2 Timoti 1
1
1-2 #
Iiḍ 16.1
Mị ạPol phọ Ẹnaan ẹsaḅar bọ oḍighi otelhedom ạJizos Kraist kụ ụge ḍịnya phọ ạḍien raruomaan nyịna aTimoti ooḅi ọony phọ ạmi. Ẹnaan kụ irom ni ịmi ọghaaph ghan ịlo aghuḍum mọ dị maguanaan bọ ọngo ayira phọ mọḅophoghan bọ Jịzos Kraist.
Ạḍiseph rꞌọnma ighirigiir rꞌẹepho kꞌẸnaan Ọde phọ, rꞌạJizos Kraist Ọmoogh-we phọ ayira, ẹrolonaan nyịna!
Ọseph Ẹnaan ḅịle rꞌọkparami ologhi ạna
3Mị rạseph ni Ẹnaan phọ mị ạsighe bọ ologhi dị ịyaar ịbooghian ílho kụ raḍighinom bọ oḍighi phọ kạngo, ịdipho ạburude phọ ạmi. Mị raghol ghan ni nyịna esi ịiḅereghi ḍughul rꞌootaany kạngo Ẹnaan ḍịseph oomo amem. 4Mị kőwula izin phọ nạ ạgharaghi bọ mem mọ mị kạḍua bọ, kụ mị rạwa ni ọmiin ạna iboom, pịdi mị amuzeḍi iboh phọ ạmi. 5#Iiḍ 16.1Mị rạkiom ghan ni ologhi mọ nạ ạmoogh ni omeeraam dị ụ́ḅaram iguegue. Ọphon kụ ọdo phọ omeeraam mọ aLois onhiin oko phọ ạna, rꞌaYunais onhiin phọ ạna, ọmoogh bọ kụ mị aḍuom ni ologhi mọ nạ ạmoogh aani ni. 6Mị ụtuan ịduon kụ rạghiom ghan bọ nyịna ologhi mọ tiitieni nịan aruunmo aruwaloor phọ Ẹnaan ẹngo bọ nyịna, mem mọ mị ạḅam bọ rạghaagh phọ ạmi ẹmhu ạna. 7Uwaloor phọ Ẹnaan ịngo bọ iyira, ọlo ịikpo rꞌẹphomoghian rꞌọphamaghan aloor, kúwaloor eepuph.
8Kákiil umugholoor ọghaaph ghan ịlo Ọmoogh-we phọ ayira. Mị kẹn kúḍigh umugholoor esi ạna, ịdipho mị aghol bọ ẹmhu phọ ọdi kụ odi bọ ikoli phọ. Kpạripe ghụn, pin ni bin ọmiinom mọ mụo ạna loor ẹmhu ooḅi ọghaaph phọ, ịdipho Ẹnaan ẹngo bọ nyịna ịikpo phọ. 9Ọdi ọ́tuan iiḍighi phọ ayira kụ ụphel bọ iyira ạḅile bọ ụmagh iyira aḍighi weye phọ ọdi. Ẹnaan ịsighe ni ọnma ighirigiir phọ ọdi kụ ẹtooghiom bọ kꞌagediidi mọ yira phọ mọḅophoghan bọ rꞌạJizos Kraist ọmoogh ooḅi ọghor. 10Kụ nyịidipho ọdi magananami ọghor phọ ọphon uḍeenaan iyira, ịdipho ạJizos Kraist Ọpelia phọ ayira mamite bọ egaan phọ. Ọdi maphiemi ịikpo aḍuugh, kụ mạsighe ooḅi ọghaaph phọ agananamiom ghuḍum kꞌagee-pọ phọ.
11 #
1 Tim 2.7
Ẹnaan mịma ịmi oḍighi otelhedom dị kagbeelom ghan ạḅile ạtughemi ghan ooḅi ọghaaph phọ ọphon. 12Kụ mị ụtuan ẹmhu ịduon phọ kụ rạmiinom bọ ịminimiin phọ ịphen. Umugholoor ịmi rúsiph, ịdi eḍighi bọ mị alegheri ni nyọpo mị aḍuom bọ ologhi phọ, ạḅile akuphom owol mọ ọdi katue ni ụphamanaan ịmi ịpe ọdi ạḅogh bọ ạlogh ḍịghaagh phọ ạmi tụtu ẹteeny ḍio phọ ọdi katu bọ. 13Pạm ni igey ikpo ọnhu phọ ịpe mị ạtughemi bọ nyịna, ạsighe aḍighi ịyaar dị kọmaam ghan. Tọlom omeeraam mọ rꞌẹphomoghian phọ yira ạbuphe mọḅophoghan bọ rꞌạJizos Kraist ọmoogh bọ. 14Mạar ạpham igey phọ ịpe Uwaloor Iigbia phọ odi bọ loor phọ ayira mạḅogh bọ ạlogh ḍịghaagh phọ ạna.
15Nạ alegheri ni mọ tọrobo oye ẹpe eelhe phọ Esia, ọḅaram Fịjelos rꞌaHemojenis, ughinom ni ịmi. 16Mị rạaḅereghian ghan Ọmoogh-we phọ mọ ọdi ạnma ni ighirigiir ọto kꞌỌnesiforos, ịdi eḍighi bọ ọdi kụ ạkparami ghan ologhi ạmi ịbadi amem. Ạdol ikoli phọ ạmi ísiphe nyọdi umugholoor. 17Ọdi aru bọ asi Rom óphiemi mem ọwa ạmi ọmiin. 18Mị rạaḅereghian ghan mọ Ọmoogh-we phọ ạnma ni nyọdi ighirigiir ḍio ịiruen phọ. Nạ alegheri ni agey oomo phọ iiḅi phọ dị uḍighi bọ ịmi ẹpe Ẹfesos.
Currently Selected:
2 Timoti 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
