Nehemaya 9
9
Awe phọ ọgba omitiom ịkaraph phọ ạbidi
1-2Ḍio dị emuneniom ịyaldi rꞌinya sịphe ụnwanyu phọ ọpo phọ, awe phọ Ịzirel uukpomoghan ni ọrol ọkoony esi ịiḅereghi oḍeenaan ọto esi ịkaraph phọ ạbidi. Bịdi mọgbatan ni siloor ạbidi esi aruuruen kụ ọkpologhian rụsuoma ọto, ọḅile ophugha rụmhu ạbidi ọoru oḍeenaan ẹ́ḅaal ologhi, kụ ọmeregha kụ omiigh ootuma ịkaraph dị bịdi rꞌạburude ạburude ạbidi moḍighi. 3Esi ịraar ạwa asuo-kẹny, Ologh Ọmoogh-we Ẹnaan phọ ạbidi ụaal li ghisigh ạbidi kụ esi ịnon ịraar ạwa bịdi uutuma ni ịkaraph ạbidi kụ ooseeny Ọmoogh-we Ẹnaan phọ ạbidi.
4Ẹkaanaan ịyaar ọdagh ịrol li ẹlo ạbuo aLivai, kụ bụen kụ ụdagh bọ ịyaar phọ: aJesua, Bani, Kạdmiel, Sebanaya, Buni, Serebaya, Bani rꞌaKenani. Bịdi ụuḅereghi ni Ọmoogh-we Ẹnaan phọ ạbidi rꞌẹḍogh dị kọnaghan.
5Bụen kụ ạbuo aLivai dị ọma ḍịmagh ooseeny Ẹnaan: aJesua, Kạdmiel, Bani, Hasabneya, Serebaya, Hodaya, Sebanaya rꞌaPetahaya. Bịdi ụḅem mọ,
“Ịmeera eboom Ọmoogh-we Ẹnaan phọ anyina;
iboom nyọdi kꞌagee-pọ kꞌagee-pọ!
Tọrobo oye aboom ḍien eghuan phọ ọdi,
ghạlamo ịdipho oboomi ọdi dị oye kạngo úlho bọ ni dị ạbugh ạgbaanyan.”
Ịiḅereghi iituma
6Kụ awe phọ Ịzirel ọoḅereghi ịduon:
“Nạ Ọmoogh-we, nạ bịn kụ Ọmoogh-we phọ;
nạ kụ ụlhem de rꞌotu-ḅualhe rꞌoomo ạraraar phọ edi bọ ologhi ạbidi;
nạ kụ ụngo ghuḍum oomo phọ ạbidi.
Ịikpo phọ ịpe edi bọ kꞌạke phọ ekpuḍian ni reeseeny nyịna.
7 #
Emi 11.31; 12.1;
Emi 17.5
Nạ Ọmoogh-we Ẹnaan phọ kụ ụsaḅar bọ ni Ebram
kụ aḍiemiom nyọdi omite aUr ẹpe Bạbilonia;
nạ kụ unme bọ ni ḍien phọ ọdi aghol mọ Ebraham.
8 #
Emi 15.18-21
Nạ ụwa ni ạmiin mọ ọdi aḍuom ni nyịna ologhi,
kụ nạ aghiran ịyo rꞌọdi
Nạ uguanaan ọngo ọdi de awe aKenanait rꞌade ạbuo ạHitait rꞌạbuo Ạmorait,
rꞌade ạbuo ạPerezait, rꞌade ạbuo Jebusait rꞌade ạbuo aGirgasait,
oḍighi ade dị oghiil ạnmuny ọdi kotugh.
Nạ ụphamanam ni ruguanaan phọ ạna loor esi dị nạ oye oḍuom ologhi.
9 #
Ẹḍua 3.7;
Ẹḍua 14.10-12
“Nạ ụmiin ni ịpe ạburude ạburude phọ ayoor ọmiinom bọ ẹpe Ijipt;
nạ ụnaghanan ni ḍịmagh ọloghonaan ạḍighaagh phọ ạbidi sịphe Ọphiiny Igbilha phọ
10 #
Ẹḍua 7.8—12.32
Nạ uḍighi rạraar ịiḍaany esi ọdaam mọ,
esi ạbuo ịtooghi phọ ọdi rꞌawe eelhe phọ ọdi,
loor esi dị nạ ulegheri ni ịdi bịdi ọmiine we phọ ạna.
Nạ akola ni ḍien igbogh esi ạbidi kꞌarodon.
11 #
Ẹḍua 14.21-29;
Ẹḍua 15.4, 5 Esi ọphiiny bịn nạ ạmitiomonaan ni we phọ ạna eten
kụ aḍiemiom bịdi sịphe ạḍigharaghar ade phọ.
Awe phọ ophorogh bọ bịdi uḅi ni ogbo ạmuum mọ
ịdipho aḍighiigh reḅi ghan bọ ologhi ạmuum.
12 #
Ẹḍua 13.21, 22 Nạ uḍiemiom bịdi rꞌeekpoogh ọotu mem ootaany,
kụ ḍughul nạ uḍiemiom bịdi rꞌeekpoogh ạnian.
