ỤBANỤ 38

Tɛnda tu Utukwu-ụrụpɛ Tuhwoŋzhingo

(Ụban 27:1-8)

1Baa ndaananɛ utukwu-ụrụpɛ tuhwoŋzhingo nụ ụ'wụ'wụ we ekeshia. Ụnjɛswa ubwa ụ shɛ imbele i'ɛlɛ itɛ, uholo ubwa ụ shɛ imbele i'ɛlɛ itɛ, i'ɛŋbi ibwɛ ineshi nangwụ, uzoto ubwa ụ shɛ imbele i'ɛlɛ itɛtu. 2Baa njɛ mahiuaŋ ne esugwulumi ubwa eneshi; mahiuaŋ mu bwa mɛ shɛ iyi ike nu bwa, bee sweni uŋ utumburɛ. 3Baa njɛ i'wɛŋni'wɛŋni utukwu ata ụrụpɛ hwɛɛ nɛ ɛtumburɛ, tu nkwasha mu bwa, tu n-ngowo mu bwa, ta agbamgbam ubwa, te ekweshi ubwa keeni apalụ ubwa ulwa tɛshana; 4Baa njɛ agbahwụ tụpatakwụ nɛ ɛtumburɛ iwɛ utukwu ata ụrụpɛ, ee zwe tutu ashashɛ utukwu ata. 5Baa njɛ tɛkanɛ tɛ ɛtumburɛ ti neshi iwɛ esugwulumi eneshi agbahwụ ata tụpatakwụ, iwɛ maa e hwuŋtengeni imbele maa a na 'waŋna uŋ. 6Bee shebi imbele ibwɛ nụ ụ'wụ'wụ we ekeshia, bee sweni iŋ ɛtubmurɛ. 7Bee suji imbele ɛtɛ bee hwuŋtengeni iŋ na tɛkanɛ te ebe ni i'ɛŋbi utukwu ata, maa a na 'waŋna uŋ ni ibɛ, baa ndanɛ uŋ u'ibwa na shɛkpada shɛ bwa.

8Nazhɛ baa njɛ ugbamgbam i'ɛlɛ tusukwutwo nu utumburɛ, ụkwụka ubwa du ụ shɛ utumburɛ, bɛ njɛ uŋ nu nrata me eyikwo na shɛ anjɛ-ugondu a na a ụlwatagwụ no odubo udulo ata tu'ulwa.#Ụban 30:18

Ukpogwu Udulo Tụ'ụlwatagwụ

(Ụban 27:9-19)

9Nazhɛ baa njɛ ukpogwu; aa nɛ tugwuno tu na ee sweci nụ ụzalụ tuta tu ukpogwu ata ni ihwehwe ilinɛn nɛ aa hiɛŋshɛ tanɛ tanɛ. Ụnjɛswa tuba ụ shɛ imbele i'ɛlɛ dipi-yebi; (100) 10atukpa ubwa a shɛ woshi, akatakpa ubwa ɛtumburɛ a shɛ woshi. Ama shɛkama sha atukpa ubwa keeni abatana ubwa a shɛ azụrụfa. 11Ụzalụ tuzuba tu bwa tɛ shɛ imbele i'ɛlɛ dipi-yebi; atukpa ubwa a shɛ woshi, akatakpa ubwa a shɛ woshi. Ama shɛkama shɛ bwa keeni abatana ubwa na azuba a shɛ azụrụfa. 12Ibɛgɛlɛ tugwuno nɛ aa swata nụ ụzalụ bu uwaŋna-twonuo i shɛ imbele i'ɛlɛ dupu, atukpa ibɛ shɛ umpwa; shɛkama sha atukpa ibɛ keeni abatana ibɛ na azuba a shɛ azụrụfa. 13Uholo geri bu uwaŋna-banụ ubwa ụ shɛ imbele i'ɛlɛ dupu. 14Ibɛgɛlɛ tugwuno nɛ aa swata nụ ụzalụ bu ko bo odubo ata i shɛ imbele i'ɛlɛ umpwa-ni-bɛ-tɛ, akatakpa ibɛ a shɛ atatụ, akwụka ibɛ a shɛ atatụ. 15Gabata du yaa namananɛ nụ ụzalụ uyebi; tu u'ala ye tu u'ala na no odubo ukpogwu ata, ibɛgɛlɛ ibwɛ i tugwuno tu tuswata i shɛ imbele i'ɛlɛ umpwa-ni-bɛ-tɛ, akatakpa ibɛ a shɛ a tatụ, akwụka ibɛ a shɛ atatụ. 16Tugwuno tu tuswata tu ukpogwu ata kpaaŋ tutu rungwutwonu tɛ shɛ ilinɛn nɛ aa hiɛŋshɛ tanɛ tanɛ. 17Akwụka iwɛ atukpa ukpogwu ata a shɛ ɛtumburɛ, a na shɛkama shɛ bwa keeni abatana ubwa azuba a shɛ azụrụfa. Iyi nɛ e sweni okwukwusu ubwa du i shaananɛ azụrụfa, atukpa ukpogwu ata kpaaŋ mama imanụ na abatana ata azụrụfa. 18A njɛ ibɛgɛlɛ tugwuno tu tuswata no odubo ukpogwu ata ni ihwehwe uduhwa wa ababa, nu uduhwa ushenje, ni inɛ ushenje howuu, keeni inɛ ilinɛn nɛ aa hiɛŋshɛ tanɛ tanɛ inɛɛ nɛ ee zweni irikwi. Ụnjɛswa tuba ụ shɛ imbele i'ɛlɛ woshi, uzoto tuba namɛ gana na tu uholo tuba namɛ, ụ shɛ imbele i'ɛlɛ itɛ, nu gana na to tugwuno tu na ee kepi ukpogwu ata tu namɛ. 19Atukpa tuba a shɛ eneshi; akwụka tuba eneshi a shɛ ɛtumburɛ, shɛkama sha tuba shɛ shɛ azụrụfa; azụrụfa du kaa ee sweni okwukwusu ubwa na azuba. 20N-ngbalụ mu udulo ata kpaaŋ, tu ukpogwu ata uuwa rungwutwonu mɛ shɛ ɛtumburɛ.

