Matiye 12
12
Yɛsə ba'a veci kezhɛne mpi
(MRK 2.23-28; LWK 6.1-5)
1Ma te kwete və ne, cape Yɛsə jive mbe kweci wəvea ha te veci kezhɛne mpi. Shewə mbeli nyi ketəkwə təkwə va ma, ntake hɛ kaɓele ha kezha zeme. 2Ma kwa nakɛ hɛ ka Fariziyɛn ne, ma ke hɛ sha Yɛsə: «Newe ma mbelia ŋa kamene wəsə nya fɛa ɓəmə wəsə mahalegəa Shala kemene te veci kezhɛne mpi gi!» 3Ma ke Yɛsə sha hɛ: «Kegha yɛ kajaŋgate wəsə nya menete David vəa ŋkwa nya nza hɛ shewə va ma le mbelia ŋkɛ wəka? 4Pa ŋkɛ dzembe ghɛa Shala le mbelia ŋkɛ, pa hɛ zehwe ɗafa nya veyi mbeli ke Shala. Ndagwara kendeke nda hweŋkwa wəsə mahalegəa ɓəmə ke hɛ we, deke ka dzeghe Shala ka zeme ŋkɛ. 5Na, kegha yɛ jaŋgate mbe palepa ta wəsə mahalegəa Shala wəka? Kafɛa ka dzeghe Shala wəsə mahalegəa shɛ kemene slene mbe ghɛa Shala te veci kezhɛne mpi we. 6Fəyitekeghə ne, ma 'ya sha gheyɛ: wəndə nya kwele ma ke ghɛa Shala ya shɛ teke. 7Ma nda nahe yɛ kefave ghena nyi mbe Ghena ta Shala: Zhɛ heli yaɗe 'ya, kaɗema kamelɛ nyi dzeghe ɗa mbeli le wəshi keseɗa, ne, nza katendeke nda fete yɛ ke mbeli nyi ɗema nyi fete va hɛ we. 8Kwa nza ŋkɛ ne, Wəzege ta za ya kande sleke veci kezhɛne mpi.»
Wəndə nya kemte mtea dzeve
(MRK 3.1-6; LWK 6.6-11)
9Pa Yɛsə slənyɛ te ŋkwa shɛ ba'a lə kadzembe cɛ kesəkwə ghə ta nci. 10Tagha ne, kwete wəndə nya kemte mtea dzeve ya shɛ. Kaɗe mbeli nyi te ŋkwa shɛ kave nda fete ke Yɛsə, ma ke hɛ 'yɛwete ve: «Nahe wəsə mahalegəa Shala kepelakɛ ɓəmə kambele ŋkwa te veci kezhɛne mpi na? 11Ma ke Yɛsə sha hɛ: Ya kwete təmə va kwete wəndəa ŋayɛ. Ma keteɗe ŋkɛ kadzawa ki te veci kezhɛne mpi, kalə ŋkɛ kakele ŋkɛ same kwa wəka? 12Ashɛ za ma wəndə ŋelɛ ke təmə wəka? Ma nda tsagha ŋkɛ ne, nahe wəsə mahalegəa ɓəmə kepelakɛ wəndə kamene ganyɛ te veci kezhɛne mpi.» 13Ma ke Yɛsə sha wəndəa shɛ: «Nteɗete dzeve ta ŋa.» Ma kwa nteɗete ŋkɛ, pa dzeve ta ŋkɛ zhɛrenyɛ megela kala kwete. 14Cape ka Fariziyɛn shavenji ba'a tsenete geva kezha sepa ntsehwele kepesle Yɛsə.
Nde mene slene nya ntave Shala
15Ma kwa fate ghena shɛ Yɛsə, pa slənyɛ te ŋkwa shɛ, pa mbeli kwele kwele təkwə təkwəte ŋkɛ. Pa ŋkɛ mbete pɛtɛa ka zereghwe. 16Ama pa gezete nda ke hɛ le berete kezha ɗema hɛ kageze nda nza ta ŋkɛ ke mbeli, 17yitea yipə geva ghena ta Ɛzayi, nde mɛ ŋkwa nda gezete ŋkɛ kala nyagha. 18Ma ke Shala gezete:
«Wa nya nde mene slene ta ɗa nya ntave 'ya,
nya ɗehwe 'ya nya.
