1 REYES 1
1
Abisag shuti cuitsami, Davidta servijushca
1Jatun mandaj Davidca, ña ashtaca huatacunata charij rucugu cajpimi, churajunacunahuan quilpanajun carca. Shina quilpajpipash, na cunujyanllu carca. 2Chaimandami paita servijcunaca, cashna ninajurca: “Jatun mandajpaj ladopi cuidashpa, paipaj ladopi puñushpa paita cunuchijuchunga, jarihuan nara tacarishca chairalla viñai shuj cuitsaguta, ñuca amo jatun mandajman mascaichi. Shina puñujpimi, ñuca amo jatun mandajca cunujyanga” ninajurcami.
3Shina nijpimi, tucuilla Israel llactapica, shuj juyailla cuitsaguta mascashpa, sunamitapura Abisag shuti cuitsaguta tarirca. Paitaca, jatun mandajmanmi apamunajurca. 4Chai cuitsaguca, juyaillagumi carca. Paimi, jatun mandajtaca cunujyachishpa servishpa causajurca. Shina cajpipash jatun mandajca, ima horallapash paipica na tacarircachu.
Adonías runaca, jatun mandaj tucungapajmi munashca
5Shinamandami, Haguit shuti huarmipaj churi Adonías runaca: “Ñucami mandana cani” nishpa, jariyashpa purijurca. Shina nishpami carretacunata rurachishpa, caballopi purij soldadocunatapash tandachirca. Paipaj ñaupajpi calpachunga, picha chunga soldadocunatapashmi charirca. 6Shina cajpipash paipaj taitaca, ima horallapash paipaj tucui causaipi: “¿Imashpata chashna rurangui?” nishpallapash, na rimashpa llaquichishcachu carca. Adonías runaca, juyailla runami carca. Paitaca, Absalonbaj catimi ungushca carca. 7Paica, Sarvia shuti huarmipaj churi Joab runahuan, Abiatar shuti curahuan yachachirishpa, shujlla yuyai tucushcami carca. Paicunami, Adoniastaca ayudan carca. 8Shina cajpipash Sadoc shuti curapash, Joiada shuti runapaj churi Benaía shuti runapash, Dios ima nishcata villaj Natanbash, Simei shuti, Rei shuti runacunapash, Davidhuan tiaj tucuilla jatungunapash Adoniastaca na catircachu. 9Ashtahuangarin Adonías runaca, Rogel shuti yacu pugyu ladopi tiaj, Zohelet shuti jaca rumi ladopimi llamacunata, huagracunata, ashtahuan virayashca shuj animalcunatapash huañuchishpa, jatun micuita rurajurca. Chai micuimanmi, jatun mandajpaj churi tucuilla paipaj huauquicunata cayarca. Shinallata jatun mandajta servinajuj, Judá llactamanda tucuilla runacunatapashmi cayarca. 10Shina cayashpapash, Dios ima nishcata villaj Natán runata, Benaía shuti runata, Davidhuan tiaj jatungunata, paipaj huauqui Salomondaca na cayarcachu. 11Chaimandami Natán runaca, Salomonbaj mama Betsabé shuti huarmitaca cashna nijurca:
—Ñucanchi amo Davidpash na yachajta, Haguit shuti huarmipaj churi Adonías runa mandajujtaca, ¿nachu uyashcangui? 12Ricui, cunanga cambash, cambaj churi Salomonbash ama huañuchi tucungapaca, ali yuyaita ñuca cushcata uyai.
13Chai jipaca, jatun mandaj Davidpajman rishpa, cashna nigringui: ‘Ñuca amo jatun mandajlla. ¿Nachu canda servij ñucataca, cashna nishpa juramenturcangui: Ñucapaj catica, cambaj churi Salomonmi, jatun mandaj tucunga. Paimi, ñuca mandashpa tiajushcapica tiaringa nijurcangui? Shina cashpaca, ¿imashpata Adonías runara mandajun?’ nigringui. 14Jatun mandajhuan can chashna parlajujpillatami, ñucapash canda catishpa yaicumusha. Chaipimi, can imashna nijushcapash chashnapacha cajta villasha— nijurcami.
15Shina nijpimi Betsabé huarmica, jatun mandaj Davidpaj ucuman yaicurca. Jatun mandajca, ña rucugupachami carca. Shina cajpimi, sunamitapura Abisag shuti cuitsagu servishpa causajurca. 16Betsabé huarmica, jatun mandajta cazushcata ricuchingapajmi, paipaj ñaupajpi cungurirca. Chaimandami jatun mandajca:
—¿Imatata ningui?— nishpa tapurca.
