Meŋiigíe 26
26
Dogálɔ dá Póolo go go bɔ́bɔgɔbɔgɔ
1Agɛlɛ́pa go oyana Póolo a amɔ́: «Ŋgaá go fáá bogaaga bá go gálagala goŋaá ó ba bósódío.» Póolo go fediginye ombɔ́gɔ go dúme dogálɔ a amɔ́: 2«Ufuŋe Agɛlɛ́pa, ŋgɔ́bɔnɔ bese ínoni gɔ́ɔgɔ kɔ́lɔmɔ́ dogálɔ naá busío báhɔ go go bósódio naá bɛsɛnɛ bɛ́ɛbɛ Beyúdene bá cɔ́mɔnɔmɔ́. 3Dómba dómbáa maamɔ́ɔ moatɛ́ go íyimene caŋa sá Beyúdene iŋkimée na ɛdóɛ ya moóma yɛ́ɛyɛ bú ubenyemú cuŋí go yɛ́. Boóma moánɛ ko úhenemú goŋaá o dámba udúu, o mbódóliginyo.
4«Beyúdene biimée bí íyimene aŋa gɛɔyɔ gámɛ gɛ́ mbaá bɛ́ɛ́mbá gó bayɛga na bohaŋa bámɛ; bí íyimene aŋa mmbɔɔ́ ɔyɔ́ɔ naá gɛdɔŋɔ gámɛ na naá Yolósalɛmɛ. 5Bá ŋgíyimene fueké. Bá lɛ́ gɔnɔ́ ba go dúfie aáŋa bá lɛ́galɛga, goŋaá mmba lɛ́ ummue mɔ́ɔnyɔ naá giimbó gɛ́ɛgɛ gɛ́ dómbamɔ́ go beŋebeŋe bɛlɔsɛnɔ bá gioliminyo gɛ́cɔ́, giimbó gá Befelisiéŋe. 6Kanɛ́ godɔ́ɔdɔ, bá mbide goakɛ́ mbɛanana toodo odɛ́máa naá tánɔ yɛ́ɛyɛ Asaŋa a mbaá dánɛ́ná biisée bá biisée kɔ́nɔ́ɔ bɛ́cɔ́. 7Egúli eŋkimée yɔ́ɔ́dɔ́ na áhandɛ́ yá boɛ́nɔ bɛ́cɔ́ yá doodo odɛ́má go go ɛ́na tánɔ ya ndiemi ɛ bóhóogio; nɔ́ɔ gɔ́ɔ bá búlugenyemú Asaŋa kanɛ tɔmbɛ́nɔ́ɔ aŋa siisíi aŋa budúgú. Ufuŋe, bó lɔ́mɔ́ go toodo odɛ́máa moánɛ gɔ́ɔ Beyúdene bá cɔ́mɛnɔnɔmɔ́. 8Bɛɛnyɔ́ɔ Beyúdene, no lɔ́mɔ́ no do olímínyóo no amɔ́ Asaŋa a fúfune begúe goakɛ́ o?
9«Yɔmɔ́ɔ moatɛ́ mmba lɛ́ mbéeniŋenye goŋaá káanana go nuugenye ufíno yá Yésusu ba Násalɛdɛ go pɛ́ iŋkimée. 10Boóma moánɛ mmbaá ŋanánáa naá Yolósalɛmɛ. Bagɔ́nɔ́ɔ bá bedúmbí bɛbáágá naá Asaŋa bá mba páá gɛkɔ́nɔ́nɔ́ɔ gá bogaaga. Nɔ́ɔ gɔ́ɔ mmba ágánáa gɛca gá boolímínyí naá ncíbo ya gɛaŋɔ́, gɔnɔ́ gɔ́ɔgɔ bá mbaá lɔmɔ́ goŋaá bá gaá bó ónáa, Yɔmɔ́ɔ mmba lɛ́ ukelú. 11Ɛŋɛndɔ gɛca, mmba lɛ́ mbó génegenye naá nnyaŋá sá mbósógólí, mbó gaŋɛna goŋaá bá básáŋona gioliminyo gábɔ́. Mpímí yamɛ nabɔ́ ɛ mba lɛ́ mbɔ́dɔ yɛ́ɛyɛ mmbaá lɔmɔ́ ŋgɛ́da bó séesenye naá tɛ́sɔnɔ sá mɛɛ́nɔ móncodío.