13 #
Ẹḍua 19.18—23.33
Ẹpe Eegum aSainai nạ ạḍua kꞌạke asoor ude;
Nạ ụḅaanaan we ạna
kụ ạngo bịdi igey iilogh rꞌịma ịtughemi.
14Nạ ụtughemi bịdi oseere aḍio ophooghian phọ ạna iigbia,
kụ esi aMozis otelhedom mọ ạna kụ ẹdi nạ ạngo bịdi iilogh phọ ạna.
15 #
Ẹḍua 16.4-15;
Ẹḍua 17.1-7;
Dut 1.21
“Mem dị ọkoony asiph bịdi, nạ ụngo ni bịdi eḍien dị ẹḍua kꞌạke,
rꞌạmuum dị ạḍua esi aḍighiigh mem ọkoony ạmuum.
Nạ ụḅeni bịdi mọ ophogh de phọ ạḍiphe
nạ aguanaan bọ ọngo ạbidi.
16 #
Igb 14.1-4; Dut 1.26-33 Kụ ọlo ạburude ạburude phọ ayoor ologhoma igbogh rꞌọḅaar ẹmhu
kụ úmeera úḍighi ịlo nạ ạḅem mọ oḍighi.
17 #
Ẹḍua 34.6; Igb 14.18 Bịdi úmeeraam ụ́naghanan; bịdi uwula ni oomo phọ ịpe nạ aḍighi bọ;
bịdi uwula ni ịiḍaany phọ nạ aḍighi bọ.
Esi ologhoma igbogh, bịdi ụsaḅar ri oḍiemiom
dị kạsighe bịdi aḅulemi Ijipt ẹpe ạdol ạrebene phọ.
Kụ nạ Ẹnaan dị rạsar ghan kạwilenaan;
nạ oye ạghusan rꞌẹphomoghian dị ráagborion ghan oḍeenaan ịghagh iloghi.
Ọnma ighirigiir ạna ạbugh ni; kụ nạ bịdi ọ́gunom.
18 #
Ẹḍua 32.1-4
Bịdi ụka ni ịyaar ọoḅereghi dị ẹghigh mọony aḍilephiri ạnam
kụ ọḅem mọ ẹpe kụ ịyaar phọ eḍiemiom bọ bụno omite Ijipt!
Pọ eeghe ịdi ọgilaam nyịna Ọmoogh-we.
19 #
Dut 8.2-4
Kụ nạ ọ́wile bịdi ẹpe ẹdala phọ
ịdi eḍighi bọ ọnma ighirigiir phọ ạna ạbugh ni.
Nạ ọ́gbole ọotu phọ mꞌạnian phọ ịpe eḍeenaan bọ bịdi ḍughul rꞌootaany.
20Esi ẹnighe ologhi phọ ạna, nạ ụḅeni ni bịdi ịdi ẹkpe oḍighi;
nạ ụngo ni bịdi eḍien ạmana, ạḅile ạngo bịdi mụum ọphughol.
21Esi inyadi ạsia ẹpe ẹdala phọ, nạ ụngo ni bịdi tọrobo ịyaar lọ bịdi ọwa;
arukpe ạbidi ị́panyuan, kụ ạrada ạbidi íḅerenu rꞌeephina.
22 #
Igb 21.21-35
“Nạ ụngo ni bịdi ịnyaam ọkpar opu areelhe rꞌạramar,
rạmha dị ẹkuanagh bịdi.
Bịdi eeghi ni ọkpar opu de aHesbon, ẹpe aSihon kụ ạda bọ,
rꞌade ạBasan, ẹpe Ọg kụ aḍighi bọ ọdaam.
23 #
Emi 15.5; 22.17;
Jos 3.14-17
Nạ ụngo bịdi ịbadibadi ạnmuny ịdipho ạraanaan phọ ịpe edi bọ okuaḍio phọ,
kụ ạngo bịdi ịnyaam ọkpar opu kụ orugh sịphe ade phọ
nạ aguanaan bọ ọngo bụrude ạburude ạbidi.
24 #
Jos 11.23
Bịdi ụkpar ri opu we ade phọ aKenan.
Nạ ụkpar ri apu we phọ orugh bọ ẹpe.
Nạ ụngo ni we phọ ạna ịnyaam oḍighi ịlo ẹḅeeraan bịdi
oḍighi awe ḅịle rꞌạraalha aKenan.
25 #
Dut 6.10, 11 Awe phọ ạna eeghian ni ọsighiogh rạmha dị ophiighiom rꞌịikpo,
de ẹnuum, ruutu dị aruphua emuza
rꞌariini ạmuum ọphughol dị oguphogh,
ireeny ọliv, ireeny iimuma, rꞌiizo avain.
Bịdi ule ni tọrobo ịyaar lọ bịdi ọwa, kụ ọbughogh;
bịdi ụghelom ni oomo ịma ạraraar phọ nạ ạngo bọ bịdi.
26 #
Ịir 2.11-16
“Kụ awe phọ ạna ụḅaar ri ẹmhu kụ ụ́naghanan nyịna;
bịdi ụgumom ni ọman Ologh phọ ạna.
