COLOSENSES 1
1
Alillachu capanguichi nishcami
1Taita Dios munajpi, Jesucristo villachun cachashca Pablomi cani. Caitaca, huauqui Timoteondimi, 2Diospajlla causaj, Cristota alipacha cazuj, Colosas pueblopi causanajuj huauquicunaman, panicunamanmi escribinchi. Ñucanchi Taita Diospash, Apunchi Jesucristopash ninan juyaita, casilla ali causaiguta, cangunaman carachunmi munanchi.
Diosmanda ali yachaita cuchunmi Pabloca, Taita Diosta mañashca
3Cangunamanda na samashpa Diosta mañajushpami, ñucanchi Apunchi Jesucristopaj Taita Diosta pashi ninajunchi. 4Jesucristotaca alipacha crijcuna cajta, Diospajlla causajcunatapash, tucuicunata juyanajujta uyashpami, chashna ninajunchi. 5Jahua pachapi alichishca tiajujta japigrinata shuyanajushpami, chashna causanajunguichi. Na llullashpa villajuj ali villaita uyaimandami, chaita yariajlla canguichi. 6Na llullashpa villajuj shimica, cai pachapica tucui llactacunapi mirajushpami, cangunamambash chayamurca. Shinamandami cangunapash: “Taita Diosca ninandapachami juyan” nishpa villanajujta uyashca punllamandapacha, grano fucujunshna miranajunguichi. Shinallatami cai pachapica, tucui llactacunapi miranajun. 7Ñucanchi juyashca huauqui Epafras yachachijpi yachajushcashnami causanajunguichi. Paica alipacha pactachij, Cristopajta ruraj cashpami, chashnaca alipacha cangunaman yachachijun. 8Diospaj Espíritu yarichijpimi, juyarishpa causanajun nishpami, paica ñucanchiman villaj shamurca.
9Shinamandami ñucanchipash, chaita uyashca punllamandapacha cungaitapash na cungashpa, cangunamandaca Diosta mañanajunchi. Dios munashcata aligutapacha yachajuchun, paipaj Espiritumanda aliguta yarishpa imatapash tucuita yachajuchunmi mañanchi. 10Shina yachajushpami, Apunchi Jesús munashcata imatapash aliguta rurashpa, paitaca tucuipi cushichinguichi. Shinallata grano fucujpi tandachinshnami, imatapash aliguta ruranajunguichi. Taita Diosmandaca, ashtahuan ashtahuan viñanshnami yachajuna canguichi. 11Paipaj jatun punchapamba ushaihuan, cangunata shinllichishpa charichunmi, Diostaca mañanchi. Chai ushaita carajpimi, imapipash na ñapash fiñarishpa, ali shunguhuambacha causai ushanguichi. 12Shinallata ninanda cushijushpami, Taita Diostaca pashi ninajunguichi. Paimi, paipajlla causajcunamambash, paipaj punchapamba llactapi carangapaj, ñucanchimambash alichishca charijun. 13Yanapi huatashpa charijujpaj maquimandaca, Diosmi ñucanchita cacharichishpa, paipaj juyashca Churi mandajuj llactaman yalichishca. 14Paipaj Churipaj yahuarmandami, Diosca ñucanchipaj juchacunata anchuchishpa quishpichirca.
Taita Dioshuan cutin ali tucuchunmi, Cristoca huañushca
15Cristoca, pipaj ñavipipash na ricurij Taita Dios imashna cajtami ricuchijun. Paica, tucui imatapash nara rurajpillatami, pundallata ña tiashca. 16Jahua pachapi, cai pachapi ricunallacuna, na ricunallacunatapash ima tiachumbash Diosca, paipaj Churihuanllatami tucuita rurashca. Jatun mandajcunata, tucui mandajcunata, cati mandajcunata, ushaita charijcunatapash, paipaj Churipaj ali cachunmi, paihuanllata Diosca tucuita rurashca. 17Imapash nara tiajpillatami, Cristoca ña pundata tiashca. Tucui ima cashpapash, paipaj maquipimi tianajun. 18Tandanajuj crijcunaca, Cristopaj cuerposhnami, paica umashnami. Tucui imatapash pailla mandangapajmi Cristoca, huañushcacunapaj chaupimanda punda causarirca. 19Taita Diosca, pai imashna cashcapash Cristopi junda cachunmi munarca. 20Tucui ima tiashcapash, Cristomandalla paihuan cutin ali tucuchunmi, Diosca munarca. Cai pachapi causajcunapash, jahua pachapi tiajcunapash, Dioshuan casilla aliguta causachunmi Cristoca, cruzpi yahuarta jichashpa huañurca.
21Cangunapaj yuyaipi imatapash nalita yarishpa, nalita rurashpami, pundacunaca Diosta na rijsishpa, fiñashpa chingashca causarcanguichi. Ashtahuangarin cunanga, Dioshuan cutin ali tucuchunmi, 22Cristoca aichayu tucushpa, ninan llaquita apashpa huañurca. Paipajlla causashpa, na mapayashcata, na juchachi tucushcata, Diospaj ñaupajpi cangunata ricuchingapajmi, chashna huañurca. 23Cangunaca, shinllitapacha shayachishcashnami crishpa catina canguichi. Ali villaita villajujpimi, imata japigrinatapash ña uyarcanguichi. Chaitaca, cungaitapash na cungashpami shuyana canguichi. Cai pachapi tucui miraicunamanmi villanajun. Diospajta rurachun, agllashca Pablomi cani.
Pabloca, na israelcunaman villashpami Diospajta rurajushca
24Cunanga, cangunapaj ali cachunmi, llaquita apajushpapash ninanda cushijuni. Tandanajuj crijcunamanda llaquicunata apachun Cristo munashcatami, ñucapaj cuerpohuan llaquita apashpa pactachijuni. Tandanajuj crijcunaca, Cristopaj cuerposhnami. 25Cangunapaj ali cachunmi Taita Diosca, paipajta rurachun agllahuarca. Shinamandami na samashpa, Diospaj Shimitaca villajunilla. 26Diosca, ñaupa huatacunamandapacha cunan punllacamanmi cai shimitaca, pacalla charijushca. Ashtahuangarin cunambimi, paipajlla causajcunaman yachachishca. 27Paicunamanmi Taita Diosca, na israelcunamambash carangapaj munashpa, juyailla pacalla charijushcataca rijsichirca. Chai pacalla tiajushca Cristoca, cangunapaj shungupimi causajun. Paimandami, punchapamba llactapi causagrinata shuyanajunguichi.
28Ñucanchica, Cristomandami villanajunchi, shinlli tacurinajunchi. Cristo Jesushuan shujlla tucushpa, ima pandatapash na rurashcatami, tucuicunallata Diosman ricuchigrina canchi. Chaipajmi, imagutapash aliguta yachajuchun, tucuicunaman yarichishpa yachachinchi. 29Shina yachajuchunga, Cristo caramujuj ninan ushaihuanmi, macanajushpa mishanshna paipajta rurajuni. Imata rurachumbash, paimi ñucaman ninan ushaita caramujun.
Currently Selected:
COLOSENSES 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.