2 REYES 1
1
Ocozías shuti runa huañushcatami villajun
1Acab shuti runa huañushca jipaca, Moab llactapi causajcunami israelcunata na cazunajurca. 2Ocozías runaca, Samaria pueblopi pai charishca huasi ventanamanda urmashca cashpami, ninanda nanachishca sirijushpa, cashna nishpa shuj runacunata cacharca: “Caimanda rishpa, Ecrón shuti pueblopi tiaj Baal-zebub shuti diosta cashna tapuichi: ‘¿Cai nanaimandaca, aliyanachu cani imashi?’ ninmi nishpa tapuichi” nircami. 3Chaimandami, Tisbe shuti pueblopi causajuj Eliastaca, Mandaj Diospaj angelca cashna nijurca: “Samaria pueblota jatun mandajpaj runacunahuan tuparingapaj jatarishpa vichai ri. Paicunataca cashna ningui: ‘¿Israel llactapica, Taita Dios illanllu? ¿Chaimandachu Ecrón shuti pueblopi tiaj Baal-zebub shuti diostara tapungapaj rinajunguichi?’ ningui. 4Chashna rurashcamandami, Mandaj Diosca cashna nin: ‘Nanachishpa camapi sirijushcamandaca na jataringuichu, ashtahuangarin huañunguipachami’ ninmi nigri” nijurcami.
Shina nijpimi Eliasca, tuparingapaj rirca. 5Tapungapaj rij runacunaca tigramujpimi, jatun mandajca:
—¿Imashpata tigramunguichi?— nishpa tapurca.
6Shina tapujpimi paicunaca, cashna nishpa villanajurca:
—Shuj runahuanmari tuparircanchi. Paica cashnami nirca:
—Cangunata cachamuj jatun mandajpajman tigrashpa cashna nigrichi: Mandaj Diosca, cashnami nin: ‘¿Israel llactapica, Dios illajpichu Ecrón shuti pueblopi tiaj Baal-zebub shuti diostara tapuchun cacharcangui? Chashna rurashcamandami, nanachishpa camapi sirijushcamandaca, na jataringui. Ashtahuangarin huañunguipachami’ ninmi ninguichi nircami— nishpami villanajurca.
7Shina villajpimi, jatun mandajca:
—Cangunahuan tuparishpa chashna villaj runaca, ¿imashnata carca?— nishpa tapurca.
8Shina tapujpimi paicunaca:
—Chai runaca, milma churajunata churajushca, cinturaspica carata chumbilishcami carca— nijpimi, jatun mandajca:
—Tisbe shuti pueblomanda Eliasmi cashcanga— nirca.
9Chai jipami jatun mandajca, picha chunga soldadocunata mandajtaca, paipaj picha chunga soldadocunandi Eliaspajman cacharca. Paicuna Eliaspajman vichai rishpa chayajpica, paica shuj urcu jahuapimi tiajurca. Chaipi tiajujpimi, soldadocunata mandajca:
—Taita Diospaj runa: ‘Jatun mandajca urai shamui’ nijunmi— nirca.
10Shina nijpimi Eliasca, picha chunga soldadocunata mandajtaca cashna nirca:
—Ñucaca, Taita Diospaj runa cajpica, jahua pachamanda nina urai shamushpa candaca, cambaj picha chunga soldadocunandi rupachishpa tucuchijuchunlla— nircami.
Shina nijhuanmi, jahua pachamanda nina urai shamushpaca, mandaj soldadondi, paipaj picha chunga soldadocunandi rupachirca.
11Chaimandami jatun mandajca, cutin shuj picha chunga soldadocunata mandajta, paipaj picha chunga soldadocunandi, Eliaspajman cutin cacharca. Chai mandaj soldadoca, Eliaspajman chayashpami cashna nirca:
—Taita Diospaj runa: ‘Jatun mandajca, ucha urai shamui’ nijunmi— nircami.
12Shina nijpimi Eliasca, cashna nirca:
—Ñucaca, Taita Diospaj runa cajpica, jahua pachamanda nina urai shamushpa candaca, cambaj picha chunga soldadocunandi rupachijuchunlla— nircami.
Shina nijhuanmi, jahua pachamanda nina urai shamushpaca, mandaj soldadondi, paipaj picha chunga soldadocunandi rupachirca.
13Jatun mandajca, cutin picha chunga soldadocunata mandajtaca, picha chunga soldadocunandi, caihuanga ña quimsa mandajta cacharca. Picha chunga soldadocunata mandaj, ishcaipaj cati vichai rishpaca, Eliaspaj ñaupajpi cungurishpami cashna nirca:
—Taita Diospaj runagu. Ñuca causaipash, cai picha chunga canda servij soldadocunapaj causaipash, cambaj ñaupajpi valishca ricurishca capachun nipanimi. 14Ricui, ñucapaj punda shamuj, chai picha chunga soldadocunata ishcai mandajcunataca, paicunapaj picha chunga soldadocunandimi, jahua pachamanda nina shamushpa rupachishca. Cunanga ñuca causaica, cambaj ñaupajpica valishca ricuripachun— nircami.
15Chaimandami Mandaj Diospaj angelca, Eliastaca:
—Paihuan urai rilla, paitaca ama manllaichu— nirca.
Shina nijpimi Eliasca jatarishpa, chai mandajhuan jatun mandajpajman urai rirca. 16Chaipimi cashna nirca:
—Mandaj Diosca, cashnami nin: ‘Ecrón shuti pueblopi tiaj Baal-zebub shuti diosta tapuchun runacunata cachangapaca, Israel llactapica ¿nachu Taita Dios tian? Can chashna rurashcamandaca, nanachishpa camapi sirijushcamandaca na jataringuichu, ashtahuangarin huañunguipachami’ ninmi— nircami.
17Mandaj Dios, Eliasta villachun mandashcashnallatami, Ocozías runaca huañurca. Ocozías runaca, na churita charircachu. Chaimandami Israel llactataca, Joram shuti runa mandai callarirca. Josafat runapaj churi Joram runaca, Judá llactataca ishcai huatatami ña mandajushca carca. 18Ocozías runa ashtahuan imatalla rurashcacunaca, ¿nachu Israel llactata jatun mandajcuna imashna causashcata villajuj libropi escribishca tiajun?
Currently Selected:
2 REYES 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.