Zeɗehwe ɗa nta nya ntave ŋkɛ 'ya.
Kateve Sefəa ɗa 'ya kənə.
Gheŋkɛ nde tencɛ nda hweŋkwa ta meha ghwə ta ɗa tiɗiɗi ke hwelefefi.
19Kateŋgezle ŋkɛ we, katsa lewela ŋkɛ we.
Katefa ŋgezle ta ŋkɛ mbeli dzeyi kwa hweŋkwa we.
20Kateɓele ha nya ketəɓəsə təɓəsə ŋkɛ we.
Katepesle paterela nya ghelizhi ŋkɛ we.
Tsetse temene ŋkɛ hwa'a te veci nya tehərə ŋkwa ŋkɛ le wəsə nya kehi.
21Pɛtɛa hwelefefi kateve ghə te gheŋkɛ.»
Yɛsə kazhɛne ghena te fete nya ndeke nda mbeli
(MRK 3.22-30; LWK 11.14-23)
22Pa mbeli keleke nda kwete wəndə nya kaghwələ nya kamədəŋə, va nya nza 'yi'yɛghwə yitea ghə ve. Pa Yɛsə mbete ŋkɛ, ntake ŋkɛ kageze ghena ba'a kanewe ŋkwa wɛŋe. 23Hehake mbeli nyi tagha, ma ke hɛ gezete: «Kaɗema wəndə nya kenza Wəzege ta David na? 24Ama kwa fate ghena shɛ ka Fariziyɛn, ma ke hɛ: Ma nda ŋka 'yi'yɛghwə wəndə nya ne, va nya ndeke nda berete Bɛlzɛbəl, wəndə nya te ghəa yɛ 'yi'yɛghwə. 25Ama nahe Yɛsə keɗepe ghena nyi zəzə hɛ. Ma ke sha hɛ: Yayata hɛɗi meghe nya heɗe geva mbelia ŋkɛ ne, kanza hɛɗi meghea shɛ we. Ma kenza mbeli nyi mbe meleme keɗema nyi ki ghɛ kampa kwelɛ ghəa nci ne, kanzate nza melemea shɛ keɗema ghɛa shɛ we. 26Ma kenza Satan kaŋka Satan ne, mpa yampa ŋkɛ le ghəa ŋkɛ, kanzate nza hɛɗi meghea ŋkɛ tsagha na? 27Ma nda le berete ta Bɛlzɛbəl ŋka yɛ 'yi'yɛghwə 'ya ne, le wa ŋka mbelia ŋayɛ tsagha wa? Mbelia ŋayɛ ka ve ŋayɛ fete tse wəka? 28Ama kenza nde le Sefəa Shala ŋka 'yi'yɛghwə 'ya ne, nahe Meghea Shala kese kadzehwa gheyɛ tsagha.
29Wəndə shɛ kadzeki ghɛa nde berete kezha fə wəshia ŋkɛ keɗema ŋkɛ kehwepete wəndə nya beretea shɛ kaba we. Ma kwa sebe ta nya hwepete ŋkɛ ne, wərə ŋkɛ kafəhwe pɛtɛa wəshia nyi ki ghɛa ŋkɛ.
30Nde jaga ta ɗa wəndə nya keɗema kamcɛ ɗa, kande taze ŋkwa wəndə nya keɗema kakemane ɗa katsene ŋkwa. 31Vatse gɛ ne, ma 'ya sha gheyɛ: katekelemte geva pɛtɛa jaɗafa ba'a pɛtɛ ŋele nyi ŋelekɛ Shala wəndə te wənə. Ama wəndə nya keŋelekɛ Sefəa Shala ne, katekelemte geva ŋkɛ te wənə we. 32Katekelemte geva ghena kwa ndiremi nyi gezete wəndə te Wəzege ta za te wənə, ama wəndə nya kegeze ghena kwa ndiremi te Sefəa Shala, katekelemte geva ŋkɛ te wənə ya tsetsenya, ya te kwete hɛ we.
