Ẹmos 8
8
Ọmiin uḍien egunum iimuma
1Mị ụḅile ni ạmiin ịmiin dị Ọmoogh-we Oomo Ịikpo phọ uḍeenaan ịmi. Nyẹen, mị ụmiin egunum iimuma. 2Ọmoogh-we phọ apuru mọ, “Ẹmos, nạ ạmiin eeghe?”
Mị ụphagharanaan mọ, “Egunum iimuma.”
Ọmoogh-we phọ ụḅeni ni ịmi mọ, “Eekuna awe phọ ạmi Ịzirel mẹteeny. Mị kánme mun ologhi ạmi ịlo ọlhiom ạbidi. 3Ḍio phọ ạḍiphe ạsuor ịsiphe otu ọdaam mọ keten ni emoghi ọto. Iḍim awe kẹtol li oomo ariisi. Kotool li bịn otoḅologhi dị oye kạ́tagharan ọnhu.”
Ịminimiin dị kemitenaan Ịzirel
4Ịnaghan ịphen, nyina phọ ạbuphe rẹezeghi ghan bọ bụphe ụ́moogh bọ kụ rẹkparagha bọ ophiemi arukulom eelhe phọ. 5Nyina ẹḅenian loor mọ, “Yira kótue mun okori dị asiḍughul-otu iigbia phọ keten kụ yira ogbi aal ịbiakpa phọ ayira. Aḍio ophooghian phọ kemuneen ọghen amem dị yira kọḅile obool? Pịdi yira ọlogh ḍighi phọ, aalom ọkaraph ọtoom, ọḅile oogbegheḍiom bumuul ḍighi phọ ayira. 6Yira kọsighe ni ịisaar ọlogh ọḅaram ẹgbieneen eḍien obool ḍịikpara aḍighi. Yira kọwa ni ọmiin uwekulom dị kátue ạkpe ịimugh ọdi, dị kátue ako owol okoro bịninin, kụ yira oko nyọdi ịdipho ẹbene.”
7Ọmoogh-we phọ, Ẹnaan phọ Ịzirel, maghunya mọ, “Mị kátue abula ẹkaraph eḍighinom ịyaar phọ ạbidi. 8Kụ iḍighi kụ ade phọ kepiigha ni, kụ tọrobo oye lọ odi sịphe ade phọ kạtolom ọto. Oomo eelhe phọ kepiigha ni; kẹbugh ghan ni kụ ẹḅile esoorom ịdipho Ọphiiny aNail. 9Amem mọ retu ni dị mị kaḍighi ịdi erumuḍio phọ kemeel ogbo ootaany kụ ufiri aḍigh de phọ ootaany aḍio. Mị Ọmoogh-we Oomo Ịikpo phọ mạḅem. 10Mị kakiton rạyaal anyina atene simaḍi, kụ mị anme sụor iboh anyina atene romoghi amukum ologhi. Mị kaḍighi ịdi nyina kẹsama yogh rụmhu kụ ẹkpologhian iinmenan ọto, kụ nyina ẹkigh ọde rꞌonhiin dị rọto ogina ọony. Aḍio phọ ạḍiphe phọ kekiḍim ni kꞌeekuna phọ.
11“Amem mọ retu ni dị mị kạsighe ọkoony atu de phọ. Ọkoony kasiph ni we, kụ kọ́koony eḍien; ẹephua ạmuum kẹtol li, kụ kẹ́lo ạmuum. Bịdi kọmoogh ni ẹephua rꞌọkoony ọnaghan adom dị ẹḍua esi Ọmoogh-we phọ kụ eru. Mị Ọmoogh-we Oomo Ịikpo phọ mạḅem. 12Awe kọḍua ni ẹpe ephunom mọ kụ ọki ẹpe esoorom mọ, kụ ọḅile ọḍua ẹpe emitenom mọ kụ ọki osi ẹpe emeelom erumuḍio phọ. Bịdi kọwa ni dom dị ẹḍua esi Ọmoogh-we phọ, kụ bịdi kọ́miin. 13Ḍio phọ ạḍiphe phọ, ọkaraghi ugheel ạnmuny rꞌarisina ạnmanyaan dị omoon ni kọtuan ni ẹephua phọ bịn kụ ọkaaru ghan bịn omeel. 14Bụphe ọsighe bọ ịkaaghineen ạrumugh aSameria kụ oghunyian, kụ ọḅem bọ mọ, ‘Esi aḍien ẹmugh ạDan,’ mụghumo, ‘Esi aḍien ẹmugh aBeersheba’ — awe phọ ạbuphe phọ komeleghu ni kụ kóḅerenu mun.”
Currently Selected:
Ẹmos 8: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