I'wɛŋnɛ nɛ Aa Njɛ Uhwara ni ibɛ Nɛ

21Ti'imanga ti i'wɛŋnɛ nɛ aa njɛ ugondu udulo ata u tiseyida na: ibɛ shɛ atayɛ ata eyebi anaa na go Moses 'nyeci Unu-tupana ata umpwa maa ga Alivai a na zweni ni i'ɛlɛ Itama yɛu Aron bunongbo a njɛ ugondu ibɛ.

22Gɛ Bɛzalɛl, yɛu Uri bụjalụ Hu nụ ụlamụ Juda, kwunanjɛ iyi elele tɛnda gana na ta AGWANGWAMA peni Moses unu. 23Bụtụ na medenji bu i shɛ go Oholiab, yɛu Ahisamak, na shɛ ụlamụ Dan, ubwa shɛ bụtụ na ba ta iyi i'nyɛtɛ, bɛ shɛ bugwoni ni irikwi tuzwono iyi nɛ aa nɛ ni ihwehwe uduhwa wa ababa, ti inɛ uduhwa ushenje ti inɛ ushenje howuu, keeni ilinɛn nɛ aa hiɛŋshɛ tanɛ tanɛ.

24Azhɛnarɛya elele na aa njɛ ugondu wo ohwolu ata tijilo kpaaŋ a shɛ azhɛnarɛya na ee peni AGWANGWAMA upwaŋ. A shɛ atalɛnt woshi-na-ba-ecinjishi keeni ɛshɛkɛl akpakwụ-atatụ-ni-dipi-yebi-nu-talacɛ (730), aba shɛ ɛshɛkɛl ohwolu ata tijilo. 25Azụrụfa atwa na aa rɛcɛ na amɛ atwa tu'ulwatagwụ ta ata, a shɛ atalɛnt dipi-yebi keeni ɛshɛkɛl akpakwụ-atụndatụ-ni-dipi-tɛtu-nu-woshi-na-ba-a-ta (1,775) a na shɛ a na ohwolu ata tijilo. 26Ulumo ga nangwụ no tutogotogwu tu ulumo na bụtụ be elele na aa rɛcɛ na tɛrɛcɛ ta ata cɛpɛ. Bụtụ bụtụ ba tụpa nu ulumo na ɛɛ hiɛŋ bụ, te teni cɛŋ ne bimenji bo ohwolu ata tijilo. Etwenyi na aa rɛcɛ a na peni apwaŋ ga, anaa na tɛzhɛla ta shiywa sha aba shi ci woshi tutu munji, a namɛ atwa igbɛɛ-akpakwụ-atatụ-ne-eshe-umpwa-na-ba-ecenje-ni-dipi-tɛtu (603,550).#Ụban 30:11-16; Mat 17:24 27Azụrụfa atalɛnt dipi-yebi a shɛ iwɛ maa a njɛ akwụka ohwolu ata tijilo, keeni akwụka iwɛ tugwuno ti tɛjɛlanɛ. Akatakpa dipi-yebi a shɛ atalɛnt dipi-yebi, utalɛnt uko ụ shɛ iwɛ ukatakpa uko. 28Baa njɛ shɛkama iwɛ atukpa, nɛ ɛshɛkɛl akpakwụ-atụndatụ-ni-dipi-tɛtu-nu-woshi-na-ba-a-ta (1,775), aba baa 'imɛ imbele ɛtɛ patanɛ na azuba.

29Ɛtumburɛ na aa palajɛ ee peni AGWANGWAMA a shɛ bimenji ba atalɛnt dupu-nu-woshi (70), medenji ɛshɛkɛl ugbaa-na-akpakwụ-eyebi (2,400). 30Ni ibɛ baa njɛ akatakpa odubo udulo ata tu'ulwa, ti iwɛ utukwu utumburɛ, keeni owowo ɛtumburɛ na ee jibi patakwụ a na namɛ na amɛ ibɛ, medenji i'wɛŋni'wɛŋni utukwu ata ụrụpɛ kpaaŋ, 31ta akatakpa na rungwutwonu ukpogwu ata, ta akatakpa odubo ukpogwu ata, tu n-ngbalụ mu udulo ata kpaaŋ keeni n-ngbalụ mu na mu rungwutwonu ukpogwu ata kpaaŋ.

Currently Selected:

ỤBANỤ 38: RBT

Highlight

Copy