Te yɛ ya ta ŋkɛ nza mbeli kaɗepe wəfe
(LWK 6.43-45)
33Te wəfe nya ganyɛ nza mbeli kandave ya ganji, te wəfe nya ndiremi nza mbeli kandave ya nyi ndiremi ndiremi, kwa nza nde te ya ta ŋkɛ ɗepe nza ta wəfe mbeli. 34Hwelefefia mentsape. Tsema nza yɛ kagezete ghena ganyɛ kaka 'yaghwa mehele yɛ wa? Wəshi nyi nza wənə viɗi ve yageze mɛ. 35Ma nde ganyɛa mehele ne, wəshi nyi ganji yakele ŋkɛ same kwa tame ta ŋkɛ. Ma nde ndiremia mehele ne, wəsə kwa ndiremi yakele ŋkɛ same kwa tame ta ŋkɛ. 36Kaganda ne, ma 'ya sha gheyɛ: ma vəa ŋkwa nya temeha ghwə Shala te mbeli ne, katezhɛne ghena mbeli te pɛtɛa ghena nyi kehima nyi se hɛ kageze. 37Kwa nza nde te ghena nyi gezete na temeha ghwə mbeli te gha, te ghena shɛhɛ teve ŋa fete mbeli.»
Mbeli ka'yɛwe wəsə meŋele
(MRK 8.11-12; LWK 11.29-32)
38Ma ke kweci ka rafe wəsə mahalegə ba'a ka Fariziyɛn sha Yɛsə: «Nde sleke ŋkwa, kaɗe n'yɛ kamenete n'yɛ wəsə kencɛ wəsə na.» 39Ma ke Yɛsə sha hɛ: «Nahe mbeli nyi tsetse ŋkwa nyi kenza kaka ndiremia mehele ba'a kambeli nyi keɗema dɛŋe dɛŋe te Shala. Ama wəsə kencɛ wəsə shɛ kateve nda geva ke hɛ we, deke ŋa Zhonas, nde mɛ ŋkwa ta Shala. 40Kala nya menete veci mahekene ba'a viɗi mahekene Zhonas kwa hwəa kelepe nya wəba, tsagha temene veci mahekene ba'a viɗi mahekene Wəzege ta za kwa hɛɗi. 41Ma vəa ŋkwa nya temeha ghwə Shala te mbeli ne, katese ka Ninive kave nda fete ke mbeli nyi tsetsenya. Kwa nza ŋkɛ nahe ka Ninive kezhɛremte nza ta nci vəa ŋkwa nya zlapete nda ghena ta Shala Zhonas ke hɛ. Ama kwete wəndə ya shɛ teke hwa gheyɛ kwele ma ke Zhonas. 42Ma vəa ŋkwa nya temeha ghwə Shala te mbeli ne, katese male nya kameghe laka bela kwa zeme kezha ve nda fete ke mbeli nyi tsetsenya. Kwa nza ŋkɛ nahe malea shɛ kese cakeɗake yitea fa ghena ntsehwele nya geze Salomon. Ama kwete wəndə ya shɛ teke hwa gheyɛ kwele ma ke Salomon.
