JUAN 5
5
Jesusqa Betzatá chhikapi kaq such'u runata alliyachin
1Uj pachakuna qhipamantataq, judiokunaqa uj raymita ruwachkarqanku, Jesustaq Jerusalén llaqtaman kutirirqan. 2Jerusalén llaqtapitaq, Uwijakunapaq punkun nisqa chhikapiqa, uj athun unu quwuña hebreo rimaypi Betzatá sutiyuq kan. Kaytaq phichqa athun punkukunayuqmi karqan, 3maykunapichus achkha unqusqakuna, ñawsakuna, wist'ukuna jinataq such'u runakuna ima qasi pampapi chhuqarayachkarqanku. 4Imaraykuchus kaymantajina kaymantajinam uj ángel chay quwuña qayllaman unu kuyurichiq uraqamuq karqan, unu kuyuchkaqman ñawpaqkaq challpuykukuqtaq, ima kaq unquyninmantapas alliyasqam kapuq karqan. 5Chaykuna chawpipitaq, uj runa kimsa chunka pusaqniyuq wataña unqusqa kachkarqan. 6Jayk'aqchus Jesusqa chaypi chhuqarayachkaqta rikurqan, jinataq chay tukuy watakunaña ajina kasqanta yachaspataq, payman ajinata tapurirqan:
–¿Alliyayta munankichu? –Nispa.
7Unqusqataq payman ajinata jaynirqan:
–Apu Tata, unu kuyurimuchkaqtinqa manam pipas unuman nuqata challpuykuriq kawanchu. Sapa kuti challpuykukuyta munachkani chhikaqa wajmi atiparquwan –nispa.
8Jesustaq payman ajinata nirqan:
–Jatarikuy, kallapuykita uqharikuy jinaspataq puripuy –nispa.
9Chay kikin pachapitaq runaqa alliyasqa kapurqan, kallapunta uqharispataq puriykachayta qallaripurqan. Chaywampas samarana p'unchay kaqtintaq, 10judiokunaqa chay alliyachisqa kachkasqa chay runaman ajinata nirqanku:
–Kunan p'unchayqa samarana p'unchaymi; manam kallapuyki uqharisqa puriykachanayki atikuchkanchu nispa.
11Chay runataq paykunaman ajinata jaynirqan:
–Pichus alliyachichkawan chaymi nuqaman ajinata niwan: ‘kallapuykita uqharikuy jinaspa puripuy,’ –nispa. 12Paykunataq payman ajinata tapurirqanku:
¿Pitaq ‘kallapuykita uqharikuy jinaspa puripuy,’ nispa nisunkiri? –Nispa.
13Chaywampas runaqa pichus alliyachichkarqan chaytaqa manam yacharqanchu, imaraykuchus Jesusqa chaypi kaq achkha runakuna chawpipim chinkawachapusqa. 14Chhikamantataq Jesusqa chay runata Diospaq wasimpi kachkaqtam taripapurqan, jinaspataq ajinata nirqan:
–Kunanqa alliyasqañam kapunki, amaña juchata ruwaychu, ajinamanta astawan mana allinkuna ama chayanasunkipaq –nispa.
15Chay runataq puripuspa judiokunaman Jesuspaq payman alliyachisqanta willamurqan. 16Chayrayku judiokunaqa Jesusta qatiykacharqanku, imaraykuchus tukuy kaykunataqa samarana p'unchaypim payqa ruwaq karqan. 17Chaywampas Jesusqa paykunaman ajinata nirqan:
–Tatayqa mana samaraspapunim llank'arqan, nuqaqa payjinallataqmi llank'ani –nispa.
18Chayrayku judiokunaqa astawanraq wañuchiyta munarqanku, imaraykuchus manam samarana p'unchayllatachu mana junt'arqan, manachayqa Diosqa tataymi nispam puriykacharqan. Chayta nispataq payqa Dios kikimpas kachkanman ajinatam puriykacharqan.
Diospaq Churimpaq atiynin
19Jesustaq paykunaman ajinata nirqan: “Sut'inta niykichis, Diospaq Churinqa, pay kikimpaq munayninmanjinaqa manam imatapas ruwachkanmanchu; imatachus Tatan ruwachkan chay rikusqan sapallatam ruwan. Tukuy imatachus Tata ruwachkan, chayllatataqmi Churiqa ruwan. 20Imaraykuchus Tataqa Churinta munakusqanraykum tukuy imachus ruwasqanta rikuchin; jinataq astawan athun ruwaykunataraqmi payman rikuchinqa, kaytaq qankunaman musphachkaqtaraqmi saqisunkichis. 21Imaynatachus Tataqa wañusqakunata kawsatatachin jinataq kawsayta qun, ajinallatataqmi Churiqa pikunamanchus quyta munan chaykunaman kawsayta qun. 22Jinataq Tataqa manam pimampas juchanchachkanchu, manachayqa Churinmanmi juchanchanampaq tukuy atiyta qun, 23ajinamanta imaynatachus Tatata athumpi kachichkanku kikillantataq tukuyninku Churita athumpi kachinankupaq. Pichus Churita mana athumpi kachichkan chayqa, manallataqmi pichus kachamuchkan chay Tataman athumpi kachichkanchu.