17Shina tapujpimi Betsabé huarmica, cashna nirca:
—Ñucata mandajlla, canda servij ñucamanmi, canda Mandaj Taita Diospaj shutipi, cashna nishpa juramenturcangui: ‘Cambaj churi Salomonmi, ñucapaj catica mandanga. Paimi, ñuca mandashpa tiajushcapica tiaringa’ nircanguimi. 18Ricui, cunanga Adonías runami mandajun. Chaitaca, ñuca amo can jatun mandajca, cunangaman nara yachapanguica. 19Paica huagracunatapash, ashtahuan ali virayashca shuj animalcunatapash, ashtaca llamacunatapash huañuchishpami, shuj jatun micuita rurashca. Chai micuimanmi, can jatun mandajpaj tucuilla caishuj churicunatapash, Abiatar shuti curatapash, soldadocunata mandaj Joab runatapash cayashca. Ashtahuangarin canda servij Salomondaca, na cayashcachu. 20Shina cashcamandaca, ñuca amo jatun mandajlla, tucui israelcunami ñuca amo can jatun mandaj mandashpa tiajushcapi cambaj randica, pi mandashpa tiarinatapash villachun, canda shuyanajun. 21Can na chashna rurajpica, ñuca amo can jatun mandaj huañushpa, cambaj ñaupa taitacunahuan tandanajugrishca jipami ñucapash, ñuca churi Salomonbash juchachi tucushun— nircami.
22Jatun mandajhuan Betsabé huarmi chashna parlajujpillatami, Dios ima nishcata villaj Natán runaca ñapash shamurca. 23Pai ña chayamujpica: “Ricui, Dios ima nishcata villaj Natanmi shamushca” nishpami, jatun mandajman villanajurca. Pai ña yaicushpaca, jatun mandajpaj ñaupajpi cungurishpami, alpaman chayajta urai cumurirca. 24Chai jipami, Natán runaca cashna nirca:
—Ñuca amo jatun mandajlla, ¿canllu cashna nircangui?: ‘Ñucapaj catica, Adonías runami jatun mandaj tucunga. Paimi, ñuca mandashpa tiajushcapica tiaringa’ ¿nircangui? 25Cunanmi paica huagracunata, virayashca shuj animalcunata, ashtaca llamacunatapash huañuchishpa, jatun micuita rurangapaj urai rishca. Chai micuimanmi, can jatun mandajpaj tucuilla caishuj churicunata, soldadocunata mandajcunata, shinallata Abiatar shuti curatapash cayashca. Ricui, paicunaca paipaj ñaupajpimi micushpandi, ufiashpandi: ‘¡Jatun mandaj Adonías runaca causajuchunlla!’ nishpa caparinajun. 26Shina cashpapash canda servij ñucata, Sadoc shuti curata, Joiada shuti runapaj churi Benaía shuti runata, canda servij Salomondaca na cayashcachu. 27¿Chashna rurachunga, can jatun mandaj ñuca amollatachu mandarcangui? Can jatun mandaj ñuca amo mandashpa tiajushcapi, cambaj cati maijan tiarina cajtapash, canda servijcunaman ¿na villashpachu chashna rurarcangui?— nircami.
Salomondami, Davidca jatun mandaj cachun churashca
28Shina nijpimi, jatun mandaj Davidca, Betsabé huarmita cayamupaichi nirca. Shina cayajpimi paica, jatun mandajpaj ñaupajman yaicushpa, jatun mandajpaj ñaupajpi shayarirca. 29Chaipimi jatun mandajca, cashna nishpa juramenturca:
—Tucui llaquimanda ñuca almata quishpichij, Mandaj Diosca causajumbachami. 30Ñucaca, israelcunata Mandaj Taita Diospaj shutipimi, cashna nishpa juramenturcani: ‘Ñucapaj randica, cambaj churi Salomonmi jatun mandaj tucunga. Paimi, ñuca mandashpa tiajushcapica tiaringa’ nircanimi. Chashna nishcashnallatami, cunanga pactachigrini— nircami.
31Shina nijpimi Betsabé huarmica, jatun mandajpaj ñaupajpi cungurishpa, pai jatun mandajta cazushcata ricuchingapaj, alpaman chayajta urai cumurishpa, cashna nirca:
—Ñuca amo jatun mandaj Davidca, causaita causaicaman causajuchunlla— nircami.
32Chai jipami, jatun mandaj Davidca cashna nirca:
—Sadoc shuti curata, Dios ima nishcata villaj Natán runata, Joiada shuti runapaj churi Benaía shuti runatapash cayamupaichi— nircami.
Shina cayamujpi, paicuna jatun mandajpaj ñaupajman ña yaicujpimi, 33jatun mandajca cashna nijurca:
—Cunanga, cangunapaj amo ñucata servijcunata tandachishpa, ñuca churi Salomondaca, ñuca tiarina mulapi tiachishpa, Gihón shuti pugyuman pushaichi. 34Chaipimi Sadoc curapash, Dios ima nishcata villaj Natanbash Salomondaca, israelcunata jatun mandaj cachun aceiteta talishpa javinga. Shinallata trompetatapash huacachishpa: ‘¡Jatun mandaj Salomonga causajuchunlla!’ nishpa caparinguichi. 35Chai jipaca, paita catiria cangunapash shamunguichi. Pai shamushpami, ñuca mandashpa tiajushcapi tiarishpa, ñucapaj randi mandanga. Paitami Israel llactata, Judá llactata mandaj cachun agllarcani— nijurcami.