Zhɛne geva ta 'yi'yɛghwə kase
(LWK 11.24-26)
43Ma keshavenyɛ 'yi'yɛghwə mbe wəndə, kandeŋe ŋkɛ te ɓerama yitea sepa ŋkwa kezhɛne mpi. Ma kendɛare ŋkɛ ve ne, 44ma ke sha geze mbe ghəa ŋkɛ: Megela ma zhɛneghe geva 'ya kalə kadzeki ghɛa ɗa nya se 'ya ki. Ma kwa zhɛneke geva ŋkɛ ne, shaka shaka ghɛa shɛ, ketsale tsale megela, kehi hi ŋkwa nya ki. 45Ntəŋə kalə kaheka kweci 'yi'yɛghwə nyi 'yaghwa 'yaghwa ma ke gheŋkɛ mberefaŋe. Kazhɛne geva hɛ kase, kantishɛ hɛ ki. Vatse nza wəndəa shɛ ndiremi ma ke nya ghalanza. Tsagha tenza ŋkɛ le ka 'yaghwa mehele nyi tsetse ŋkwa.»
Yɛ meghekɛa Yɛsə le ka menəhɛnyɛ
(MRK 3.31-35; LWK 8.19-21)
46Mba Yɛsə kageze nda ghena ke mbeli ne, pɛkwe meghekɛ ba'a ka menəhɛnyɛ. Ghereŋe hɛ pelɛke kwa degha, kaɗe hɛ kageze nda ghena. 47Ma ke kwete wəndə sha Yɛsə: «Wa nya meyɛ ŋa nya pelɛ le ka menəhɛ ŋa. Gha yazele hɛ kezha geze ŋa ghena.» 48Ma ke Yɛsə sha wəndəa shɛ: «Wa ŋkɛ ya kameyɛ ɗa hwa wəndə wa? Kayɛ wa ka kesaka meyɛ ɗa wa?» 49Pa ncɛte mbeli nyi ketəkwə təkwə le dzeve, ma ke gezete: «Newe ma mə, wa nya meyɛ ɗa nya le ka menəhɛ ɗa nyi teke. 50Kwa nza ŋkɛ, ma wəndə nya kemene wəsə nya ɗe Yiteyɛ ɗa nya pelɛ ghweme ne, gheŋkɛ ya kawəza meyɛ ɗa, wəzha ta meyɛ ɗa ba'a meyɛ ɗa.»
Currently Selected:
Matiye 12: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.
Matiye 12
12
Yɛsə ba'a veci kezhɛne mpi
(MRK 2.23-28; LWK 6.1-5)
1Ma te kwete və ne, cape Yɛsə jive mbe kweci wəvea ha te veci kezhɛne mpi. Shewə mbeli nyi ketəkwə təkwə va ma, ntake hɛ kaɓele ha kezha zeme. 2Ma kwa nakɛ hɛ ka Fariziyɛn ne, ma ke hɛ sha Yɛsə: «Newe ma mbelia ŋa kamene wəsə nya fɛa ɓəmə wəsə mahalegəa Shala kemene te veci kezhɛne mpi gi!» 3Ma ke Yɛsə sha hɛ: «Kegha yɛ kajaŋgate wəsə nya menete David vəa ŋkwa nya nza hɛ shewə va ma le mbelia ŋkɛ wəka? 4Pa ŋkɛ dzembe ghɛa Shala le mbelia ŋkɛ, pa hɛ zehwe ɗafa nya veyi mbeli ke Shala. Ndagwara kendeke nda hweŋkwa wəsə mahalegəa ɓəmə ke hɛ we, deke ka dzeghe Shala ka zeme ŋkɛ. 5Na, kegha yɛ jaŋgate mbe palepa ta wəsə mahalegəa Shala wəka? Kafɛa ka dzeghe Shala wəsə mahalegəa shɛ kemene slene mbe ghɛa Shala te veci kezhɛne mpi we. 6Fəyitekeghə ne, ma 'ya sha gheyɛ: wəndə nya kwele ma ke ghɛa Shala ya shɛ teke. 7Ma nda nahe yɛ kefave ghena nyi mbe Ghena ta Shala: Zhɛ heli yaɗe 'ya, kaɗema kamelɛ nyi dzeghe ɗa mbeli le wəshi keseɗa, ne, nza katendeke nda fete yɛ ke mbeli nyi ɗema nyi fete va hɛ we. 8Kwa nza ŋkɛ ne, Wəzege ta za ya kande sleke veci kezhɛne mpi.»
