Matiye 8

Yɛsə kambe nde derena

(MRK 1.40-45; LWK 5.12-16)

1Cape Yɛsə sawa pelɛ ghweme, mbeli kwele kwele ya kwa sebe ta ŋkɛ. 2Pa kwete nde derena hendeke geva ba'a gwəɗəŋə kwa kema ta ŋkɛ, ma ke shɛ: «Nde sleke ŋkwa, ma keɗe na ne, wərə na kakiɗimte derena ta ɗa wɛŋe.» 3Pa Yɛsə hake dzeve, kwaɗakɛ ŋkɛ, ma ke shɛ: «Kaɗe 'ya, nza wɛŋe.» Taghanyɛ ne, pa derena kiɗinyɛ te wəndəa shɛ. 4Ma ke Yɛsə shɛ ɓiyitsa: «Fa ndeɗekə, geze nda ma na ghena nya ke kwete wəndə ma. Ama kwiɗi ncɛte nda ghəa ŋa ke nde dzeghe Shala, dzeghekɛ melɛ kala nya gezete Moyize kezha ncɛ nda ke mbeli pɛtɛ nahe na kembe.»

Yɛ ta kwete wəndə nya te ghəa ka sewajɛ

(LWK 7.1-10)

5Ma kwa dzembe Kapɛrnawəm Yɛsə ne, pa kwete wəndə nya te ghəa ka sewajɛa ka Rome hendeke nda geva, ntəŋə ŋkɛ yitea mpi nda dzeve ke Yɛsə kezha kemane. 6Ma ke shɛ: «Nde sleke ŋkwa, nahe nde mene slene ta ɗa kenza shewə ki ghɛ, kemte mte geva ta ŋkɛ, kwele kwele sa titikwə ŋkɛ.» 7Ma ke Yɛsə shɛ: «Katelə 'ya kambe ŋkɛ.» 8Ma ke wəndə nya te ghəa ka sewajɛa shɛhɛ shɛ: «Nde sleke ŋkwa, kehi 'ya kawəndə nya dzeki ghɛa ŋkɛ na we. Ɗa ma ta ŋa kegezete ghena ne, katembe nde mene slene ta ɗa. 9'Ya le ghəa ɗa ne, kafa nda ghena 'ya ke mbelia jama nyi kənəa 'ya, le ka sewajɛ va 'ya nyi kefa ɗa ghena perə: Kwiɗi, 'ya sha kwete, ntəŋə ŋkɛ. Nde, 'ya sha kwete, kase ŋkɛ. Menete nya, 'ya sha mava ta ɗa, kamene wəsəa shɛ ŋkɛ.» 10Ma kwa fate ghena shɛ Yɛsə ne, hake ŋkɛ. Ma ke sha mbeli nyi ketəkwə təkwə: «Kaganda ne, ma 'ya sha gheyɛ: kegha 'ya kanakɛ yɛ nya kala nya hwa ka Israyɛl we. 11Kaganda ne, ma 'ya sha gheyɛ: katese mbeli same kwa ŋkwa kesame ta veci ba'a ŋkwa kepəkwə ta ŋkɛ, katezeme wəsə kezeme hɛ le Abraham, Izak ba'a Zhakob mbe Meghe nya pelɛ ghweme. 12Ama mbeli nyi keveyi geva vəashi kezha dzembe Meghe nya pelɛ ghweme ne, katenegha hɛ mbeli pelɛke te ŋwela mbe ŋkwesle, te ŋkwa ne, katenehwene hɛ ba'a katempeɗe slene hɛ.» 13Ma ke Yɛsə sha wəndə nya te ghəa ka sewajɛa shɛ: Kwiɗi sha ghɛa ŋa, katemene ŋa geva ŋkɛ kala nya yɛte na. Te vəa shɛ ne, pələsə nde mene slene ta wəndəa shɛ mbenyɛ.

Yɛsə kambe ka zereghwe kwele kwele

(MRK 1.29-34; LWK 4.38-41)

14Ntəŋə Yɛsə kadzeki ghɛa Piyɛre. Pa ŋkɛ nakɛ kwa hawe ta Piyɛre meɓelahe, shewə va ɗawa. 15Ma kwa kwaɗakɛ Yɛsə le dzeve, pa ɗawa ta nta kiɗinyɛ, pa nde sate, pa nde takɛ nda wəsə kezeme ke hɛ.

16Ma kwa se tɛhwɛɗi ne, pa mbeli fəke nda ka 'yi'yɛghwə kwele kwele ke Yɛsə, deke le ghena ta ŋkɛ ŋkamte 'yi'yɛghwə Yɛsə shave mbe mbelia shɛhɛ, pa mbete pɛtɛa ka zereghwea shɛhɛ. 17Kezha yipə ghena ta Ɛzayi, nde mɛ ŋkwa nda menete geva ŋkɛ kala nya, ma ke: Nahe ŋkɛ kekelehwe yaka nyi te gheɓəmə, nahe ŋkɛ keveyi zereghwe ta ɓəmə kwa ghəa ŋkɛ.

