Nehemaya 8
8
Ẹzra ạal iilogh phọ ạḅeni we phọ
1Esi omuneniom oḍual ụnwanyu phọ, awe phọ Ịzirel mọmoogh sịdol dị memiigh ẹpe ạramha phọ. Ḍịḅel aḍio ụnwanyu phọ ọpo, oomo awe uukpomoghan ni ẹpe Jeruselem sịphe egbogh erugh phọ, ologhi ịsiphe rokol ghan bọ mọ Ọnhu-aḍibuo Ạmuum mọ. Kụ bịdi ọḅeni Ẹzra, oyil ạrikia rꞌoye ịtuugha Ologh phọ ọpo Ọmoogh-we phọ kụ ạngo bọ we phọ Ịzirel esi aMozis, mọ ạghi ạsighe ḍịnya Ologh phọ. 2Kụ Ẹzra ạsighe aru sịphe oomo awe phọ mookpomoghan bọ, alephiri rꞌạnmariir rꞌịbam ạnmuny dị mọmanam ọnaghanan ạḍughum. 3Sịphe egbogh erugh phọ ọgbal ọnhu-aḍibuo phọ kụ ẹdi ọdi ạal bọ Ologh phọ ạḅeni bịdi, emiigh ḍịroor kụ ẹghi ẹteeny ootaany, kụ oomo phọ ạbidi ọmaar ọnaghanan.
4Ẹzra ạmeera ạnyu ịkaaneen ireeny dị ọtuan ẹyaal phọ kụ oḍighi. Ḍịghaagh elhiom ọdi ọmeregha aMatitaya, Sema, Anaya, Yuraya, Hịlkaya rꞌaMaaseya; ḍịghaagh ekeeny ọdi aPedaya, Mịsael, Malkaija, Hasum, Hasbadana, Zẹkaraya rꞌaMesulam.
5Ịdipho Ẹzra ạmeera bọ ạnyu ireeny phọ ephoph bọ epu we phọ, oomo awe phọ usomoghi nyọdi riḍien ạbidi. Ọdi rakpegheron bọ ḍịnya phọ bịn oomo awe phọ oḅerenu ọmeera. 6Kụ Ẹzra ạḅem mọ, “Iboom Ọmoogh-we phọ, egbogh Ẹnaan phọ!”
Oomo phọ awe phọ uphophoghi rạghaagh ạbidi ọghiom ạnyu kụ ọphagharanaan mọ, “Ẹrol li ịdipho! Ẹrol li ịdipho!” Kụ bịdi okpuḍughian rꞌasighisigh dị ozumeri yogh ude ooseeny Ẹnaan.
7Kụ bịdi oḅerenu ọmeregha riisi lọ ẹkpe ọmeera kụ awe ạbuo aLivai phọ ạbuen ọgo bọ kụ uuleghemi ghan Ologh phọ ọḅeni bịdi: Jesua, Bani, Serebaya, Jamin, Akub, Sabetai, Hodaya, Maaseya, Kelita, Azaria, Jọzabad, Hanan rꞌaPelaya. 8Bịdi ukiton ni ọnhu phọ ọghaaph Ologh phọ Ẹnaan ọogelion ịdi awe phọ kọnaghanan kụ ogananami ẹmhu phọ.
9Mem dị awe phọ ọnaghanan bọ ịpe Ologh phọ ạḅem bọ, ịḅogh ni bịdi sịphe arokpom mọ, kụ bịdi omiigh emoghi. Esi ịduon phọ, aNehemaya ọdaam mọ, Ẹzra oyil ạrikia rꞌoye ịtuugha Ologh phọ, rꞌạbuo aLivai ạbuphe ọghaaph ghan bọ Ologh phọ ogananami ẹmhu phọ, ụḅeni ni oomo awe phọ mọ, “Aḍio phọ arodon aḍio iigbia Ọmoogh-we Ẹnaan phọ anyina, kụ ịduon kụ iḍighi ịyaar dị nyina kẹ́moogh ọto ḅịle mꞌemoghi. 10Nyịidipho, ikeel ologhi otu ẹmoogh malhe, edi ẹngo aani bụlo ịyaar ụ́moogh. Arodon aḍio iigbia Ọmoogh-we phọ ayira, kụ oye kúkururu. Iboh phọ ịpe Ọmoogh-we phọ rịngo ghan bọ inyina kịkparami ni inyina.”
11Ạbuo aLivai phọ urelhe yogh ni ọḅeni ghan awe phọ mọ kụ́to ọto ọdo aḍio dị ẹrol ịduon. 12Kụ awe phọ ogheel iloghi aruutu ạbidi, ole, ọphughol rꞌibo, ọḅile ọngo aani bụlo ụ́moogh, ịdi eḍighi bọ bịdi ụnaghanan ni ịpe ạal bọ ọḅeni bịdi.
Ẹyaal arugbogo
13Ẹpheri phọ aḍio phọ abuḍiemiom aropolo phọ ọḅophoghan rꞌariil ạrikia rꞌạbuo aLivai kụ ọghi ọteeny Ẹzra ọtuugha ịtughemi Ologh phọ. 14#Lịv 23.33-36, 39-43; Dut 16.13-15Bịdi ụwaaghi olegheri mọ Ologh phọ Ọmoogh-we phọ ạngo bọ esi aMozis ẹḅem mọ awe Ịzirel orughogh rugbogo dị ọloghom rịnya ireeny mem Ẹyaal Arugbogo. 15Kụ bịdi orom sidom ịlo ịphen phọ ọghiomonaan we oomo aJeruselem rꞌịpheri phọ ạramha phọ, ịbam rꞌigbogh, mọ, “Ịki ẹpe aroogbolom mọ ẹwaaghi sịgo arelhe rꞌịnon ịdo kịrokiro ireeny eru ẹloghom rugbogo esi ịdipho ọge bọ sịphe Ologh phọ.”
16Kụ awe phọ ọghi ọwaaghi ịphiph ireeny kụ oru ọzaam ạnyu aruutu phọ ạbidi rꞌiloghi arigiga ạbidi rꞌogiga Otu ịiḅereghi phọ rꞌigbogh arurugh phọ pạkiri phọ ẹpe Ọnhu-aḍibuo Ạmuum mọ rꞌỌnhu Aḍibuo Ifraim. 17Oomo awe phọ ạbuphe ọḍua bọ iiruen origheel ụlogh ni rugbogo phọ ịphen kụ orughogh. Mụen kụ ạmuḅel amem dị moḍighi ghan ịduon, emiigh kꞌasiḍughul otu phọ ịpe aJosua ọony phọ ạNon, kụ itir ri tọrobo oye kụ ọḅile ọmoogh ọḅaal ologhi. 18Kꞌemiighom amalhe phọ kụ ẹghi ẹteeny eekuna phọ, bịdi ạal ghan pạkiri Ologh phọ Ẹnaan ḍio etum ḍio. Bịdi ule ẹyaal phọ oḍual aḍughul-otu, kụ ḍio phọ emuneniom bọ ọphaanya aḍughul-otu phọ, kụ ọḅile ookpomoghan esi ịiḅereghi okureriom ẹyaal phọ ịdipho Ologh phọ ạḅem bọ.
Currently Selected:
Nehemaya 8: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