12«Go busío moánɛ gɔ́ɔ mmbɛɛ́ ɛ́dá naá Damáasɛ na bogaaga go bosɔ́mɔ bɔ́ɔbɔ bagɔ́nɔ́ɔ bá bedúmbí bɛbáágá naá Asaŋa bá mbaá lɔmɔ́ ncoóolú. 13Ufuŋe Agɛlɛ́pa, ká lɛ́ go pɛ́, go tólóbóo, gámɛ go ɛ́na gise gɛ́ ɛ́da go úlene naá mmoɛná, begibegi, gɛ́ dómba gɛ́ɛgɛ gá gɛonyá, gɛ́ có bonya namɛ na batɔ báaba mmbaá lɔmɔ́ olɔŋɔ nabɔ́. 14Gɛ́cɔ́ go oba biimée go cí, gámɛ go ɔ́bɔ ukelú yó kálagala na nohébelée yó amɔ́: “Sóole, Sóole, o céesenyemú goakɛ́ o? O báŋanana gɛgáda na giélie aŋa gúlúge yɛ́ɛyɛ ɛ lɔ́mɔ́ ɛ dɛ lɛ́gálɛ́gáa go ɔ́bɛnɔ ogɔ́nɔ́ɔ ba yɛ́.” 15Gámɛ go úhune caá: “Daadáa, o lɔ́mɔ́ ánɛ́ɛ o?” Daadáa go gundie a amɔ́: “Ndɔ́mɔ́ Yésusu mɔ́ɔnyɔ o séesenyemú. 16Kanɛ́ fadɛ́gɛ́na, ŋgaá go ɛ́nɛ́gɛ́ná goŋaá ko íyie uyogóní bamɛ; o gaá bɛ́ɛ́mbá ŋgominyo yamɛ go go oyanɛna batɔ bóncodío aŋa o ŋgɛ́namɔ́ ínoni yɛ́ɛyɛ, o gɔnɔ bó oyanɛna bɔ́ɔbɔ nná gɔnɔmɔ́ go bédúfenye. 17Nná go dúgune go magálá má boɛ́nɔ bá Beyúdene na má mɛɛ́nɔ máama nná go dómamɔ́ hɔ́ɔ. 18Ko dómamɔ́ go go bó fuune oŋgíso, go go bó húmie naá mbíno o bó ága naá gise, go go gɔnɔ bó úlie naá bogaaga bá sátana o bó gundie naá Asaŋa, goŋaá báaba bá ágamɔ́ odɛ́má yábɔ́ naá yɔmɔ́ɔ bá bɛa ihéehinye há bɛlɔgɔ bábɔ́, bá gɔnɔ bɛa undukí naá olɔŋɔ yá báaba bɔ́ ɔ́bɔnɛnɔmɔ́ na Asaŋa.”
19«Ufuŋe Agɛlɛ́pa, gɔ́ɔ ndɔ́mɔ́ kanɛ go ŋa odóɛ go lala go giínigie gɛ́ɛgɛ gɛ́ lɔ́mɔ́ ɛ́dá ŋgúlénéelú naá mmoɛná. 20Kanɛ́ mmba dóáná go oyanɛna batɔ bá Damáasɛ na bá Yolósalɛmɛ tɔ́nɔ nogálɔ ná Asaŋa; mbɛ́ɛ́ ɛ́dá naá busío mbóó oyánɛ́náa batɔ báaba naá gigísi gá cí gá Yudée giimée, gɔnɔ́ na batɔ bá bɛdɔŋɔ bíntió, mbó oyanɛna goŋaá bá núgie gɛɔyɔ gábɔ́, bá gunde naá Asaŋa, bɛ́ ɛ́da go ŋanana meŋiigíe máama má dúfenyemú mammana goŋaá bá á núgíe gɛɔyɔ gábɔ́#26.20 O bana, go eninye na Mot 3.8; Lók 3.8.. 21Go busío moánɛ gɔ́ɔ Beyúdene bá lɔ́mɔ́ kumbénéelú yɔmɔ́ɔ naá Nnyaŋá ya Asaŋa, bá amɔ́ bá ŋgóna. 22Kanɛ́ Asaŋa a lɛ́ mbeŋéelú gó nco húme ínoni yɛ́ɛyɛ, gɔ́ɔ ká lɔ́mɔ́ hɔ́ɔ goŋaá ŋgoyanɛna batɔ biimée mammana, baábayɔ́ aŋa bagɔ́nɔ́; cɛ oyáa boóma búncodío bó do dómbá boóma bɔ́ɔbɔ mbúsí sá Asaŋa na Mɔ́sɛsɛ bá mboó oyáa goŋaá bó gaá bolá: 23goŋaá Mesíi a ŋgɔ ɔ́bɛ́gɔ́nɔ́ɔ a bɛ́ɛmba ba busío ba go fúfuge naá kadɛ́gadɛ́ɛ ya begúe, a gunde a dóogonyo gise go boɛ́nɔ bɛ́cɔ́ na bɛdɔŋɔ bɛ́ɛbɛ bíncodío#26.23 O bana, go eninye na 1 Kɔl 15.20; Iseyíi 42.6; 49.6..»
