DANIEL 1
1
Danielca, paipaj cumbacunandimi, Babiloniapi causajushca
1Judá llactata jatun mandaj Joacim shuti runaca, ña quimsa huatata mandajujpimi, Babilonia llactata jatun mandaj Nabucodonosor shuti runaca, Jerusalenman shamushpa, chai pueblota chaupipi churarca. 2Jatun Diosca, Judá llactata jatun mandaj Joacim runatapash, pai Taita Diospaj huasipi imatalla charishcacunatapashmi shuj ashataca, Nabucodonosor runapaj maquipi churarca. Chaicunataca, Sinar shuti llactaman apamushpami, paipaj diospaj imatalla charishcacunata alichishca tiajuj ucupi alichirca. 3Jatun mandajca, eunuco nishca paipaj runacunata mandaj Aspenaz shuti runatami, cashna nirca: “Israel puramandaca, jatun mandajpaj mirai mandajcunapaj churicunata apamungui. 4Imapash na huagli, ali ñavi, tucui ali yachaicunatapash yachachi tucushca, ima yachajunacunatapash alipacha yachajushca, ali yuyaita charij huambracunata apamungui. Shinallata jatun mandaj mandashpa tiajuna huasipi imata ruraitapash ushanallacuna cachun. Paicunataca, ñucanchi caldeocunapaj letracunata, rimaitapashmi yachachina” nircami. 5Jatun mandaj Nabucodonosor runaca, pai jatun mandajpaj micunatallata, pai ufiana vinotallatami, punllandi paicunaman carachun mandarca. Quimsa huatacaman chashna charishca jipaca, pai jatun mandajpaj ñaupajman pushamuchunmi mandarca.
6Chai agllashca purapica, Daniel, Ananías, Misael, Azarías shuti huambracunapashmi carca. Paicunaca, Judá runapaj mirai purami carca. 7Paicunatami, eunucocunata mandaj runaca, shuj shuticunahuan shutichirca. Danieltaca, Beltsasar shutita, Ananiastaca, Sadrac shutita, Misaeltaca, Mesac shutita, Azariastaca, Abed-nego shutitami shutichirca. 8Danielca, paipaj shungupica, jatun mandajpaj micunahuan, pai ufiana vinohuanga, napacha mapayashachu yajurcami. Chaimandami, eunucocunata mandajtaca: “Cai micunacunata micushpaca mapayashami, micuchun ama mandahuaichu” nirca. 9Danieltaca, Taita Diosllatami eunucocunata mandajpaj ñaupajpi ali ricurichun, juyashpa chari tucuchun churarca. 10Chaimandami eunucocunata mandajca, Danieltaca cashna nirca:
—Ñuca amo jatun mandajtami manllani. Paimi, cai micunatapash, vinotapash cangunaman punllandi carachun mandahuarca. Caishuj huambracunapash, cangunaman rijchajcunami. Shina cashcamandaca, paicunata yali irquilla ñavita ricushpaca, ñucatami jatun mandajca umata fitishpa huañuchihuanga— nircami.
11Eunucocunata mandajca, Daniel, Ananías, Misael, Azarías shuti huambracunata cuidachunmi, Melsar shuti runata churashca carca. Paitami, Danielca cashna nirca:
12—Canda servij ñucanchitaca, micunatapash aicha illajta, ufiangapajpash yacutalla chunga punllacaman carashpa ricupai nipanimi. 13Shina rurashca jipaca, jatun mandajpaj micunata micuj huambracunapaj ñavihuan, ñucanchi ñavihuan chimbapurashpa ricupanguilla. Chai jipaca, canda servij ñucanchi imashna cajpipash ricushpa, canllata imatapash rurapanguilla— nircami.
14Shina nijpimi chashna rurangapaj ari nirca. Chaimandami chunga punllacaman chashna carashpa ricurca. 15Ña chunga punlla jipa, paicunapaj ñavita ricujpica, jatun mandajpaj micunata micuj, chaishuj huambracunatapash ashtahuan yali ali racucunami carca. 16Shinamandami Melsar shuti runaca, paicuna micuchun apamushca micunatapash, paicuna ufiana vinotapash apashpa, aicha illaj micunatalla carashpa catirca.
17Chai chuscu huambracunamanmi, Taita Diosca tucui letracunata, ima shuj yachajunacunata alipacha yachajuchun, ali yuyaita curca. Danielca, muscuipishna tucui ricushcatapash, muscuicunatapash, ima cajta yacharcallami. 18Jatun mandajca, paicunata ima punlla paipajman pushanatami mandashca carca. Chai punlla pactajpimi, eunucocunata mandajca, Nabucodonosor runapaj ñaupajman pusharca. 19Chaipimi jatun mandajca, paicunahuan parlarca. Tucui paicuna purapica, Daniel, Ananías, Misael, Azarías shuti huambracunashnaca, pipash na tiarcachu. Chashnami paicunaca, jatun mandajpaj ñaupajpi paita servinajurca. 20Alipacha yachajushcata, ali yuyaita charishcata ricungapaj, na tigrachi ushanallacunata jatun mandaj tapujpipash, paicunaca pai mandajuj llactapi tiaj tucui yachajcuna, luzerocunata ricujcuna tigrachishcatapash, chunga viajeta yali alipacha tigrachishcatami ricurca. 21Danielca, jatun mandaj Ciro shuti runa mandai callari huatacamanmi chaipi quedarca.
Currently Selected:
DANIEL 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.