JUAN 15
15
Jesusca uva yuratajmi
1Ñucaca uva yuratajmi cani, ñuca Yayaca chagrayujmi. 2Ñucapi caj ramacuna maijanpish mana p'ucujpica anchuchingami. Maijanpish p'ucujpica, ashtahuan p'ucuchun mana allita anchuchirangami. 3Cancunaca ñuca huillashca Shimicunata chasquishcamantaca ñami chuyacuna canguichij. 4Cancunaca ñucahuan shuj shinalla catichij, ñucapish cancunahuanca shuj shinallami casha. Ima shinami ramaca yurapi mana cashpaca, paillatajca mana p'ucui tucun. Ñucahuan mana shuj shinalla catishpaca, cancunapish chashnallatajmi mana p'ucui tucunguichij.
5Ñucaca uva yurami cani. Cancunaca ramacunami canguichij. Maijanpish ñucahuan shuj shinalla cajhuanca, ñucapish paihuanmi casha. Paica achcatami p'ucunga. Ñucamanta ch'icanyashpaca, imata mana rurai tucunguichijchu. 6Mana p'ucuj ramataca p'itishpa canllaman shitajpi, chaquirijpica tandachishpa rupachinmi. Maijanpish ñucapi cashpapish ñucahuan mana shuj shinalla cajtaca, chai ramata shinallatajmi rurashca canga. 7Cancuna ñucahuan shuj shinalla catijpica, ñuca Shimicunapish cancunahuan shuj shinallami canga. Chashna cashpa cancuna imatapish ñuca Yayata mañajpica paica cungallami. 8Cancunaca ñuca yachacujcuna shinataj causashpa achca granota p'ucushpaca, ñuca Yayatami jatunyachinguichij. 9Ñuca Yaya ñucata c'uyashca shinami, ñucapish cancunataca c'uyarcani. Chaimanta ñuca c'uyaipi shuj shinalla catichij. 10Ima shinami ñuca Yaya mandashcacunata cazushpa paipaj c'uyaihuan shujlla cani, shinallataj cancunapish ñuca mandashcacunata cazushpa ñuca c'uyaihuan shujlla catichij.
11Chaicunataca ñuca cushicui cancunapi cachunmi chashnaca nini. Chaimi ñuca cushicuj shinallataj cushicunguichij.
12Caimi ñuca mandashcaca: Ima shinami ñuca cancunata c'uyarcani, chashnallataj cancunapish caishuj chaishuj c'uyanacuichij. 13Maijanpish paihuan alli apanacujcunamanta huañujca yallitaj c'uyajmi. Chashna c'uyajca pi mana tiyanchu. 14Ñuca ima shina mandashca shinatataj rurashpaca, ñucahuan alli apanacujcunami canguichij. 15Cancunataca ña mana ñucapajta rurajcunami canguichij nishachu. Amopajta rurajca, paipaj amo imallata ruracujtaca mana yachanchu. Cancunamanca ñuca Yaya imallata ruracujtaca tucuitami yachachircani. Chaimanta cancunaca ñucahuan alli apanacujcunami canguichij. 16Mana cancunachu ñucataca agllarcanguichij, ñucami cancunata agllarcani. Cancuna rishpa granota p'ucuchun, chai granoca cancunapi p'ucushpa caticuchunllami agllarcani. Chashna cashpa ñucamanta imatapish Yayata mañajpica, paica cungallami. 17Cancunataca caishuj chaishuj c'uyanacuchunmi mandani.
Cai pachapica p'iñangacunami
18Cai pachapaj cajcuna cancunata p'iñajpica, ñucata p'iñacushcata yuyanguichij. 19Cai pachapaj cajpica, cai pachapaj cajcunaca paicunapaj cashcamanta c'uyanmanmi. Cai pachapaj cajcunahuan cajpipish ñuca agllajpimi, mana cai pachapaj canguichij. Chaimantami cancunataca cai pachapaj cajcunaca p'iñancuna. 20“Amopajta rurajca amotaca mana yallichu” nishpa ñuca huillashcataca yuyarichigari. Ima shinami ñucatapish llaquichina yuyailla llaquichirca chashnallatajmi cancunatapish llaquichingacuna. Ñuca huillashcata cazushpaca, cancuna huillashcatapish cazungacunami. 21Ñucata cachajta mana rijsishcamanta, ñuca shutita p'iñashpami tucui caicunataca chashna rurangacuna.
22Ñuca mana shamushca cajpi, paicuna juchayuj cashcata ñuca mana huillashca cajpica, juchayuj cashcataca mana yachanmanchu carca. Cunan paicunaca ñucanchijca mana juchayuj canchijchu mana ni tucuncunachu. 23Maijanpish ñucata p'iñajca, ñuca Yayatapish p'iñanmi. 24Nunca pi mana rurashcata paicunapaj ñaupajpi ñuca mana rurashca cajpica, juchayuj cashcataca mana yachanmanchu carcacuna. Cunanca ashtahuanpish juchayuj cashcata ricuchishcamantami ñucatapish, ñuca Yayatapish p'iñancuna. 25Quillcachishpa paicunaman cushca mandashcapi: “Mana ima cajpipish ñucataca p'iñancunami” nishca pajtachunmi chashnaca rurancuna.
26Ashtahuanpish ñuca yayapajmanta mana llullaj Espirituta cachajpi pai shamushpaca cushichingami. Paica imatapish cashcatataj nij Espiritumi. Paica Yayamanta shamushcamanta, ñuca ima shina cashcatami huillanga. 27Ñuca rurana cashcata callari pachamantami ñucahuan carcanguichij. Chaimantami cancunapish ñucamantaca huillanataj canguichij.
Currently Selected:
JUAN 15: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.