24Aŋa Póolo a mbaá lɔmɔ́ a gá gálagala nɔ́ɔnɔ go go bɔ́bɔgɔbɔgɔ, ŋgɔ́mɔnɔ Fésétusu go áncɛda a amɔ́: «Póolo, go á gɔ́lɔ́ buegu. Goíyime gáhɔ gá degédegé gó á go íŋéné buegu.» 25Póolo go mo gundie a amɔ́: «Akɛ́ɛ, ŋgɔ́mɔnɔ Fésétusu, cɛ báá na buegu, dogálɔ dɔ́ɔdɔ kálagalamɔ́ dó lɛ́ mammana, dó gɔnɔ bɔ́ɔ́bɔnɔ. 26Ufuŋe Agɛlɛ́pa i íyimene moóma mɔ́ɔmɔ muimée, gɔ́ɔ ndɔ́mɔ́ ba go gálagala naá busío bɛ́hɛ́ kanɛ bofoá; ŋgíyimene bese na bese goŋaá a mó íyimene go búmmue go búmmue, goakɛ́ mó lɛ́ kanɛ go bádómbana naá nɛɔsɛgɔ. 27Ufuŋe Agɛlɛ́pa, go olimonyo moóma mɔ́ɔmɔ mbúsí sá Asaŋa sɛ́ mboó oyáa lí? Ŋgíyimene caá go olimonyo.» 28Agɛlɛ́pa go gundie Póolo a amɔ́: «O fúmbe go ŋgíyie kɛlɛ́tɛnɛ hɔ́ɔ na hɔ́ɔ náana o?» 29Póolo go gundie a amɔ́: «Akɛ́ gó bɛ́ɛmba godɔ́ɔdɔ háalá, akɛ́ gó bɛ́ɛmba naá nnyimé páábɔ́, ŋgá Asaŋa a ŋa goŋaá, akɛ́ caá goana maamɔ́ɔ mokáa, kanɛ́ na biimée báaba bá mbódólónyóomú háalá ínoni, no bɛ́ɛmba aŋa yɔmɔ́ɔ, kanɛ magala máama ndɔ́mɔ́ na má.»
30Gɔ́ɔ ufuŋe Agɛlɛ́pa a fadɛgɛnamɔ́ olɔŋɔ na ŋgɔ́mɔnɔ ba ogɔ́nɔ́ Fésétusu, Belenísi na batɔ báaba bá mbaá lɔmɔ́ ndukíi nabɔ́ naá nɛgála. 31Gáábɔ́ go bɔ́gɔ́gɛdɔ go cumbé, go bágálɛdɛna bá amɔ́: «Mɔtɔ mɔ́ɔnyɔ a lɛ́ kanɛ go ŋa gɛbɛ́ gá boóma gɛ́ɛgɛ a háananamɔ́ na nigúe ɛ́na lí na ncíbo ya gɛaŋɔ́.» 32Agɛlɛ́pa go oyana Fésétusu a amɔ́: «Aáŋa mɔtɔ mɔ́ɔnyɔ a lɛ́ kanɛ go úhune goŋaá gɛsɛnɛ gɛ́hɛ́ gɛ́ ɛ́da naá busío naá ufuŋe Sɛsáalɛ, gásɛ́ dɛ á ŋaáa goŋaá dɛ mo dɛ́ɛ́ná.»