36Shina nijpimi, Joiada shuti runapaj churi Benaía runaca, jatun mandajtaca cashna nirca:
—Shina cachun. Ñuca amo jatun mandajta Mandaj Taita Diospash, chashnallata nishpami ali canman. 37Mandaj Diosca, imashnami ñuca amo can jatun mandajhuan carca, chashnallata Salomonhuambash cachun. Pai mandanataca, ñuca amo can jatun mandaj David mandajushcatapash ashtahuan yali jatunyachishca cachun— nircami.
38Chai jipaca, Sadoc shuti curapash, Dios ima nishcata villaj Natanbash, Joiada shuti runapaj churi Benaía shuti runapash, cereteo nishca, peleteo nishca runacunapash urai rishpami, Salomondaca jatun mandaj David tiarina mulapi tiachishpa, Gihón shuti pugyuman pushanajurca. 39Chaipica Sadoc shuti curami, Diospaj jatun carpamanda apashca cachupi aceiteta talishpa Salomonda javirca. Chai jipaca, trompetata huacachinajujpimi: “¡Jatun mandaj Salomonga causajuchunlla!” nishpa, tucuicuna caparinajurca. 40Chai jipaca, tucuicunami candashpa, gaitacunata tocashpa, ninanda cushijushpa, Salomonda catishpa vichai rinajurca. Alpa mamapash huashajungatashnami, ninandapacha caparinajurca.
41Adonías runapash, jatun micuiman tucuilla pai cayashcacunapash ña micuita tucuchishca jipami, trompetata huacachijta uyarca. Shina uyashpami, Joab runaca:
—¿Imashpata pueblopica, ninanda caparinajun?— nirca.
42Pai shina nijujpillatami, Abiatar shuti curapaj churi Jonatanga ñapash shamurca. Pai chayamujpimi Adonías runaca, cashna nirca:
—Yaicumuilla, canga imatapash na manllaj runami cangui. Canga, ali villanatami apamujungui— nirca.
43Shina nijpimi Jonatanga, Adoniastaca cashna nijurca:
—Na llullashpami nini. Ñucanchipaj amo jatun mandaj Davidca, Salomondami jatun mandaj cachun churarca. 44Pai jatun mandajca, Sadoc shuti curata, Dios ima nishcata villaj Natán runata, Joiada shuti runapaj churi Benaía runata, cereteo nishca, peleteo nishca runacunatapashmi, Salomonhuan cacharca. Paicunami Salomondaca, jatun mandajpaj mulapi tiachirca. 45Shinallata Sadoc shuti curahuan, Dios ima nishcata villaj Natán runahuanga, Gihón shuti pugyu ladopimi Salomondaca, jatun mandaj cachun aceiteta talishpa javirca. Chaimandami paicunaca, ninanda cushijushpa vichai rirca. Pueblopipash ninandami caparinajun. Chai caparinajujtami, cangunaca uyashcanguichi. 46Shinallata Salomonbashmi, mandangapaj tiarinapica ña tiarirca. 47Jatun mandajta servijcunapashmi, ñucanchi amo jatun mandaj Davidta, cashna nishpa bendiciangapaj shamunajurca: ‘Taita Diosca, Salomonbaj shutitaca, cambaj shutitapash ashtahuan yali rijsinajuchun rurashpami ali capanman. Shinallata pai mandanatapash, can mandajushcataca ashtahuan yali jatunyachishpami ali capanman’ ningapajmi shamunajurca. Chaimandami jatun mandajca, paipaj camapillata Diosta ninanda alicachijurca. 48Jatun mandajca, cashnatapashmi nirca: ‘Israelcunata Mandaj Taita Diosca, alicachi tucujuchunlla. Cunanga, paimi ñuca mandashpa tiajushcapi tiarichunga, ñuca ñavihuambacha ricujta churashca’ nircami— nijurcami.
49Chashna villajpimi micuiman Adonías runa cayashcacunaca, manllarishpa chujchunajurca. Chaimandami, paicunaca jatarishpa tucuicuna paicunapaj ñanda japishpa rinajurca. 50Ashtahuangarin Adonías runaca, Salomonda ricunata manllashpami, jatarishpa Diospaj carpaman rishpa, chaipi tiajuj altar cachucunapi charirirca. 51Chaitami cashna nishpa, Salomonman villanajurca:
—Adonías runaca, can jatun mandaj Salomonda manllashpami, altar cachucunapi charirishpa cashna nijun: ‘Jatun mandaj Salomonlla. Canda servij ñucataca, espadahuan na huañuchishachu nishpa, cunanda juramentuhuayari’ nijunmi— ninajurcami.
52Shina villajpimi Salomonga, cashna nirca:
—Pai alita ruraj runa cajpica, paipaj umamandaca shuj ajchallapash na urmangachu. Ashtahuangarin nalita pai rurashca ricurijpica, huañungapachami— nircami.
53Jatun mandaj Salomón, Adonías runata pushamuchun cachajpimi, altar ladomanda pushamurca. Adonías runa ña chayamushpami, jatun mandaj Salomonbaj ñaupajpi urai cumurirca. Chaipimi Salomonga:
—Cambaj huasiman rilla— nishpa cacharca.
Currently Selected:
1 REYES 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.