Wəndə nya kemte mtea dzeve
(MRK 3.1-6; LWK 6.6-11)
9Pa Yɛsə slənyɛ te ŋkwa shɛ ba'a lə kadzembe cɛ kesəkwə ghə ta nci. 10Tagha ne, kwete wəndə nya kemte mtea dzeve ya shɛ. Kaɗe mbeli nyi te ŋkwa shɛ kave nda fete ke Yɛsə, ma ke hɛ 'yɛwete ve: «Nahe wəsə mahalegəa Shala kepelakɛ ɓəmə kambele ŋkwa te veci kezhɛne mpi na? 11Ma ke Yɛsə sha hɛ: Ya kwete təmə va kwete wəndəa ŋayɛ. Ma keteɗe ŋkɛ kadzawa ki te veci kezhɛne mpi, kalə ŋkɛ kakele ŋkɛ same kwa wəka? 12Ashɛ za ma wəndə ŋelɛ ke təmə wəka? Ma nda tsagha ŋkɛ ne, nahe wəsə mahalegəa ɓəmə kepelakɛ wəndə kamene ganyɛ te veci kezhɛne mpi.» 13Ma ke Yɛsə sha wəndəa shɛ: «Nteɗete dzeve ta ŋa.» Ma kwa nteɗete ŋkɛ, pa dzeve ta ŋkɛ zhɛrenyɛ megela kala kwete. 14Cape ka Fariziyɛn shavenji ba'a tsenete geva kezha sepa ntsehwele kepesle Yɛsə.
Nde mene slene nya ntave Shala
15Ma kwa fate ghena shɛ Yɛsə, pa slənyɛ te ŋkwa shɛ, pa mbeli kwele kwele təkwə təkwəte ŋkɛ. Pa ŋkɛ mbete pɛtɛa ka zereghwe. 16Ama pa gezete nda ke hɛ le berete kezha ɗema hɛ kageze nda nza ta ŋkɛ ke mbeli, 17yitea yipə geva ghena ta Ɛzayi, nde mɛ ŋkwa nda gezete ŋkɛ kala nyagha. 18Ma ke Shala gezete:
«Wa nya nde mene slene ta ɗa nya ntave 'ya,
nya ɗehwe 'ya nya.
Zeɗehwe ɗa nta nya ntave ŋkɛ 'ya.
Kateve Sefəa ɗa 'ya kənə.
Gheŋkɛ nde tencɛ nda hweŋkwa ta meha ghwə ta ɗa tiɗiɗi ke hwelefefi.
19Kateŋgezle ŋkɛ we, katsa lewela ŋkɛ we.
Katefa ŋgezle ta ŋkɛ mbeli dzeyi kwa hweŋkwa we.
20Kateɓele ha nya ketəɓəsə təɓəsə ŋkɛ we.
Katepesle paterela nya ghelizhi ŋkɛ we.
Tsetse temene ŋkɛ hwa'a te veci nya tehərə ŋkwa ŋkɛ le wəsə nya kehi.
21Pɛtɛa hwelefefi kateve ghə te gheŋkɛ.»