Currently Selected:
Meŋiigíe 26: YAS
Highlight
Copy
Compare
Share
Want to have your highlights saved across all your devices? Sign up or sign in
Meŋiigíe 26
26
Dogálɔ dá Póolo go go bɔ́bɔgɔbɔgɔ
1Agɛlɛ́pa go oyana Póolo a amɔ́: «Ŋgaá go fáá bogaaga bá go gálagala goŋaá ó ba bósódío.» Póolo go fediginye ombɔ́gɔ go dúme dogálɔ a amɔ́: 2«Ufuŋe Agɛlɛ́pa, ŋgɔ́bɔnɔ bese ínoni gɔ́ɔgɔ kɔ́lɔmɔ́ dogálɔ naá busío báhɔ go go bósódio naá bɛsɛnɛ bɛ́ɛbɛ Beyúdene bá cɔ́mɔnɔmɔ́. 3Dómba dómbáa maamɔ́ɔ moatɛ́ go íyimene caŋa sá Beyúdene iŋkimée na ɛdóɛ ya moóma yɛ́ɛyɛ bú ubenyemú cuŋí go yɛ́. Boóma moánɛ ko úhenemú goŋaá o dámba udúu, o mbódóliginyo.
4«Beyúdene biimée bí íyimene aŋa gɛɔyɔ gámɛ gɛ́ mbaá bɛ́ɛ́mbá gó bayɛga na bohaŋa bámɛ; bí íyimene aŋa mmbɔɔ́ ɔyɔ́ɔ naá gɛdɔŋɔ gámɛ na naá Yolósalɛmɛ. 5Bá ŋgíyimene fueké. Bá lɛ́ gɔnɔ́ ba go dúfie aáŋa bá lɛ́galɛga, goŋaá mmba lɛ́ ummue mɔ́ɔnyɔ naá giimbó gɛ́ɛgɛ gɛ́ dómbamɔ́ go beŋebeŋe bɛlɔsɛnɔ bá gioliminyo gɛ́cɔ́, giimbó gá Befelisiéŋe. 6Kanɛ́ godɔ́ɔdɔ, bá mbide goakɛ́ mbɛanana toodo odɛ́máa naá tánɔ yɛ́ɛyɛ Asaŋa a mbaá dánɛ́ná biisée bá biisée kɔ́nɔ́ɔ bɛ́cɔ́. 7Egúli eŋkimée yɔ́ɔ́dɔ́ na áhandɛ́ yá boɛ́nɔ bɛ́cɔ́ yá doodo odɛ́má go go ɛ́na tánɔ ya ndiemi ɛ bóhóogio; nɔ́ɔ gɔ́ɔ bá búlugenyemú Asaŋa kanɛ tɔmbɛ́nɔ́ɔ aŋa siisíi aŋa budúgú. Ufuŋe, bó lɔ́mɔ́ go toodo odɛ́máa moánɛ gɔ́ɔ Beyúdene bá cɔ́mɛnɔnɔmɔ́. 8Bɛɛnyɔ́ɔ Beyúdene, no lɔ́mɔ́ no do olímínyóo no amɔ́ Asaŋa a fúfune begúe goakɛ́ o?
9«Yɔmɔ́ɔ moatɛ́ mmba lɛ́ mbéeniŋenye goŋaá káanana go nuugenye ufíno yá Yésusu ba Násalɛdɛ go pɛ́ iŋkimée. 10Boóma moánɛ mmbaá ŋanánáa naá Yolósalɛmɛ. Bagɔ́nɔ́ɔ bá bedúmbí bɛbáágá naá Asaŋa bá mba páá gɛkɔ́nɔ́nɔ́ɔ gá bogaaga. Nɔ́ɔ gɔ́ɔ mmba ágánáa gɛca gá boolímínyí naá ncíbo ya gɛaŋɔ́, gɔnɔ́ gɔ́ɔgɔ bá mbaá lɔmɔ́ goŋaá bá gaá bó ónáa, Yɔmɔ́ɔ mmba lɛ́ ukelú. 11Ɛŋɛndɔ gɛca, mmba lɛ́ mbó génegenye naá nnyaŋá sá mbósógólí, mbó gaŋɛna goŋaá bá básáŋona gioliminyo gábɔ́. Mpímí yamɛ nabɔ́ ɛ mba lɛ́ mbɔ́dɔ yɛ́ɛyɛ mmbaá lɔmɔ́ ŋgɛ́da bó séesenye naá tɛ́sɔnɔ sá mɛɛ́nɔ móncodío.