Bịdi ụze ni riil phọ ọphur ghan bọ bịdi rụru,
bụphe ọḅeni ghan bọ bịdi mọ okiton osoman nyịna.
Bịdi ụgilaam ni nyịna mem etum mem,
27kụ nạ ạngo ọgel mọ ạbumulogh-ḍien ọkpar opu bịdi kụ ọda.
Mem ịiḅaghami bịdi ụmagh ni nyịna ọloghonaan ạḍighaagh,
kụ nạ ạḍua ni kꞌạke ạnaghanan bịdi.
Esi oboom ọnma ighirigiir phọ ạna, nạ uruom ni bịdi buḍiemiom
dị ọtagharan bịdi esi ạbumulogh-ḍien ạbidi.
28Mem dị ẹepho mẹrol, kụ bịdi ọḅile oḍighi ịkaraph,
kụ nạ ạḅile ạngo ọgel mọ ạbumulogh-ḍien ọkpar opu bịdi.
Kụ mem dị bịdi okiton kụ ọlom nyịna ọphel ạbidi,
kꞌẹpe kꞌạke nạ ụnaghan ni, kụ amem etum mem
nạ ụtagharan ni bịdi esi oboom ọnma ighirigiir phọ ạna.
29 #
Lịv 18.5
Nạ ụphur ri bịdi rụru mọ ọnaghanan ịtughemi phọ ạna,
kụ esi ologhoma igbogh, bịdi ughel li iilogh phọ ạna,
ọbo, ooko ghan Ologh phọ ạna kụ eten aghuḍum.
Kụ esi ọḅaar ẹmhu rꞌẹ́naghanan, bịdi ughel li ọnaghanan.
30 #
2 Ạbud 17.13-18; 2 Krọ 36.15, 16 Lhạ etum lhạ rꞌọkparam nạ ụphur ghan ni bịdi rụru.
Nạ ụlogh aani uwaloor esi ariil phọ ạna mọ ọghaaph,
kụ awe phọ ạna ụḅaaghaph ni,
kụ nạ ạngo ọgel mọ ịnon areelhe ọkpar opu bịdi.
31Kụ kẹn ni, loor esi ogbogh ọnma ighirigiir phọ ạna,
nạ óghinom, ḅịle óphiemi bịdi.
Nạ Ẹnaan ạghusan rꞌọnma ighirigiir.
32 #
2 Ạbud 15.19, 29; 17.3-6; Ẹzra 4.2, 10 “Ẹnaan, Ẹnaan phọ ayoor, pọ eeghe ịdi nạ ạbugh!
Pọ eeghe ịdi nạ aḍigh eegu, ạḅile ạmoogh ịikpo.
Nạ ạkar raako ghan ruguanaan ịyo phọ nạ aghiran bọ.
Emiigh kꞌamem mọ ạbudaam Asiria phọ ụkpiloghom bọ iyoor
kụ kꞌạnyiidipho ni, ọmiinom mọ ayoor mạbugh ni iboom!
Ạbudaam ayoor rꞌabuḍiemiom rꞌariil ạrikia rꞌariil kꞌẸnaan,
ạburude ạburude rꞌoomo awe phọ ayoor mọmiinom ni.
Tụutughian ni oomo ịpe yoor mọmiinom bọ.
33Ịpe nạ ụliom bọ iyoor eḍighi ni ịne;
nạ kőbi, ghạlamo ịduon yoor moḍighi bọ ni ịkaraph.
34Ạburude ạburude ayoor, ạbudaam mọ, abuḍiemiom mọ rꞌariil ạrikia phọ,
úuko Ologh phọ ạna.
Bịdi ụ́naghanan ikpo ọnhu phọ ạna rꞌọphur ạruru phọ.
35Esi ạḍiseph ạna, ạraalha ụda ni we phọ ạna
mem dị bịdi orugh ẹeregha ade ẹnuum mọ nạ ạngo bọ bịdi;
kụ bịdi ọwile okiton esi ịkaraph okumu ạna.
36Kụ nyịidipho yoor ạrebene sịphe ade phọ nạ ụngo bọ iyoor,
ịma ade ẹnuum mọ rịngo ghan bọ iyoor eḍien.
37Tọrobo ịyaar lọ ade phọ emitiom rekeel ghan rạghaagh ạbudaam mọ,
bụphe nạ ạngo bọ ọda ayoor loor ẹmhu ọpioman ayoor.
Bịdi ruḍighinom ghan iyoor rꞌịnam mọ ayoor ịlo ẹḅeeraan bịdi,
kụ yoor odi ni rꞌoboom amukum ologhi.”
Awe phọ ọviilom ḍịghaagh ḍịnya oghiran ịyo
38Loor esi oomo phọ ịpe memite bọ, yoor awe phọ Ịzirel omiighe loor kụ ọgian ḍịnya oghiran ịyo kụ abuḍiemiom mọ, awe ạbuo aLivai, ariil ạrikia phọ ayoor, kụ oomo awe ọviilom ni rạghaagh.
Currently Selected:
Nehemaya 9: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
