Matiye 5
BEKDC12

Matiye 5

5
Ghena ta Yɛsə pelɛ ghəa ghweme
1Ma kwa nakɛ mbeli Yɛsə kwele kwele ne, pa dzemenyɛ pelɛ ghweme, pa ntishɛnyɛ. Pa mbeli nyi ketəkwə təkwə hendeke nda geva. 2Ma ke Yɛsə teke nda wəshi ke hɛ:
Zeɗe nza ganyɛ
(LWK 6.20-23)
3Zlama ya va mbeli nyi keshifə ghəa nci,
kwa nza ŋkɛ kaŋa nci nza Meghe nya pelɛ ghweme.
4Zlama ya va mbeli nyi kenehwene,
kategweɗakwe nda wənə Shala ke hɛ.
5Zlama ya va ka gwedəa kɛfi,
katekemave hɛɗi nya meɗeyi Shala hɛ.
6Zlama ya va mbeli nyi shewə va ma
ba'a ndere yitea nza tiɗiɗi,
katenza hɛ behe behe.
7Zlama ya va mbeli nyi kezhɛ heli yitea mbeli,
katezhɛ heli Shala yitea hɛ.
8Zlama ya va mbeli nyi nza wənəa nci wɛŋe,
katenakɛ Shala hɛ.
9Zlama ya va mbeli nyi kesepa kwelɛŋe,
kateheka hɛ Shala kaŋwalea ŋkɛ.
10Zlama ya va mbeli nyi ghweze mɛ mbeli hwa hɛ
tewəmbəreke nza tiɗiɗi,
kaŋa nci nza Meghe nya pelɛ ghweme.
11Zlama ya va gheyɛ kenza mbeli kaŋele ŋayɛ, kaghweze mɛ hwa gheyɛ, kaŋwashɛ ŋwashɛ ŋayɛ tewəmbəreke 'ya. 12Nza mə le zlama ba'a farefa, kwa nza ŋkɛ neghe yaneghe ŋayɛ zhɛme pelɛ ghweme. Tsagha se mbeli kaghweze mɛ hwa ka mɛ ŋkwa nyi mpelɛa ma ke gheyɛ.
Ghwene le ŋkwa nya waŋe
(MRK 9.50; LWK 14.34-35)
13Gheyɛ ya kaghwene kezha mbeli nyi te hɛɗi. Ma keshavenyɛ mele mbe ghwene ne, tsema nza ghwənəghwə kazhɛname geva mbe wa? Mba mbeli menete kwete wəsə le we, negha yanegha ŋkɛ mbeli kezha dzeghwa mbeli te.
14Gheyɛ ya kawaŋe kezha mbeli nyi te hɛɗi. Kanakɛma meleme nya pelɛ ghəa ghweme mbeli we. 15Wəndə shɛ kandə ghwə kwa paterela kezha ve ŋkɛ mbeyitere wəsə we. Ama pelɛ ghəa ŋkwa ve mbeli yitea newe ŋkwa pɛtɛa mbeli nyi mbe cɛ yite. 16Tsagha hi waŋe ta ŋayɛ kaɓele kwa kema ta mbeli pɛtɛ, baŋe hɛ kanakɛ ghena ganyɛ nya mene yɛ ba'a baŋe hɛ kageze zləvəa Yiteyɛ ŋayɛ nya pelɛ ghweme.
Ghena te ghəa wəsə mahalegə
17Zəzəma yɛ 'ya se kezha za sebe te wəsə mahalegə nya vəashi ba'a wəshi nyi tekete ka mɛ ŋkwa ta Shala ma. Kese 'ya kezha za sebe te we, ama kezha yipə ŋkɛ kadzawa. 18Kaganda ne, ma 'ya sha gheyɛ: kala nya tetemə ghweme ba'a hɛɗi ne, katentamte geva kwete wəsə shave mbe wəshi mahalegəa Shala ya kala ghəa zhiwə ŋkɛ we. Tsagha tenza ŋkɛ hwa'a te kiɗi ta hɛɗi. 19Vatse gɛ, ma wəndə nya kentamte kwete hwa ghena nyi gezete Shala ba'a nya ketekete nda ke kweci mbeli kamene kala gheŋkɛ, kawəndə nya ɓɛhwɛ tenza ŋkɛ mbe Meghe nya pelɛ ghweme, ama wəndə nya kehawe va wəshia shɛhɛ ba'a nya ketekete nda ke kweci mbeli kamene kala gheŋkɛ ne, kawəndə nya wəba tenza ŋkɛ mbe Meghe nya pelɛ ghweme. 20Kaganda ne, ma 'ya sha gheyɛ: nda yɛ kamenete wəshi nyi ɗe Shala za ma ke ka rafe wəsə mahalegə le ka Fariziyɛn nda nza yɛ kadzembe Meghe nya pelɛ ghweme.
