1 SAMUEL 1
1
ESCRIBISHCA PUNDA LIBROMI Samuel huacharishcatami villajun
1Efraín shuti urcupi tiaj Zofim nishca Ramataim shuti pueblopimi, Elcana shuti runa causajurca. Elcana runaca, Jeroham shuti runapaj churimi carca. Jeroham runaca, Eliú shuti runapaj churimi carca. Eliú shuti runaca, Tohu shuti runapaj churimi carca. Tohu shuti runaca, Zuf shuti runapaj churimi carca. Zuf shuti runaca, efrateo purami carca. 2Elcana runaca, ishcai huarmitami charirca. Shuj huarmica, Ana shutimi carca. Caishuj huarmica, Penina shutimi carca. Penina shuti huarmica, huahuacunata charircami. Ashtahuangarin Ana huarmica, huahuacunata na charircachu. 3Elcana runaca, tucuita Mandaj Diosta ninanda alicachingapaj, animalta carashpa huañuchingapajmi, pai causajuj pueblomandaca, Silo shuti puebloman huatapi huatapi vichai rin carca. Chaipica, Elí shuti curapaj Ofni shuti, Finees shuti ishcai churicunami, Mandaj Diospaj curacuna carca. 4Elcana runaca, Diosman animalta carashpa huañuchina punlla chayajpimi, Penina shuti paipaj huarmiman, paipaj tucui churicunaman, tucuilla ushicunamambash, paicunaman carana cashcataca tucuicunaman cun carca. 5Ashtahuangarin Ana huarmimanmi, ashtahuan alita agllashpa caran carca. Mandaj Diosllata huahuaguta na carajpi, na charijpipash, Anatami ashtahuan juyan carca. 6Huahuacunata charichunga Mandaj Diosllata na saquishcamandami, Anata fiñaj huarmica, ninanda rimashpa fiñachishpa llaquichijurca. 7Shina fiñachij cashpami, Mandaj Diospaj huasiman huatapi huatapi vichai rishpapash, Penina huarmica Anataca, chashnallata rimashpa fiñachijurca. Shinamandami Ana huarmiguca, huacaitalla huacashpa na micurca. 8Chaimandami paipaj cusa Elcana runaca, cashna nirca: “Ana, ¿imashpata huacangui? ¿Imashpata na micungui? ¿Imamandata cambaj shungupica, llaquilla cangui? ¿Nachu ñucallata cambaca, chunga churicunatapash yali cani?” nircami. 9Ana huarmiguca, Silo shuti pueblopi cashpa, ña micushpa ufiashca jipami jatarirca. Shinallata Elí shuti curapash, Mandaj Diospaj huasi shuj pilar ladopimi, shuj tiarinapi tiajurca. 10Chaipimi Ana huarmiguca, tucui almahuan llaquirishpa, ninanda huacashpa Mandaj Diostaca mañajurca. 11Paica pactachishapachami nishpami, cashna nijurca: “Tucuita Mandaj Dioslla, canda servij ñuca, cashna llaquihuan cajtaca llaquishpa ricushpa, ñuca mañashcata yaripairi. Canda servij ñucataca ama cungashpa, ashtahuangarin canda servij ñucaman shuj jari huahuaguta carahuayari. Shina carajpica chai huahuagutaca, tucui paipaj causaipi can Mandaj Diostalla servishpa causachunmi cupasha. Shinallata paipaj ajchatapash, na rutuchingachu” nijurcami. 12Mandaj Diospaj ñaupajpi Ana huarmigu ña unaita mañajujpillatami Elí runaca, paipaj shimita ricujurca. 13Ashtahuangarin Ana huarmiguca, shungu ucupillami mañajurca. Shinamandami paipaj shimica cuyuritalla cuyurishpa, pai rimajca na uyarirca. Chaimandami Elí runaca, cai huarmica machashcami yajurca. 14Chashna yajushpami Elí runaca, cashna nirca: —¿Ima horascamanda machashcalla cagringui? Vinota ufianataca ña saqui— nircami. 