirijurca. Jesús chayamujhuanmi, chai mamagu huañujushcataca villanajurca. 31Shina villajpimi Jesusca, chai huañujujpajman chayashpa, maquimanda aisashpa jatarichirca. Shina jatarijpimi, tabardillo ung:uica ñapash yalirca. Ali tucushpaca, paicunaman micunaguta cararcallami.
Indi ña huashajujpimi, ashtaca huañujujcunata alichishca
(Mat. 8:16-17; Luc. 4:40-41)
32Chai chishillatami, indi ña huashajushca jipaca, huañunajuj gentecunata, aya jundashca gentecunatapash, tucuillata Jesuspajman apamunajurca. 33Chai pueblopi causajcunaca, tucuicunami maipi Jesús tiajuj punguman llapiri jundamurca. 34Chaipimi, shuj shuj ung:uihuan huañujujcunataca, ashtacacunata Jesusca alichijurca. Shinallata ashtaca ayacunatapashmi, ashtaca gentecunamanda llujchijurca. Ayacunaca, Jesustaca maijan cajtapash rijsircami. Shina cajpimi ayacuna rimachunga, na saquirca.
Galilea llactapimi, Jesusca villashpa purijushca
(Luc. 4:42-44)
35Jesusca, nara ali punllayajpillata tutamandata jatarishpami, chai pueblomandaca llujshishpa rirca. Paica, jichushca pambaman rishpami, Diostaca mañajurca. 36Shina rishcapimi Simonga, paipaj cumbacunandi Jesusta mascajurca. 37Paita tarishpaca:
—Tucuicunami candaca mascanajun— nishpami villanajurca.
38Shina villajpimi Jesusca, paicunataca cashna nirca:
—Cai ladolla llactacunaman jacuchi, villanguichi. Chaipajmi shamurcani— nircami.
39Galilea llactapica, tucuillapi purijushpami, tandanajuna huasicunapi Jesusca villajurca. Shinallata aya jundashca causanajuj gentemandapashmi, ayacunata llujchijurca.
Lepra ung:uihuan huañujuj runatami, Jesusca alichishca
(Mat. 8:1-4; Luc. 5:12-16)
40Lepra ung:uihuan huañujuj runami, Jesuspajman shamushpa cungurishpaca:
—¿Nacha alichihuanguiman?— nishpa, ninanda mañajurca.
41Shina nijujpimi chai runataca, ninanda llaquishpa Jesusca, maquita chutashpa tacarishpa:
—Ari, alichishallami. Cunanga, ñami ali cangui— nirca.
42Shina nijpimi lepra ung:uica ñapash anchurijpi, chai runaca ali tucurca. 43Chai runataca Jesús cayacaman nishpaca, shinllitapachami cashna nijurca:
44—Ricui, pimambash imatallapash ama villanguichu. Ashtahuangarin curapajman rishpa ricuchigri. Lepra ung:uimanda mapata anchuchi tucushcataca paicuna ricuchunga, Diosman cuchun Moisés mandashcashna cugri— nijurcami.
45Ashtahuangarin Jesús ña rishca jipaca, paita imashna alichishcataca, chai runaca tucuicunamanmi villai callarirca. Gentecuna ña yachajpimi, maijan puebloman yaicuitapash Jesusca na usharca. Shinamandami, jichushca pambacunallapi purijurca. Ashtahuangarin tucui ladocunamandami, Jesuspajman shamunajurca.
Currently Selected:
MARCOS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.