LIVAI 27
27
Unu-tishilo na Imɛ Butugwumwa
1Nazhɛ AGWANGWAMA hiɛŋ Moses, 2Hiɛŋ atwa Isrɛl maa, Aka na bụtụ bu ko peni AGWANGWAMA iyi, iwɛ unu ticinji na bee ge shiri, nu ulumo ukwuribi na ehi shiri, 3asha ulumo butubwenyi hiŋ na tizhɛla ta shiywa shɛ bwa shi kwuni nu woshi tutu i ci shiywa dupu-ne-eshe-umpwa (60) te e meci bu, u zhɛ wa sha azụrụfa arinya dupu (50) gana na tu ulumo ukwuribi wo ohwolu tijilo namɛ. 4Yaa shɛ bụtụ ata shɛ biyikwo, ulumo ubwa ụ shɛ azụrụfa arinya talacɛ (30). 5Bụtụ na shiywa shɛ bwa shi ci shɛ ta tutu i ci shiywa woshi (20) te e meci bu, ulumo ubwa ụ shɛ azụrụfa arinya woshi, (20) una biyikwo na shiywa shɛ bwa shɛ namɛ gana ata, ụ shɛ azụrụfa arinya umpwa (10). 6Yaa shɛ butubwenyi ata namɛ upiana uko, tutu i ci shiywa shɛ ta (5) te e meci bu, asha ulumo ubwa ụ shɛ azụrụfa arinya a ta (5). Una biyikwo na shiywa shɛ bwa shi ci gana ata, ụ shɛ azụrụfa arinya atatụ (3). 7Yaa shɛ kaa butubwenyi ci shiywa dupu-ne-eshe-umpwa (60) tutu uhwuri gana ata te e meci bu, asha ulumo ubwa ụ shɛ azụrụfa arinya umpwa-na-ba-ta (15). Ulumo biyikwo na shiywa shɛ bwa shi ci gana ata, ụ shɛ azụrụfa arinya umpwa (10). 8Yaa shɛ kaa bụtụ ata shɛ bukofwo duwa, bee eri shi ba tụpa ulumo ata, asha ga a shapɛ bụtụ ata no ofwo bunongbo, nazhɛ bunongbo ata zhɛ ba imanga ulumo ubwa gana na ta bụtụ na ge shiri-unu ata eri ba tụpa.
Unu-tishilo na Imɛ Iyimabiga
9Yaa shɛ kaa iyimabiga nɛ atwa peni AGWANGWAMA, inɛ ye elele nɛ ee peni AGWANGWAMA i shɛ inɛ tijilo. 10Bụtụ ata ge shiri-unu ata shɛ shɛ bo sheyingo iŋ ni iyi elele o, ti inɛ ibiye ti inɛ iwɛ, kwo kaa inɛ iwɛ ni inɛ ibiye o. Yaa shɛ kaa bee sheyinji iyimabiga ni iyimabiga, asha hwɛɛ ibɛ iyebi, ti inɛ ɛtɛ ihiiŋ, ti inɛ ɛtɛ bee sheyinji, i zhɛ ya sha iyi tijilo. 11Yaa shɛ kaa iyimabiga nɛ hashɛganụ, ibɛ shɛ inɛɛ nɛ aa ga shɛ shɛ a pana AGWANGWAMA nụ ụrụpɛ tuta, asha ga bụtụ ata shapɛ iŋ no ofwo bunongbo. 12Go bunongbo imanjɛ ulumo ubwa gana na tu waa namɛ okwo baa zhɛmɛ kwo kaa baa zhɛshɛ, gana na to bunongbo ata imanjɛ ulumo ibɛ, asha gana ata yɛɛ zhɛ ya nama. 13Ama yaa shɛ baa jala maa saanana iŋ, asha bɛ shɛ ba kaana iyi itana nu ulumo ata.
Unu-tishilo na Imɛ Umwono keeni Cɛnjɛ
14Aka na ta bụtụ shileni AGWANGWAMA umwono ubwa swooŋ maa ụ shɛ tijilo, go bunongbo imanjɛ ulumo ubwa, okwo waa zhɛmɛ kwo kaa waa zhɛshɛ, gana na to bunongbo ata imanjɛ ulumo ubwa, asha gana ata wɛɛ zhɛ wo shikono. 15Yaa shɛ kaa ubwa ata na ge shiri uŋ swooŋ ba jala maa saanana umwono ubwa, asha bɛ shɛ ba kaana iyi itana nu ulumo ukwuribi ubwa, nazhɛ wɛɛ zhɛ wa shaanana una ubwa.
