FILEMON 1
1
Allillachu canguichij nishcami
1Jesucristomanta prezu caj Pablo, huauqui Timoteondijmi, ñucanchijta ayudaj c'uyashca Filemonman quillcanchij. 2Cambaj huasipi tandanacushca crijcunaman, c'uyashca pani Apiaman, alli huillaita huillashpa ñucanchij shinallataj macanacuj Arquipomanpishmi quillcanchij: 3Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cachun ninchijmi.
Filemón ima shina c'uyaj cashcapish crij cashcapish
4Diosta mañacushpa canta yuyarishpaca ñuca Diostaca pagui nicunillami. 5Cantaca Mandaj Jesusta alli crij cashcata, jucha illaj tucuicunatapish alli c'uyaj cashcatami uyani. 6Chaita uyashpaca can alli crij cashcata ricushpa, crijcunaca Cristo Jesusmantaca Dios cushca allicunata charishcata alli yachachun nishpami Diosta mañacuni. 7Huauqui, canca c'uyaj cashcamantami jucha illajcunapaj shungutaca achcata cushichishcangui. Chaita yachashpami ñucanchijpish achcata cushicushpa imatapish ashtahuan rurashun ninchij.
Pabloca Onesimota chasquichun mingashcami
8Can chashna alli cajpimi ñucaca Cristohuan cashcamantaca, can imata rurana cashcata mandai tucushpapish, 9mana mandashpa c'uyaimanta roganilla. Ñucaca, ña yuyaj Pablomi cani. Cunancarin Jesucristomanta prezupishmi cani. 10Ñuca huahua Onesimomantami rogani. Paica prezupi ñuca cajpimi, Jesucristota crishpa ñuca huahua tucurca. 11Paica ñaupa punllacunaca cambajca ima allita mana rurajmi carca. Ashtahuanpish cunanca cambajpish, ñucapajpish allita rurajmari tucushca. 12Cambajmanmi cutin tigrachishpa cachani. Canca ñucata chasquij shinallataj chasquipai.
13Alli huillaimanta prezu cajpi, cambaj randi ñucapajta rurachun, ñucahuan saquirinman yuyanimi. 14Ashtahuanpish can manaraj imata nijpica, imata mana rurasha ninichu. Can allita rurasha nishpaca, ama ñuca nishcallamanta, ashtahuanpish cambaj quiquin munaimanta rurangui.
15Onesimoca huañungacama can chasquichunchari, canmantaca ashacama ch'icanyarca. 16Cunanca ña mana cambajta ruraj shinallachu. Ashtahuanpish cambajta rurajtapish yalli c'uyashca huauquimari. Ashtahuantajca ñucapajmi chashna cambajcarin cambajta ruraj cashcamantapish, Mandaj Jesusta crij cashcamantapish ashtahuan allimari.
17Chaimanta can shinallataj ñucapish cashcata yuyashpaca, ñucata chasquij shinallataj paitaca chasquipai. 18Pai ima mana allita rurashca cajpi, mana cashpaca debeshca cajpica, ñucami pagasha. 19Pablomi, ñuca quiquin maquihuan quillcani: Ñucami pagasha canpish ñucamanca debenguimi. Shina cajpipish chaitaca mana yuyachisha nircanichu. 20Ari huauquicu, Mandaj Jesusta crij cashcamanta ñuca nishca allita rurapai. Chashna rurashpaca Mandaj Jesuspaj cashcamanta ñuca shunguta cushichipai.
21Canca cazunataj cajpimi quillcani. Ñuca nishcataca, ashtahuan yallita rurana cashcatapish yachanimi. 22Ñuca samarinatapish allichipai. Cancuna Diosta mañacushcamantaca, cancunapajman cachana cashcatami shuyacuni.
Tucuchingapaj allilla canguichij nishpa Dios allicunata cuchun nishcami
23Cristo Jesusmanta, ñucahuan prezu caj Epafras, 24ñucata ayudajcuna Marcos, Aristarco, Demas, Lucaspishmi alli cashca cachun nincuna.
25Ñucanchijta Mandaj Jesucristopaj, mana c'uyaipajta c'uyaj canaca, cancunapaj espirituhuan cashca cachun. Chashna cachun.
Currently Selected:
FILEMON 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.