JONÁS 1
1
Jonás runaguca, Mandaj Diospaj ñaupajmandami pacajushpa rishca
1Mandaj Diosca, Amitai shuti runagupaj churi Jonás runamanmi, cai shimicunata cashna nishpa villarca: 2“Jatarishpa ri, chai jatun Nínive pueblopi causajcunaman, paicunata llaquichinata villagri. Paicuna nalita rurashcacunaca, ñami ñuca ñaupajman vichai chayamushca” nircami.
3Shina nijpimi Jonasca, Mandaj Diospaj ñaupajmanda Tarsis shuti puebloman pacajushpa ringapaj jatarishpa, Jope shuti puebloman urai rijurca. Chaipimi, Tarsis puebloman rijuj barcota japishpa, chai barcopi culquita cushpa, Tarsis puebloman paicunahuan ringapaj yaicurca. Paica, Mandaj Diospaj ñaupajmanda caruman ringapajmi, shina yaicujurca. 4Ashtahuangarin Mandaj Diosca, ninan huairatami mama cuchaman cachamurca. Shinamandami mama cuchapica, barcopash faquirishpa tucuringatashna ninan huairahuan tamiajurca. 5Chaimandami barcota purichijcunaca, ninanda manllarishpa, paicunapaj diosta caparishpa, tucuicuna mañanajurca. Shinallata barco fangalla tucushpa ama huashajuchunmi, barcopi ima tiashcatapash yacuman shitanajurca. Ashtahuangarin Jonasca, chai barcopi imatapash alichina ucuman uriajushpami, ninanda puñujushca carca. 6Shina puñujujpimi, chai barcota purichijcunata mandaj runaca, paipajman quimirishpa cashna nirca:
—¿Imashpata puñujunguilla? Jatarishpa, cambaj Taita Diosta caparishpa mañai. Imashpapash ñucanchita pai llaquijpica, napash huañuringachu— nircami.
7Shinallata tucuicunami, paicunapaj cumbacunata cashna ninajurca:
—Pimandami cai llaquicunaca shamushca. Suerteta rurashpa yachangapaj shamuichi— ninajurcami.
Suerteta rurajpica, Jonás runapajpimi chai suerteca urmarca. 8Chaimandami paicunaca, cashna ninajurca:
—Cunanga villailla. ¿Imashpata cai llaquicunaca shamun? ¿Imatata rurashpa causangui, maimandata shamungui? ¿Maijan llactamandata cangui, maijan purata cangui?— ninajurcami.
9Shina nijpimi Jonasca, cashna nishpa tigrachirca:
—Ñucaca, hebreo purami cani. Jahua pachapi causaj Mandaj Taita Diostami cazushpa causani. Paica, mama cuchatapash, cai pachatapash ruraj Taita Diosmi— nircami.
10Chaimandami chai runacunaca, ninanda manllarinajurca. Shinallata Mandaj Diospaj ñaupajmanda pacajushpa rijushcatapashmi, paicunaca yacharca. Chaitaca, paillatami villashca carca. Chaimandami:
—¿Imapajta chashna rurarcangui?— ninajurca.
11Chai mama cuchaca, ashtahuan ashtahuan shinlliyashpa cuyujujta ricushpami:
—Cunanga, cai yacu casilla tucuchunga, ¿candaca imatata rurashun?— ninajurca.
12Shina nijpimi Jonasca, cashna nishpa tigrachirca:
—Ñucata japishpa, mama cuchaman shitahuaichi. Chashna rurajpillami, mama cuchaca casilla tucunga. Ninan huairahuan cai tamiapash, ñucamanda cangunata cashna llaquijujtami yachani— nircami.
13Shina nijpimi chai runacunaca, barcota alpaman llujchishun yashpa, ashtahuan shinllita purichinajurca. Chai mama cuchaca, ashtahuan ashtahuan shinlliyashpa cuyujujpimi, alpaman llujchitaca na ushanajurca. 14Chaimandami chai runacunaca, cashna nishpa Mandaj Diosta caparishpa mañanajurca: “Mandaj Dioslla, cai runamandaca ama ñucanchitapash huañuchinguichu nishpami, ninanda mañapanchi. Ima nalitapash na ruraj cai runapaj yahuarmandaca, ama ñucanchitapash juchachinguichu. Mandaj Dioslla, can imata rurangapaj munashcatami rurashcangui” ninajurcami.
15Chai jipami Jonastaca japishpa, mama cuchaman shitarca. Shina shitajpimi mama cuchaca, ninandapacha shinlliyashpa cuyujushpapash, casilla tucurca. 16Chaita ricushpami chai runacunaca, ninanda manllarinajurca. Chaimandami animalta huañuchishpa, Mandaj Diosman cunajurca. Paicunaca, ashtahuan imagutapash carashunrami ninajurcami.
17Ashtahuangarin Mandaj Diosca, Jonasta langachunmi, shuj jatun pijita ña charirca. Chai piji langajpica, quimsa punlla quimsa tutatami, pijipaj vijsa ucupi carca.
Currently Selected:
JONÁS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.