16Yaa shɛ bụtụ shileni AGWANGWAMA cɛnjɛ tu bwa tu ko, tu na tɛ shɛ iyi-yo-ogwu ubwa swooŋ, asha ti'imanga tu ulumo tuba ti zhɛ ta sha nu gana na ti izɛgwu nɛ ɛɛ zhɛ a bila na tuba namɛ. Tibila ti ibɛ ti zhɛ ta sha ne bimenji bu nkwuronu mo tugongo woshi mi izɛgwu bali azụrụfa arinya dupu. 17Yaa shɛ bee shiri ehilo ubwa swooŋ, gunu na tu uywa unyasa tubwada keshici, asha ɛ zhɛ o shikono na ti'imanga tu ulumo na ulwa. 18Ama yaa shɛ bee shiri ehilo ubwa swooŋ na aba na tu uywa unyasa tubwada koshikwo cala, asha go bunongbo imanjɛ ulumo ukwuribi wa aba nu gana na ta shiywa shɛ ta vwɛ uuwa i ci uywa unyasa tubwada, nazhɛ ɛɛ zhɛ a nda tishilo ta ata swooŋ na ti'imanga tu ulumo wa aba. 19Yaa shɛ kaa bụtụ na ge shiri la ehilo ata swooŋ ba jala maa saanana aŋ, asha bɛ shɛ ba kaana iyi itana na ti'imanga tu ulumo ukwuribi wa aba, nazhɛ ɛɛ zhɛ a sha a na ubwa. 20Ama yaa shɛ bee jeri shi maa saanana ehilo ata, kwo kaa bee sengeni binya bụtụ ehilo ata, asha a zha shɛ a saanana aŋ ya kwukwuŋ. 21Ama aka na te e genji hwuŋ ehilo ata nu uywa unyasa tubwada, asha ɛ zhɛ a sha ehilo na ee shileni AGWANGWAMA, bunongbo tuba ubwa zhɛ ba 'yaga aŋ. 22Yaa shɛ bee shileni AGWANGWAMA ehilo na boo go so swooŋ, anaa na shɛ shɛ cɛnjɛ to ogwu ubwa na ba 'yajɛ, 23asha bunongbo zhɛ ba imanga ulumo tuba tutu i ci uywa unyasa tubwada, bụtụ ata kaa zhɛ ba pana ulumo na aa imanjɛ nụ ụjita ata maa a shɛ iyi tijilo ya AGWANGWAMA. 24Ehilo ata zhɛ o gwulo pa bụtụ ata oo go so aŋ la nu bwa nu uywa unyasa tubwada, kwo kaa no ofwo ajalalo bụtụ ata ga 'yajɛ la cɛnjɛ ta ata maa tɛ shɛ iyi-yo-ogwu tiya. 25Ti'imanga tu ulumo ule we elele tɛ shɛ ta sha nu gana na ta azụrụfa ohwolu tijilo namɛ; ibɛ shɛ azụrụfa urinya uko.#27:25 azụrụfa urinya uko: kwo kaa, agira woshi.
26Kede bụtụ be elele shiri yɛu nɛ iyimabiga meci hiiŋ swooŋ; okwo yaa shɛ buna be eyi, kwo kaa ụgwụdụ, AGWANGWAMA ubwa 'yajɛ bụ. 27Yaa shɛ kaa iyimabiga nɛ hashɛganụ, asha ga saanana bụ nu ulumo na ee shikicinji, maa kaana kaa iyi itana nu bwa. Yaa shɛ ee seeneni shi bu, asha ge senji bu na ti'imanga tu ulumo na go shikonowoŋ cebe.
28Ama iyi elele nɛ bụtụ bu ko shileni AGWANGWAMA swooŋ ni iyi elele nɛ baa 'yajɛ, okwo yaa shɛ bụtụ, kwo kaa usunda, kwo kaa ehilo ubwa, a zha shɛ a sanga iŋ o, a zha shɛ kaa a saanana iŋ o. Iyi elele nɛ ee shileni Agwatana, asha i shɛ iyi tijilo me tijilo ya AGWANGWAMA.#Tɛrɛ 18:14 29I zasa bụtụ na oo go shilwonuo Agwatana hwɛ hwɛɛ, ɛɛ tɛ zhɛ e gwube bu ya o. Ɛ zhɛ a kwụna bụ tilɛɛ.
30AGWANGWAMA ubwa 'yajɛ iyi-u'umpwa ye elele icɛnjɛ ta ata, okwo yaa shɛ iyi izɛgwu, kwo kaa inɛ tụ'walụ ti i'wɛ'wɛ, i shɛ iyi tijilo ya AGWANGWAMA. 31Yaa shɛ kaa bụtụ ba jala maa saanana iyi-u'umpwa ye elele, asha bɛ shɛ ba tụpa ulumo ata go shikonowoŋ cebe maa madanga iyi itana ibɛ. 32Iyi-u'umpwa nɛ shɛ iyimabiga ye elele nɛ namɛ ni ihwɛ, ta agwụdụ, ti inɛ, inɛɛ nɛ bi'iywa bi ibɛ rutwa, i shɛ ya iyi tijilo ya AGWANGWAMA. 33Bụtụ na kaa ga 'yajɛ iyimabiga ɛtɛ, zha shɛ ba jalakaka iŋ ya maa sheyingo, okwo yaa zhɛmɛ kwo kaa yaa zhɛshɛ, bɛ shɛ shɛ bo sheyingo iŋ o. Yaa shɛ kaa bee sheyinji iŋ, asha hwɛɛ ibɛ iyebi, ti inɛ ɛtɛ bee sheyinje i zhɛ ya sha inɛ ya AGWANGWAMA, a zha shɛ kaa a saanana iŋ o.#Tɛrɛ 18:21; Undwa 14:22-29
34Onu-tupana ga, aba AGWANGWAMA peni Moses ni Ishɛmɛ Sainai iwɛ maa pana aŋ atwa Isrɛl.
Currently Selected:
LIVAI 27: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008
