1 TIMOTEO 1
1
Alillachu capangui nishcami
1Ñucanchita Quishpichij Taita Dios mandajpi, ñucanchi shuyanajushca Apunchi Jesucristo villachun cachashca Pablo cashpami, Jesucristomanda villajuni. 2Can Timoteoca, Jesusta crishcamandaca, ñuca huahuashnapachami cangui. Shinamandami caita escribini. Ñucanchi Taita Diospash, ñucanchi Apunchi Cristo Jesuspash ninan juyaita, ninanda llaquinata, casilla ali causaiguta canman carachunmi munani.
Llullashpa yachachijcunataca, na uyanachu nishcami
3Macedonia llactaman ñuca rijushpaca, candaca Efeso pueblopillata quedapailla. Chaipica, llullashpa yachachijcunataca, na chashna yachachinachu canguichi nishpa rimangui nircanimi. 4Yanga parlocunatapash, ñaupa taitacunapaj na tucurinalla shuticunamanda parlocunatapash uyangapajllapash na munanachu canguichi. Chai parlocunaca, fiñanajuipimi churan. Shinallata Taita Dios mandashcata rurangapaca, napacha alichu. Ashtahuangarin pai mandashcataca, paita crishpallami pactachi ushanchi. Chashna yachachinatami cunanga, canda mandani.
5Cashnataca, na mapa shunguhuan aliguta yarishpa, na nij tucushpalla aligutapacha crishpa, shungumandapacha juyarinajuchunmi mandani. 6Huaquingunaca pandarishpami, chashna juyaihuan causanamanda anchurishpa, yanga parlocunatara parlangapaj tigrashca. 7Paicunaca, mandashca shimicunata yachajcuna cangapajmi munarca. Imata yachachinajushpapash, paicunallata napash yachashpatami, chashna cangapaj munanajurca.
8Ashtahuangarin mandashca shimicunapi, imata nijujta aliguta yachashpa yachachinaca aligupacha cajtami yachanchi. 9Imatapash cashcatapacha rurajcunapaj ali cachunga, mandashca shimicunataca na paica cushcachu. Chaitapash yachanchimi. Ashtahuangarin na uyanayachijcuna, na cazungapaj munajcuna, Diostapash na manllajcuna, juchata rurajcuna, taitata cashpa, mamata cashpapash huañuchijcuna, pitapash huañuchijcuna cazuchunmi cushca.
10Shinallata huainayajcuna, jari purallata puñuj sodomita nishcacuna, genteta shuhuajcuna, llullajcuna, na llullanichu nishpapash llullajcuna, ali shimicunata yachachijujtapash na cazunayachijcuna cazuchunmi cushca. 11Ninanda alicachi tucujuj Taita Diosmanda juyailla ali villaita villajuj shimicunami, chashna yachachijun. Chaitami ñucaman mingahuarca.
Diospajta Pablo rurajushcatami villajun
12Ñucanchi Apunchi Cristo Jesustaca, ñucata shinllichishcamandami pashi nijuni. Paita ali cazuj cajpimi, paipajta rurashpa causachun churahuarca. 13Pundaca paitaca, ninanda nalicachishpami, catiriashpa llaquichishpa, nali shimicunata rimashpa causarcani. Ashtahuangarin nara crishpami, na yachaimanda chashna rurajushcani. Ashtahuangarin Diosca llaquishpami, ñucataca chasquihuashca. 14Ñuca chashna nali cajpipash, ñucanchi Apunchi Jesusmi ñucataca, ninandapacha juyahuarca. Cristo Jesushuan shujlla tucujpimi, crishpa, juyashpa causachumbash ushaita carahuarca.
15Juchata rurajcunata quishpichingapajmi, Cristo Jesusca cai pachaman shamurca. Chashna nishca shimicunataca pactachinapacha cajpimi, tucuicuna crishpa alicachina. Ñucami, juchata ruraj gentecunatapash ashtahuan yali juchayu cani. 16Shinamandami Diosca, ñucataca llaquishpa chasquihuarca. Jesucristoca, na ñapash fiñarij cajta ñucapi ricuchingapajmi, chashna chasquihuarca. Shinallata causaita causagrinata charingapaj, Jesucristota jipalla crijcunaman ricuchijuchunmi, ñucataca chasquihuarca. 17Causaita causaicaman Jatun Mandaj, huañuitapash na huañuj, pipaj ñavipipash na ricurij, imata cashpapash tucuita yachaj, shujlla Diostaca, causaita causaicaman juyaillagumari cangui nishpa, ninanda alicachishunchi. Shina cachun.
18Timoteo, canga ñuca huahuashna cajpimi, ali macanajuj soldadoshna, Diospajta rurangui nishpa mingani. Dios yarichijpimi, shuj huauquicunaca ña pundata shinallata villashca. 19Aliguta crishpa, ali yuyaihuan causashpa catingui. Huaquingunaca crishcatapash cungashpami, yacupi huashajunshna chingashca. Chashna tucunataca, yangapi churashpa catingui. 20Himeneo shuti, Alejandro shuti runacunami shina tucushca. Paicunataca, Taita Diosta ama ashtahuan nali shimicunata rimashpa purichunmi, Satanasman cushpa saquircani.
Currently Selected:
1 TIMOTEO 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.