24“Sut'intapunim niykichis, pichus nuqapaq nisqaykunata uyarin jinataq pichus kachamuchkawan chayman iyaw nichkan chayqa, wiñay kawsayniyuqmi; paytaq manam juchanchasqachu kanqa, imaraykuchus wañuyniqmanta kawsayniqman chimpapunñam. 25Sut'intapuni niykichis, pachaqa jamuchkanñam, chaytaq kunan kikin pacham, jayk'aqchus wañusqakunaqa Diospaq Churimpaq kunkanta uyarinqaku; jinataq pikunachus uyarichkanqaku chaykunaqa kawsanqakum. 26Imaynachus Dios Tatayqa kawsay qunapaq atiyniyuq kachkan, ajinallatataqmi nuqa Churinman chay atiyta quwan, 27jinallataqmi juchanchanaypaqpas atiyta qullawantaq, imaraykuchus nuqaqa runapaq Churinmi kani. 28Chay nisqaymantaqa ama musphaychischu, imaraykuchus tukuy wañusqakuna nuqapaq kunkayta uyarinanku pachaqa chayamunqam, 29jinaspa aya pakana t'uqunkunamanta lluqsiramunqaku. Allin ruwaykunata ruwaqkunaqa kawsayniyuq kanankupaq kawsarimunqaku; chaywampas pikunachus mana allin ruwaykunata ruwarqanku chaykunaqa, juchanchasqa kanankupaqmi kawsarimunqaku.
Jesuspaq atiyninmanta rikuchiykuna
30“Manam munasqaymanjinaqa imatapas nuqaqa ruwayta atichkaymanchu. Imaynatachus Tatay nichkawan ajinamanjinam juchanchani, chay juchanchasqaytaq chiqanmi, imaraykuchus manam nuqapaq munasqaymanjina ruwayta munanichu, manachayqa pichus kachamuchkawan chay Tataypaq munaynintam ruwani. 31Nuqachus nuqa kikinrayku willayniyta quyman chhikaqa, chay willayniyqa manam imapaqpas allinchu kachkanman. 32Chaywampas wajkaqmi nuqarayku willaq kachkanqa, chaypaq willasqankaqmi chiqan kachkan chayqa, chaytataq nuqaqa yachanim. 33Qankunaqa Juanman tapumunankupaq kacharqankichis, paytaq imachus chiqan kachkan chayraykum willayninta qurqan. 34Chaywampas nuqaqa manam pi runapaq willasqanmantajinachu kachkani, manachayqa qankunapaq qhispiy taripanaykichisllapaqmi nuqaqa kayta ajinata nichkaykichis. 35Juanqa uj lawraspa k'anchaq micha k'anchayjinam karqan, qankunataq chay k'anchayninmantaqa uj chhika p'unchaykunallam kusikuywan jap'iqayta munarqankichis. 36Chaywampas Juanpaq willasqanmanta niqtimpas, nuqaraykuqa astawan sumaqkaq willaymi kan. Imatachus nuqa ruwani chayqa, imatachus Tatayqa ruwanaypaq kunamuchkarqawan chay kikinmi, chay ruwaykunataq Tataypaq chiqampipuni kachamuchkawan chaytam sut'inchan. 37Kachamuchkawan chay Tataypas, qankunapaq mana jayk'aqpas kunkanta uyarichkankichis, jinataq mana rikuchkankichis chhikapas, payqa nuqaraykullataqmi willaynintaqa qun. 38Manallataqmi rimaynimpas qankunapi tiyaykusqa kananta munachkankichischu, imaraykuchus pichus Tataypaq kachamusqan kachkan chaymanqa manam iyaw nichkankichischu. 39Qankunaqa Qilqasqakunata tukuy yuwayniykichiswanmi ñawirinkichis, imaraykuchus chaypicha ichapas wiñay kawsayta taripasaq nispam ñawirichkankichis; chaywampas qilqasqakunapi nuqamanta willanku chhikapas, 40qankunaqa manam chay kawsayniyuq kanapaqqa nuqaman jamuyta munachkankichischu.
41“Manam nuqaqa runakunaniqmanta jamuchkan chay athunchasqa kaytaqa munachkanichu. 42Chaywampas qankunataqa nuqa riqsiykichismi jinallataq Diosniqmanta jamuq munakuypas qankunapaq mana kasqanmantaqa yachallanitaqmi. 43Tataypaq sutimpi nuqa jamuni, qankunataq manam jap'iqachkawankichischu; chaywampas waj runachus pay kikimpaq sutimpi jamunman chhikaqa, chaykaqmanqa jap'iqawaqchismi. 44Qankunachus qankunapura ujmanta uj athunchakuspa kayta munachkankichis, Diosniqmanta jamuq sumaq k'anchaynimpi athunchasqa jap'iqaykaqta mana munachkankichis chhikaqa, ¿imaynatataq nuqapi iyaw niwaqchisri? 45Tataypaq ñawpaqimpi qankunaman nuqa juchanchanaymantaqa ama yuwaychischu; mayqinmanchus qankunaqa sunquykichista churankichis chay Moisés#5.45 Moisés: Kay runaqa ñawpaq pachakunapi Israel suyu tiyaykuchinapaq kamachiykunata Dios kikinmanta jap'iqaq kurajkaq runam karqan. kikinkaqmi qankunataqa juchanchaykusunkichisqa. 46Moisestachu iyaw nirqankichis chhikaqa, nuqapiqa iyaw nillawaqchistaqmi karqan, imaraykuchus Moisesqa nuqaniqmantam qilqarqan. 47Chaywampas paypaq qilqasqantachu mana iyaw nichkankichis chhikaqa, ¿imaynatataq nuqapaq nisqayta iyaw niwaqchisri?”
Currently Selected:
JUAN 5: QNBNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Quechua Norte Boliviano © Sociedad Bíblica Boliviana, 2006.