Yɛsə kazhɛne ghena te fete nya ndeke nda mbeli
(MRK 3.22-30; LWK 11.14-23)
22Pa mbeli keleke nda kwete wəndə nya kaghwələ nya kamədəŋə, va nya nza 'yi'yɛghwə yitea ghə ve. Pa Yɛsə mbete ŋkɛ, ntake ŋkɛ kageze ghena ba'a kanewe ŋkwa wɛŋe. 23Hehake mbeli nyi tagha, ma ke hɛ gezete: «Kaɗema wəndə nya kenza Wəzege ta David na? 24Ama kwa fate ghena shɛ ka Fariziyɛn, ma ke hɛ: Ma nda ŋka 'yi'yɛghwə wəndə nya ne, va nya ndeke nda berete Bɛlzɛbəl, wəndə nya te ghəa yɛ 'yi'yɛghwə. 25Ama nahe Yɛsə keɗepe ghena nyi zəzə hɛ. Ma ke sha hɛ: Yayata hɛɗi meghe nya heɗe geva mbelia ŋkɛ ne, kanza hɛɗi meghea shɛ we. Ma kenza mbeli nyi mbe meleme keɗema nyi ki ghɛ kampa kwelɛ ghəa nci ne, kanzate nza melemea shɛ keɗema ghɛa shɛ we. 26Ma kenza Satan kaŋka Satan ne, mpa yampa ŋkɛ le ghəa ŋkɛ, kanzate nza hɛɗi meghea ŋkɛ tsagha na? 27Ma nda le berete ta Bɛlzɛbəl ŋka yɛ 'yi'yɛghwə 'ya ne, le wa ŋka mbelia ŋayɛ tsagha wa? Mbelia ŋayɛ ka ve ŋayɛ fete tse wəka? 28Ama kenza nde le Sefəa Shala ŋka 'yi'yɛghwə 'ya ne, nahe Meghea Shala kese kadzehwa gheyɛ tsagha.
29Wəndə shɛ kadzeki ghɛa nde berete kezha fə wəshia ŋkɛ keɗema ŋkɛ kehwepete wəndə nya beretea shɛ kaba we. Ma kwa sebe ta nya hwepete ŋkɛ ne, wərə ŋkɛ kafəhwe pɛtɛa wəshia nyi ki ghɛa ŋkɛ.
30Nde jaga ta ɗa wəndə nya keɗema kamcɛ ɗa, kande taze ŋkwa wəndə nya keɗema kakemane ɗa katsene ŋkwa. 31Vatse gɛ ne, ma 'ya sha gheyɛ: katekelemte geva pɛtɛa jaɗafa ba'a pɛtɛ ŋele nyi ŋelekɛ Shala wəndə te wənə. Ama wəndə nya keŋelekɛ Sefəa Shala ne, katekelemte geva ŋkɛ te wənə we. 32Katekelemte geva ghena kwa ndiremi nyi gezete wəndə te Wəzege ta za te wənə, ama wəndə nya kegeze ghena kwa ndiremi te Sefəa Shala, katekelemte geva ŋkɛ te wənə ya tsetsenya, ya te kwete hɛ we.
Te yɛ ya ta ŋkɛ nza mbeli kaɗepe wəfe
(LWK 6.43-45)
33Te wəfe nya ganyɛ nza mbeli kandave ya ganji, te wəfe nya ndiremi nza mbeli kandave ya nyi ndiremi ndiremi, kwa nza nde te ya ta ŋkɛ ɗepe nza ta wəfe mbeli. 34Hwelefefia mentsape. Tsema nza yɛ kagezete ghena ganyɛ kaka 'yaghwa mehele yɛ wa? Wəshi nyi nza wənə viɗi ve yageze mɛ. 35Ma nde ganyɛa mehele ne, wəshi nyi ganji yakele ŋkɛ same kwa tame ta ŋkɛ. Ma nde ndiremia mehele ne, wəsə kwa ndiremi yakele ŋkɛ same kwa tame ta ŋkɛ. 36Kaganda ne, ma 'ya sha gheyɛ: ma vəa ŋkwa nya temeha ghwə Shala te mbeli ne, katezhɛne ghena mbeli te pɛtɛa ghena nyi kehima nyi se hɛ kageze. 37Kwa nza nde te ghena nyi gezete na temeha ghwə mbeli te gha, te ghena shɛhɛ teve ŋa fete mbeli.»