Ghena te ghəa hwepe wənə
21Nahe yɛ kefate ghena nyi kegezete nda geva ke ka shihɛ ŋayɛ: Peslema wəndə na ma. Yayata wəndə nya kepeslekɛ wəndə, katekele ŋkɛ mbeli kadzete ghwə. 22Ma 'ya ne, ma 'ya sha gheyɛ: yayata wəndə nya kehwepete nda wənə ke menənyɛ, katekele ŋkɛ mbeli kadzete ghwə. Ma wəndə nya kegeze sha menənyɛ: Kelɛ, a ke shɛ ne, katekele ŋkɛ mbeli kalə sha mbeli nyi te ghəa meleme nyi kemeha ghwə. Ma wəndə nya kegeze sha wəndə: Gezhi, a ke shɛ ne, katedzembe ghwə nya keɗema kakiɗi ŋkɛ. 23Ma kese na kave nda wəsə ke Shala te reghwetɛa ŋkɛ, nda zəzəte na te ŋkwa shɛnyɛ ghena ya va menə ŋa le gha ne, 24zlenekɛ wəsə nya ɗe na kave nda ke Shala te ŋkwa shɛ yitea reghwetɛ, kwiɗi kiɗimte ghena shɛ le menə ŋa kaba, nda tese na kave nda wəsəa ŋa ke Shala.
25Ma kenza na te ghwə le wəndə ne, tseɓate ghena shɛ kahe kahe le wəndəa shɛ vəa ŋkwa nya nza yɛ mba kwa hweŋkwa, yagha ŋkɛ tendeke nda ŋa ke nde meha ghwə, yagha nde meha ghwə tendeke nda ŋa ke ka sewajɛ ba'a yagha mbeli teveyi ŋa kwa daŋgayɛ. 26Kaganda ne, ma 'ya sha gha: katesame na kwa keɗema na keŋkimte pɛtɛa dewa nya hwa gha we.
Ghena te ghəa vale tahe
27Nahe yɛ kefate ghena nya kegezete geva kaghate, ma ke: Valema na tahe ma. 28Yawa, ma 'ya sha gheyɛ le ŋa ɗa: ma yayata wəndə nya kesla ntsə yitea male ta kwete wəndə ne, nahe ŋkɛ kemenete vale tahe le malea shɛ mɛa wənəa ŋkɛ. 29Ma kenza nde ntsə ta ŋa kwa zeme nde ghwete ŋa yitea jaɗafa ne, feraɗemte ŋkɛ, neghamte ŋkɛ cakeɗake. Megela ma zamte kwete na bela ta geva ta ŋa kenya dzembe ghwə nya keɗema kakiɗi na le pɛtɛa geva ta ŋa. 30Ma kenza nde dzeve ta ŋa kwa zeme nde ghwete ŋa yitea jaɗafa ne, tsaslemte ŋkɛ, neghamte ŋkɛ cakeɗake. Megela ma zamte kwete na bela ta geva ta ŋa kenya dzembe ghwə nya keɗema kakiɗi na le pɛtɛa geva ta ŋa.
Ghena te ghəa ŋka ta male
(MAT 19.9; MRK 10.11-12; LWK 16.18)
31Nahe yɛ kefate ghena nya kegezete geva kaghate, ma ke: Ma wəndə nya keŋka male ta ŋkɛ ne, nda ŋkɛ ndeke nda palepa ta ŋka. 32Ma 'ya le ŋa ɗa ne, ma 'ya sha gheyɛ: Hweŋkwa va wəndə kaŋka male ta ŋkɛ, keɗema ŋkɛ kenza kawəme geva nya kehitema geva laka wəsə mahalegə. Kwa nza ŋkɛ ma keŋkamte male ta ŋkɛ wəndə ne, nahe ŋkɛ keŋkeyite ŋkɛ yitea mene vale tahe, va nya nza nde katezhɛne kawəme za. Ma kewəmeve male nya ŋkamte za nta wəndə ne, nahe ŋkɛ kemenete vale tahe perə.