12«Go busío moánɛ gɔ́ɔ mmbɛɛ́ ɛ́dá naá Damáasɛ na bogaaga go bosɔ́mɔ bɔ́ɔbɔ bagɔ́nɔ́ɔ bá bedúmbí bɛbáágá naá Asaŋa bá mbaá lɔmɔ́ ncoóolú. 13Ufuŋe Agɛlɛ́pa, ká lɛ́ go pɛ́, go tólóbóo, gámɛ go ɛ́na gise gɛ́ ɛ́da go úlene naá mmoɛná, begibegi, gɛ́ dómba gɛ́ɛgɛ gá gɛonyá, gɛ́ có bonya namɛ na batɔ báaba mmbaá lɔmɔ́ olɔŋɔ nabɔ́. 14Gɛ́cɔ́ go oba biimée go cí, gámɛ go ɔ́bɔ ukelú yó kálagala na nohébelée yó amɔ́: “Sóole, Sóole, o céesenyemú goakɛ́ o? O báŋanana gɛgáda na giélie aŋa gúlúge yɛ́ɛyɛ ɛ lɔ́mɔ́ ɛ dɛ lɛ́gálɛ́gáa go ɔ́bɛnɔ ogɔ́nɔ́ɔ ba yɛ́.” 15Gámɛ go úhune caá: “Daadáa, o lɔ́mɔ́ ánɛ́ɛ o?” Daadáa go gundie a amɔ́: “Ndɔ́mɔ́ Yésusu mɔ́ɔnyɔ o séesenyemú. 16Kanɛ́ fadɛ́gɛ́na, ŋgaá go ɛ́nɛ́gɛ́ná goŋaá ko íyie uyogóní bamɛ; o gaá bɛ́ɛ́mbá ŋgominyo yamɛ go go oyanɛna batɔ bóncodío aŋa o ŋgɛ́namɔ́ ínoni yɛ́ɛyɛ, o gɔnɔ bó oyanɛna bɔ́ɔbɔ nná gɔnɔmɔ́ go bédúfenye. 17Nná go dúgune go magálá má boɛ́nɔ bá Beyúdene na má mɛɛ́nɔ máama nná go dómamɔ́ hɔ́ɔ. 18Ko dómamɔ́ go go bó fuune oŋgíso, go go bó húmie naá mbíno o bó ága naá gise, go go gɔnɔ bó úlie naá bogaaga bá sátana o bó gundie naá Asaŋa, goŋaá báaba bá ágamɔ́ odɛ́má yábɔ́ naá yɔmɔ́ɔ bá bɛa ihéehinye há bɛlɔgɔ bábɔ́, bá gɔnɔ bɛa undukí naá olɔŋɔ yá báaba bɔ́ ɔ́bɔnɛnɔmɔ́ na Asaŋa.”
19«Ufuŋe Agɛlɛ́pa, gɔ́ɔ ndɔ́mɔ́ kanɛ go ŋa odóɛ go lala go giínigie gɛ́ɛgɛ gɛ́ lɔ́mɔ́ ɛ́dá ŋgúlénéelú naá mmoɛná. 20Kanɛ́ mmba dóáná go oyanɛna batɔ bá Damáasɛ na bá Yolósalɛmɛ tɔ́nɔ nogálɔ ná Asaŋa; mbɛ́ɛ́ ɛ́dá naá busío mbóó oyánɛ́náa batɔ báaba naá gigísi gá cí gá Yudée giimée, gɔnɔ́ na batɔ bá bɛdɔŋɔ bíntió, mbó oyanɛna goŋaá bá núgie gɛɔyɔ gábɔ́, bá gunde naá Asaŋa, bɛ́ ɛ́da go ŋanana meŋiigíe máama má dúfenyemú mammana goŋaá bá á núgíe gɛɔyɔ gábɔ́#26.20 O bana, go eninye na Mot 3.8; Lók 3.8.. 21Go busío moánɛ gɔ́ɔ Beyúdene bá lɔ́mɔ́ kumbénéelú yɔmɔ́ɔ naá Nnyaŋá ya Asaŋa, bá amɔ́ bá ŋgóna. 22Kanɛ́ Asaŋa a lɛ́ mbeŋéelú gó nco húme ínoni yɛ́ɛyɛ, gɔ́ɔ ká lɔ́mɔ́ hɔ́ɔ goŋaá ŋgoyanɛna batɔ biimée mammana, baábayɔ́ aŋa bagɔ́nɔ́; cɛ oyáa boóma búncodío bó do dómbá boóma bɔ́ɔbɔ mbúsí sá Asaŋa na Mɔ́sɛsɛ bá mboó oyáa goŋaá bó gaá bolá: 23goŋaá Mesíi a ŋgɔ ɔ́bɛ́gɔ́nɔ́ɔ a bɛ́ɛmba ba busío ba go fúfuge naá kadɛ́gadɛ́ɛ ya begúe, a gunde a dóogonyo gise go boɛ́nɔ bɛ́cɔ́ na bɛdɔŋɔ bɛ́ɛbɛ bíncodío#26.23 O bana, go eninye na 1 Kɔl 15.20; Iseyíi 42.6; 49.6..»