Mbeli ka'yɛwe wəsə meŋele
(MRK 8.11-12; LWK 11.29-32)
38Ma ke kweci ka rafe wəsə mahalegə ba'a ka Fariziyɛn sha Yɛsə: «Nde sleke ŋkwa, kaɗe n'yɛ kamenete n'yɛ wəsə kencɛ wəsə na.» 39Ma ke Yɛsə sha hɛ: «Nahe mbeli nyi tsetse ŋkwa nyi kenza kaka ndiremia mehele ba'a kambeli nyi keɗema dɛŋe dɛŋe te Shala. Ama wəsə kencɛ wəsə shɛ kateve nda geva ke hɛ we, deke ŋa Zhonas, nde mɛ ŋkwa ta Shala. 40Kala nya menete veci mahekene ba'a viɗi mahekene Zhonas kwa hwəa kelepe nya wəba, tsagha temene veci mahekene ba'a viɗi mahekene Wəzege ta za kwa hɛɗi. 41Ma vəa ŋkwa nya temeha ghwə Shala te mbeli ne, katese ka Ninive kave nda fete ke mbeli nyi tsetsenya. Kwa nza ŋkɛ nahe ka Ninive kezhɛremte nza ta nci vəa ŋkwa nya zlapete nda ghena ta Shala Zhonas ke hɛ. Ama kwete wəndə ya shɛ teke hwa gheyɛ kwele ma ke Zhonas. 42Ma vəa ŋkwa nya temeha ghwə Shala te mbeli ne, katese male nya kameghe laka bela kwa zeme kezha ve nda fete ke mbeli nyi tsetsenya. Kwa nza ŋkɛ nahe malea shɛ kese cakeɗake yitea fa ghena ntsehwele nya geze Salomon. Ama kwete wəndə ya shɛ teke hwa gheyɛ kwele ma ke Salomon.
Zhɛne geva ta 'yi'yɛghwə kase
(LWK 11.24-26)
43Ma keshavenyɛ 'yi'yɛghwə mbe wəndə, kandeŋe ŋkɛ te ɓerama yitea sepa ŋkwa kezhɛne mpi. Ma kendɛare ŋkɛ ve ne, 44ma ke sha geze mbe ghəa ŋkɛ: Megela ma zhɛneghe geva 'ya kalə kadzeki ghɛa ɗa nya se 'ya ki. Ma kwa zhɛneke geva ŋkɛ ne, shaka shaka ghɛa shɛ, ketsale tsale megela, kehi hi ŋkwa nya ki. 45Ntəŋə kalə kaheka kweci 'yi'yɛghwə nyi 'yaghwa 'yaghwa ma ke gheŋkɛ mberefaŋe. Kazhɛne geva hɛ kase, kantishɛ hɛ ki. Vatse nza wəndəa shɛ ndiremi ma ke nya ghalanza. Tsagha tenza ŋkɛ le ka 'yaghwa mehele nyi tsetse ŋkwa.»
Yɛ meghekɛa Yɛsə le ka menəhɛnyɛ
(MRK 3.31-35; LWK 8.19-21)
46Mba Yɛsə kageze nda ghena ke mbeli ne, pɛkwe meghekɛ ba'a ka menəhɛnyɛ. Ghereŋe hɛ pelɛke kwa degha, kaɗe hɛ kageze nda ghena. 47Ma ke kwete wəndə sha Yɛsə: «Wa nya meyɛ ŋa nya pelɛ le ka menəhɛ ŋa. Gha yazele hɛ kezha geze ŋa ghena.» 48Ma ke Yɛsə sha wəndəa shɛ: «Wa ŋkɛ ya kameyɛ ɗa hwa wəndə wa? Kayɛ wa ka kesaka meyɛ ɗa wa?» 49Pa ncɛte mbeli nyi ketəkwə təkwə le dzeve, ma ke gezete: «Newe ma mə, wa nya meyɛ ɗa nya le ka menəhɛ ɗa nyi teke. 50Kwa nza ŋkɛ, ma wəndə nya kemene wəsə nya ɗe Yiteyɛ ɗa nya pelɛ ghweme ne, gheŋkɛ ya kawəza meyɛ ɗa, wəzha ta meyɛ ɗa ba'a meyɛ ɗa.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.