MALAQUÍAS 1
1
Mandaj Diosca, Jacobotami juyashca
1Israelcunata llaquichinata Mandaj Dios villashca shimicunatami, Malaquiasta villachishca.
2Mandaj Diosca: “Cangunatami ñucaca juyarcani” nircami. Ashtahuangarin cangunaca: “¿Imashnata ñucanchitaca juyarcanguiyari?” nircanguichimi. “Esaú runaca, ¿nachu Jacobopaj huauqui carca? Shina cajpipash, Jacobotallami juyarcani” ninmi Mandaj Diosca. 3“Esaú runataca fiñarcanimi. Chaimandami, Esaú causana urcucunataca, llaquinayaita tucuchircani. Paipaj alpacunatapash, jichushca pambacunapi causaj chacal nishca animalcuna causachunmi rurarcani” ninmi.
4Edom llactapi causajcunaca, cashnami ninajunga: “Ñucanchica, imagupash illajmari canchi. Shina cashpapash tucuilla urmachi tucushcataca, cutinmi shayachishun” ninajungami. Shinamandami tucuita Mandaj Diosca, cashna nin: “Paicuna shina ninajujpica, paicuna cutin shayachijpipash, ñucami cutin urmachisha. Shina urmachijpimi, cashna ninajunga: ‘Diosta na manllaj llactami. Causaita causaicaman, Mandaj Dios fiñashca gentecunami’ ninajungami. 5Chashna rurajtaca, cangunapaj ñavihuambacha ricushpami, cashna ninguichi: ‘Mandaj Diostaca, Israel llacta linderocunata yalishpa causajcunapash jatunyachinajuchun’ ninguichimi” ninmi.
Mandaj Diosca, curacunatami jarcashpa rimashca
6Curacuna, tucuita Mandaj Diosca, cangunatami cashna nin: “Huahuaca, paipaj taitata alicachinmi. Shinallata amota servijpash, paipaj amota manllanmi. Shina cashpaca ñuca, cangunapaj taita cajpica, ¿imashpata na alicachihuanguichi? Ñuca cangunapaj amo cajpica, ¿imashpata na manllahuanguichi? Cangunaca, ñuca shutita yangapi churashpa rimashpapash: ‘¿Imashnata cambaj shutitaca, yangapi churanchiyari?’ ninguichimi. 7Cangunaca, mapa tandacunata apamushpa, ñuca altar jahuapi rupachishpapash: ‘¿Ñucanchica, candaca imapita na cazunchiyari?’ ninguichimi. Cangunaca, ñuca mezatapash, yangapi churanallami yanguichimi. 8Ñausa animalta ñucaman carashpa huañuchinajuchun cushcapash, ¿cangunapica alichu? Shinallata jangata cashpa, ungushcata cashpa ñucaman carashcapash, ¿cangunapica alichu? Ali cajpica, chashna animalcunata cangunata mandajman caragrichilla. Shina carajpica, ¿candaca alicachingachu, na cashpaca, chai carashcataca chasquingachu? Tucuita Mandaj Dios ñucami, chashna nini. 9Cunanga: ‘Taita Dios ñucanchiman alita rurachun, ñucanchita llaquichun mañapaichiyari’ ninimi. Ashtahuangarin chashna nalicunatalla ruranajushpaca, ¿imashnashi cushichihuanguichi? ninimi. Tucuita Mandaj Dios ñucami, chashna nini. 10Ñuca altar jahuapi ama yanga rupachij shamuchunga, canguna puramandallata ñuca huasi punguta vichajcunaca, ¿pita tianguichiyari? Ñucaca, cangunapica napacha cushijuita charinichu. Canguna imata caranatallata carajpipash, napacha chasquishachu. Tucuita Mandaj Dios ñucami, chashna nini. 11Ñuca shutica, llacta puracunapica indi llujshimuj ladomanda, indi huashajuj ladocamanmi jatumbacha. Chaimandami maipi cashpapash, inciensota, mapa illaj ashtahuan imatalla caranacunataca, ñuca shutipi caranajun. Ñuca shutica, tucui llacta puracunapica jatumbachami. Tucuita Mandaj Dios ñucami, chashna nini. 12Cangunaca: ‘Mandaj Diospaj mezapash mapami, paipaj micunapash na munanayaimi’ nishpami, yangapi churarcanguichi. 13Cashnatapashmi nircanguichi: ‘¡Mandaj Diosman imata carajushpapash, ñami shaijunchi!’ nishpami, ñucata yangapi churarcanguichi. Tucuita Mandaj Dios ñucami, chashna nini. Cangunaca shuhuashcata, suchuta, ungushca animalcunata apamushpami, ñucaman cararcanguichi. ¿Chaitaca, cangunapaj maquimanda chasquinallachu cani? Mandaj Dios ñucami, chashna nini. 14Ashtaca llama purapi jari llamacunata charishpapash carashami nishpa umachishpalla, nali animaltara Mandaj Dios ñucaman carashpa huañuchijcunaca, imapash tucushpachari ali canman. Ñucaca, jatun mandajcunatapash yali Jatun Mandajmi cani. Ñuca shutica, tucui llactacunapi causajcuna manllana shutimi” ninmi tucuita Mandaj Diosca.
Currently Selected:
MALAQUÍAS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.