CANTARES 1
1
Jerusalén huarmicunata cantanami
1Cai cantana shimicunaca jatun mandaj Salomón cantashca shimicunami.
Huarmi cantashcami:
2¡Aij paipaj shimihuan ñucata muchajpichari!
Cambaj c'uyaica vinotapish yallimari.
3Mishquijllata ashnacujcunahuan churashca jahuapish, cambaj shutica
mishquijllata ashnacuj jicharishca
shinamari.
Chaimantami solteracunaca canta c'uyan.
4Ñucata pushahuayari, canhuan rishun
ninchijca.
Jatun mandajmi paipaj huasicunaman
yaicuchirca, canhuanmari cushicushun.
Cambaj c'uyaitaca vinotapish yalli
cashcatami yuyarishun.
Cantaca c'uyana cashcamantatajmi c'uyancuna.
5Jerusalenpi causaj huarmicunalla,
ñucaca yana cashpapish,
Cedar llajtapi tiyaj carpa huasicunata shina,
Salomonpaj linsocunata shina munananqui
huarmimari cani.
6Ñucataca intimi rupachirca.
Shina cajpipish, yanami nishpa ama
rimahuaichijchu.
Ñuca mamapaj churicunallataj
p'iñarishpami, ñucataca uva chagrata
cuidachun churarcacuna.
Chaimantami ñuca quiquin uva chagrataca
mana cuidarcani.
7Canca ñuca tucui almahuan
c'uyashcamari cangui.
¿Maipitaj canlla ovejacunataca michicunguiyari?
¿Chaupi punlla tucujpica maipitaj samachingui?
¿Ima nishpataj canhuan apanacujcunapaj
canlla ovejacunahuanca, chingarishca
shinaca tandanacugrina caniyari?
Tucuicuna cantashcami:
8Tucui huarmicunamanta yalli sumaj huarmilla.
Can mana yachashpaca, canlla ovejacuna
sarushcata catilla.
Michijcunapaj chugllacuna c'uchupi cambaj
malta huarmi chivocunata michigrilla.
Cusapish huarmita, huarmipish cusata cantashcami
C'ari cantashcami:
9Ñuca c'uyashcalla, cantaca faraonpaj
carretata aisashpa purij sumaj
yeguahuanmi ch'imbapurani.
10Cambaj quijaduscunaca can aparishca
zarcillo chaupipica sumajmari ricurin.
Cungapipish sumaj huallcacunata
aparishcamari cangui.
11Cambajca, curi zarcillocunatapish
cullquihuan chagrushpami rurachishun.
Huarmi cantashcami:
12Sumaj tiyanapi jatun mandaj
samaricujpica, ñuca nardoca
mishquijllatami ashnacurca.
13Ñuca c'uyashca, ñuca chuchu chaupipi
huarcushca lutsaj mirra shinamari.
14Ñuca c'uyashcaca, En-gadi pueblo c'uchupi
tiyaj uva chaupicunapi huiñashca
alheña sisa shinamari.
C'ari cantashcami:
15Ñuca c'uyashcalla, quiquinca sumajmari cangui.
Cambaj ñahui luluncunapish sumaj
palomacuna shinamari.
Huarmi cantashcami:
16Ñuca c'uyashcalla, canca sumajmari cangui.
Canca mishquimari cangui.
C'ari cantashcami:
Ñucanchij camaca sisacunahuan mantashcami.
17Ñucanchij huasica cedro caspicunahuan,
ciprés caspicunahuan rurashcami.
Currently Selected:
CANTARES 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.