24Aŋa Póolo a mbaá lɔmɔ́ a gá gálagala nɔ́ɔnɔ go go bɔ́bɔgɔbɔgɔ, ŋgɔ́mɔnɔ Fésétusu go áncɛda a amɔ́: «Póolo, go á gɔ́lɔ́ buegu. Goíyime gáhɔ gá degédegé gó á go íŋéné buegu.» 25Póolo go mo gundie a amɔ́: «Akɛ́ɛ, ŋgɔ́mɔnɔ Fésétusu, cɛ báá na buegu, dogálɔ dɔ́ɔdɔ kálagalamɔ́ dó lɛ́ mammana, dó gɔnɔ bɔ́ɔ́bɔnɔ. 26Ufuŋe Agɛlɛ́pa i íyimene moóma mɔ́ɔmɔ muimée, gɔ́ɔ ndɔ́mɔ́ ba go gálagala naá busío bɛ́hɛ́ kanɛ bofoá; ŋgíyimene bese na bese goŋaá a mó íyimene go búmmue go búmmue, goakɛ́ mó lɛ́ kanɛ go bádómbana naá nɛɔsɛgɔ. 27Ufuŋe Agɛlɛ́pa, go olimonyo moóma mɔ́ɔmɔ mbúsí sá Asaŋa sɛ́ mboó oyáa lí? Ŋgíyimene caá go olimonyo.» 28Agɛlɛ́pa go gundie Póolo a amɔ́: «O fúmbe go ŋgíyie kɛlɛ́tɛnɛ hɔ́ɔ na hɔ́ɔ náana o?» 29Póolo go gundie a amɔ́: «Akɛ́ gó bɛ́ɛmba godɔ́ɔdɔ háalá, akɛ́ gó bɛ́ɛmba naá nnyimé páábɔ́, ŋgá Asaŋa a ŋa goŋaá, akɛ́ caá goana maamɔ́ɔ mokáa, kanɛ́ na biimée báaba bá mbódólónyóomú háalá ínoni, no bɛ́ɛmba aŋa yɔmɔ́ɔ, kanɛ magala máama ndɔ́mɔ́ na má.»
30Gɔ́ɔ ufuŋe Agɛlɛ́pa a fadɛgɛnamɔ́ olɔŋɔ na ŋgɔ́mɔnɔ ba ogɔ́nɔ́ Fésétusu, Belenísi na batɔ báaba bá mbaá lɔmɔ́ ndukíi nabɔ́ naá nɛgála. 31Gáábɔ́ go bɔ́gɔ́gɛdɔ go cumbé, go bágálɛdɛna bá amɔ́: «Mɔtɔ mɔ́ɔnyɔ a lɛ́ kanɛ go ŋa gɛbɛ́ gá boóma gɛ́ɛgɛ a háananamɔ́ na nigúe ɛ́na lí na ncíbo ya gɛaŋɔ́.» 32Agɛlɛ́pa go oyana Fésétusu a amɔ́: «Aáŋa mɔtɔ mɔ́ɔnyɔ a lɛ́ kanɛ go úhune goŋaá gɛsɛnɛ gɛ́hɛ́ gɛ́ ɛ́da naá busío naá ufuŋe Sɛsáalɛ, gásɛ́ dɛ á ŋaáa goŋaá dɛ mo dɛ́ɛ́ná.»
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in