Mbeli nyi keɗe katəkwə təkwə Yɛsə

(LWK 9.57-62)

18Newe ke Yɛsə ne, kwele kwele mbeli kwa sebe ta ŋkɛ. Pa ŋkɛ geze nda ke mbeli nyi ketəkwə təkwə ŋkɛ kajive kwete kema ta ndərə. 19Pa nde rafe wəsə mahalegəa Shala hendeke nda geva, ma ke: «Nde sleke ɗa, katetəkwə təkwə ŋa 'ya ya tema tema telə na.» 20Ma ke Yɛsə shɛ: «Ghɛa nci ya va yɛ mbeyiga ba'a yɛ 'yɛ, ama Wəzege ta za, ghwəli shɛ ve gare zhɛne mpi ŋkɛ mbe we.» 21Ma ke kwete wəndə sha Yɛsə hwa mbeli nyi ketəkwə təkwə: «Nde sleke ŋkwa, pelave ɗa hweŋkwa lə 'ya kalamte yiteyɛ ɗa kaba.» 22Ma ke Yɛsə shɛ: «Zele ɗa, sərəakɛ ka mpə mpə kala ka mpə mpəa nci.»

Yɛsə kagweɗakwe sefə te ndərə

(MRK 4.35-41; LWK 8.22-25)

23Tarame Yɛsə pelɛ kwambelə, cape mbeli nyi ketəkwə təkwə yite. 24Tewə ketemə ne, pa sefə nya wəba vɛte geva te ndərə, ntake yɛ gaŋkeɓe ta ndərə kasheke geva kadzawa kwambelə. Ama nahe Yɛsə kenza yitea hɛ. 25Pa mbeli nyi ketəkwə təkwə feɗeghete ŋkɛ, ma ke hɛ: «Nde sleke ŋkwa, mbelete n'yɛ. Ghen'yɛ kateza.» 26Ma ke Yɛsə sha hɛ: «Va wa ghazlənə yɛ wa? Kenaka yɛ kayɛte Shala wəka?» Pelɛhetɛme ŋkɛ sate, pa ŋkɛ ntsehete nda ŋzle ke yɛ sefə le yɛmə. Gweɗakwe hɛ. 27Heɓake mbeli. Ma ke hɛ: Wa nya hwelefe ta wəndə nda fa nda ghena yɛ sefə le yɛmə wa?

Yɛsə kambe ka 'yi'yɛghwə bake

(MRK 5.1-20; LWK 8.26-39)

28Ma kwa ntsehe Yɛsə pelɛ kema ta ndərə, te hɛɗia ka Gadara ne, pa kweci bake mbeli shave hwa kwele kase shɛ. Ma mbeli nyi bakea shɛhɛ ne, ka yi'yɛghwə hɛ tsape tsape, wəndə shɛ kadzeghwa kwa hweŋkwa shɛ va hɛ we. 29Ma ke hɛ tsate lewela: Wa yaɗe na va ghen'yɛ wa, Wəzege ta Shala? Gha se teke kaza n'yɛ tewə və kenaka kase na? 30Ma te ŋkwa shɛ, kweci gərədə kwele kwele ya shɛ kazele wəshi kezeme ta nci cakeɗake ɓɛhwɛ yitea hɛ. 31Ma ke 'yi'yɛghwəa shɛhɛ səkwəve hweŋkwa va Yɛsə: «Ma keɗe na kaŋka n'yɛ ne, ghweneghe n'yɛ kadzembe gərədə nyi.» 32Ma ke Yɛsə sha hɛ: «Kwiɗi mə.» Pa hɛ shavenji mbe mbeli nyi bakea shɛhɛ ba'a dzembenji mbe yɛ gərədə. Kwesayɛ pɛtɛa gərədəa shɛhɛ le hwɛ sawa pelɛ wəmbə kadzawa ndərə. Pa hɛ mpənji pɛtɛ.

33Kweracɛ ka ya gərədəa shɛhɛ hwɛnji, pa hɛ dzembe meleme ba'a gezete pɛtɛa wəshi nyi kemenete geva ba'a wəsə nya kemenete nda geva ke ka 'yi'yɛghwə nyi bakea shɛhɛ. 34Pa pɛtɛa mbeli nyi mbe meleme shave kezha begeme le Yɛsə. Ma kwa nakɛ Yɛsə hɛ ne, Ntake hɛ katsa nda təhwətə kezha slənyɛ ŋkɛ te hɛɗia nci.

Currently Selected:

Matiye 8: BEKDC12

Highlight

Copy