NEHEMÍAS 1
1
Jerusalenmanta Nehemías Taita Diosta mañashcami
1Hacaliaspaj churi Nehemías parlashca shimicunami. Persia llajtata jatun mandaj Artajerjes ña ishqui chunga huatata mandacui Quisleu quillapimi, mandajcuna tiyana Susa pueblopi carcani. 2Chaipimi ñuca huauqui Hananica, Judamanta shujtaj runacunandij ñucapajman shamujpi, Babiloniaman judiocunata prezu apacujpi miticushpa saquirijcuna ima shina causacushcatapish, Jerusalén pueblo ima shina cashcatapish tapurcani. 3Chaimi paicunaca: “Prezu apacujpi miticushpa chai llajtapi saquirijcunaca yallitaj llaqui pingaimi causacuncuna. Jerusalén muyundij pircacunatapish urmachishca, chai pungucunatapish ninahuan rupachishpa chingachishcami siricun” nishpami huillarcacuna.
4Chashna nishcata uyashpaca, achcata llaquirishpa huacashpami, tauca punllacunata yallitaj llaquilla carcani. Jahua pacha Diospaj ñaupajpi ayunashpa mañashpaca, 5cashnami mañarcani: “Mandaj Dios, jahua pachacunapaj Dioslla quiquintami rogani. Quiquinca tucuita rurai tucuj jatunmi cangui. Manchanami cangui. Quiquinta c'uyajcunata quiquin mandashcacunata cazujcunataca llaquinguimi. Quiquin cusha nishcacunatapish pajtachinguimi. 6Cambajta ruraj israelcunamantaca punllapish tutapish cambaj ñaupajpi ñuca mañacushcata uyahuai, ricuhuayari. Ñucanchij israelcunaca ñuca familiamanta callarishpa tucuicunamari yallitaj millaita rurashpa canta p'iñachishcanchij. Chaita huillashpami, cambajta ruraj ñucaca canta mañapani. 7Yallitaj millaicuna tucushpami quiquinta p'iñachishcanchij. Quiquinpajta ruraj Moisesman cushca mandashcacunatapish, chaitataj pajtachingui nishcacunatapish, ima shina causanata mandashcatapish mana pajtachishcanchijchu. 8Quiquinpajta ruraj Moisesman cashna nishcata yuyaripai: Cancuna juchallijpica, ñucaca urata janajta tsirapashpami tucui pueblocunaman cachasha. 9Chashna rurashca cashpapish cancuna ñucapajman cutirishpa, ñuca mandashcacunapi nishca shina chaitataj cutin ruranata callarijpica, tucui cai pachata urata janajta tsirapashca cashpapish tucui chaicunamanta cutinllataj tandachishpa cancunapaj cachun agllashca llajtallapitajmi ñuca shuti chaipi cachun cancunataca chaipi churasha nishcata yuyaripai.
10Paicunataca quiquin tucuita rurai tucuj cashcahuan, quiquinpaj tucuita rurai tucuj maquihuanmi llujshichimurcangui. Paicunaca can agllashca, cambajta rurajcunami. 11Mandaj Dios quiquintami rogani. Cambaj shutita alli nina yuyaihuan cajcunataca cambajta ruraj ñuca mañashcatapish, cambajta ruraj caishujcuna mañashcatapish uyahuai. Cambajta ruraj ñuca jatun mandajpaj ñaupajpi alli ricurichun ayudahuai” nishpami Diosta mañarcani. Chai punllacunaca ñucaca jatun mandajman vinota pasachijmi carcani.
Currently Selected:
NEHEMÍAS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.