15Shina nijpimi Ana huarmiguca, cashna nishpa tigrachirca: —Ñuca taitalla, na machashcachu capani. Vinota, sidratapash na ufiarcanichu. Ashtahuangarin ñuca shungupimi ninan llaquihuan cani. Chaitami, ñuca tucui almahuan Mandaj Diospaj ñaupajpi villajupani. 16Canda servij ñucataca, ama cai huarmica Diosta na manllajmi yashpaca ricuhuaichu. Ashtahuangarin ninan llaquihuan huacashpa causajushpami, cunangaman mañajurcanilla— nircami. 17Shina nijpimi Elí runaca, cashna nishpa tigrachirca: —Imatapash na manllashpa, aliguta rilla. Cunanga, israelcunapaj Taita Diosca, can mañajushcataca carangapachami— nircami. 18Shina nijpimi Ana huarmica, cashna nirca: —Canda servij ñucapash, cambaj ñaupajpica ali ricurishca cashpami, ali capaiman— nircami. Shina nishpaca, pai maita shamushcatallata tigrashpa rishpami micugrirca. Chai punllamandapacha na ashtahuan llaquilla carcachu. 19Cayandi tutamandata jatarishpami, Mandaj Diospaj ñaupajpi ninanda alicachinajurca. Chai jipaca, Ramá shuti pueblopi tiaj paicunapaj huasiman tigrarcallami. Elcana runaca, Ana shuti paipaj huarmipimi chayarca. Shinallata Mandaj Diospashmi, Ana mañashcata yarirca. 20Ana huarmi vijsayu tucushca jipaca, cashnami tucurca: Unguna punlla pactajpimi, shuj jari huahuaguta ungurca. “Mandaj Diosta ñuca mañajpimi, cai huahuagutaca carahuarca” nishpami, Samuel shutita shutichirca. 21Chai jipami Elcana runaca, tucuilla paipaj familiacunandi, Mandaj Diosman animalta carashpa huañuchin cashcashnallata huañuchingapaj, pai imaguta carashapacha nishcata carangapajpash, Diospaj huasiman vichai rirca. 22Shina cajpipash Ana huarmica, na vichai rircachu. Ashtahuangarin paipaj cusataca, cashnami nirca: —Ñucaca, cai huahuata chuchumanda anchuchingacaman, nara vichai rishachu. Chai jipami, cai huahuagutaca tucui paipaj causaipi servishpa causachun, Mandaj Diospaj ñaupajpi saquingapaj ripasha— nircami. 23Shina nijpimi paipaj cusa Elcana runaca, cashna nishpa tigrachirca: —Cambaj ashtahuan ali canata rurailla. Shina cashpaca, cai huahuata chuchumanda anchuchingacaman quedailla. Mandaj Diospash, pai rurashapacha nishcataca pactachishpami ali canman— nircami. Shina nijpimi, Ana huarmica huasipi quedashpa, paipaj churitaca chuchumanda anchuchingacaman viñachirca. 24Huahuata chuchumanda anchuchishca jipami, Mandaj Diospaj huasiman Silo shuti puebloman apamurca. Paihuanga quimsa shicutapash, ishcai chunga ishcai kilo jacutapash, shuj fundupi vinotapashmi apamurca. Chai huahuaguca, uchillagurami carca. 25Shicuta Diosman cushpa huañuchishca jipami, chai huahuagutaca Elipajman apamunajurca. 26Shina apamushpami Ana huarmica, cashna nijurca: —¡Ñuca taitalla! Canga causajupanguilla. Ñuca taitalla, Mandaj Diosta cambaj ladopi mañashpa tiajurcani, chai huarmillatami capani. 27Cai huahuagumandami mañajurcani. Mandaj Diosca, ñuca mañashcataca carahuarcami. 28Chaimandami cai huahuagutaca, ñucapash Mandaj Diosman cupani. Paica, tucui causaipimi Mandaj Diospaj canga— nishpami, chaipillata Mandaj Diostaca ninanda alicachijurca. Diosta alicachishpa, Ana candashcami
Currently Selected:
1 SAMUEL 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.