Ghena te ghəa zeme fela
33Nahe yɛ kefate ghena nya kegezete nda geva ke mbelia jama vəashi, ma ke: Dzawama na wəmbə fela ta ŋa ma, ama yipəyi wəsə nya meɗeyi ke Mahwətə kwa. 34Ma 'ya sha gheyɛ le ŋa ɗa: zemema fela yɛ ma. Zemema fela yɛ le ŋkwa nya pelɛ ghweme, va nya nza ŋkɛ kapasla ta Shala ma. 35Zemema fela yɛ le hɛɗi va nya nza ŋkɛ kaŋkwa keŋkeɗe seɗa ta Shala, ya le Zhɛrəzalɛm, va nya nza ŋkɛ kameleme ta Meghe nya wəba ma. 36Zemema fela yɛ le ghəa ŋayɛ, va nya nza ŋkɛ kazhɛre shintia ghəa ŋayɛ ŋkereyi keɗema tɛawe tɛawe we. 37Ma vəa ŋkwa nya geze ghena yɛ ne, geze mə e'e keɗema ewə. Va Gətəli se kweci ghena nyi mtsehe mbeli yite.
Ghena te ghəa wa dewa
(LWK 6.29-30)
38Nahe yɛ kefate ghena nya kegezete geva vəashi, ma ke: Ntsə te ntsə, slene te slene. 39Ma 'ya sha gheyɛ le ŋa ɗa: Wama wəsə kwa ndiremi nya menete ŋayɛ wəndə yɛ ma. Ma kempave ŋa wəndə kwa kwete sleme ne, zhɛrave nda kwete perə. 40Ma kekeleghe ŋa wəndə kadzete ghwə kezha kele tɛagwarea ŋa ne, pelakɛ ŋkɛ kakele karalamea ŋa perə. 41Ma keŋkeyite ŋa wəndə yitea dzeghwa gare kilemɛtre kwetɛŋe ne, lə le wəndəa shɛ gare kilemɛtre bake. 42Ma ke'yɛwe wəsə wəndə va gha ne, ndeke nda ŋkɛ, ndaŋema wəndə nya ke'yɛwe dewa va gha na ma.
Ɗe kezha ka ghema
(LWK 6.27-28, 32-36)
43Nahe yɛ kefate ghena nya kegezete geva vəashi, ma ke: Ɗe nde ghedəkwəa ŋa, zlɛ va nde jaga ta ŋa. 44Ma 'ya sha gheyɛ le ŋa ɗa: ɗe mə ka jaga ta ŋayɛ, səkwə mə ghə kezha mbeli nyi keghweze mɛ hwa gheyɛ, 45kezha nza yɛ kaŋwale ganjia Yiteyɛ ŋayɛ nya pelɛ ghweme. Kwa nza ŋkɛ kakele veci ŋkɛ same kwa ghɛ kezha ka 'yaghwa mehele ba'a kezha mbeli ganji, kame nda va ŋkɛ ke mbeli nyi tiɗiɗi tiɗiɗi ba'a nyi ndiremi ndiremi. 46Ma kenza nde mbeli nyi keɗe ŋayɛ yaɗe yɛ nahe ne, yitea wa neghe yɛ kakemave zhɛme va Shala tsagha wa? Ashɛ tsagha mene ka tsehe jaɓeregwale wəka? 47Mze kwa kwelɛke yamtseke yɛ kenza nde deke ka menəhɛ ŋayɛ yaɗe yɛ tsagha na? Ashɛ tsagha mene ka ŋa zlera perə wəka? 48Nza mə kambeli ganji kala Yiteyɛ ŋayɛ nya pelɛ ghweme.

La Bible en langue Kapsiki avec les livres deutérocanoniques © Alliance Biblique du Cameroun 2012. 


Learn More About Ghena ta Shala

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.