HAGEO 1
1
Diospaj huasita cutin shayachichun mandashcamanta
1Persia llajtataca jatun mandaj Darioca, ñami ishqui huata sujta quillata mandacurca. Sujta quillapaj punta punllapimi, Mandaj Diosca pai ima nishcata huillaj Hageotaca, Judá llajtata mandaj Zorobabelpajmanpish, curacunata mandaj Josuepajmanpish cacharca. Zorobabelca, Salatielpaj churimi carca. Josueca, Josadacpaj churimi carca. Paicunamanca Hageoca cashnami nirca:
2Tucuita Mandaj Diosca cashnami nin: “Cai runacunaca: Mandaj Diospaj huasita cutin shayachina punllaca manaraj chayamunchu nincunami” ninmi. 3Chaimantami Mandaj Diosca, pai ima nishcata huillaj Hageotaca, cashna huillachun cacharca: 4“Diospaj huasi ¿shitashca siricujpirajchu cancunaraj achij nicuj sumaj huasicunapi causacunguichij, imamí?” ninmi. 5Chaimantami tucuita Mandaj Diosca cashna nin: “Cancuna ima shina cashcataraj yuyarichigari. 6Cancunaca achcata tarpushpapish, ashallatami japinguichij. Micushpapish mana huijsa jundata micunguichijchu. Yacuta ubyashpapish, yacunaillahuantajmi saquiringuichij. Chirijpi churanacunata churarishpapish, manataj cunujyanguichijchu. Trabajashcamanta cullquita japishpapish, jutcu muchilapimi huaquichinguichij” ninmi. 7Chaimantami tucuita Mandaj Diosca cashna nin: “Cancuna ima shina causacushcataraj alli yuyarichigari. 8Urcumanta caspicunata apamushpa, ñuca huasita cutin shayachichij. Chashna rurajpimi chai huasipica, ñuca alli cashcata ricuchisha. Chashnami ñucaca jatunyachishca casha” ninmi Mandaj Diosca. 9Tucuita Mandaj Diosca cashnapishmi nin: “Cancunaca imatapish achcata japina yuyailla cashpapish, ashallatami japinguichij. Cancunapaj huasicunapi huaquichishcatapish huaira apaj shinami, ñucaca tucuita apasha. ¿Imamantataj chashna llaqui tucunchij? yuyanguichijchari. Ñuca huasita shitashca siricujta ricushpapish, cancunapaj huasicunataraj sumajta allichicujpimi chashna rurani. 10Chaimantami cancunapajca tamyapish jahua pachamantaca ña mana ashtahuan shamun, allpacunapipish ima grano mana ashtahuan p'ucun. 11Ñucamari cai llajtapica mana tamyachircani. Chaimantami urcucunapish, tarpuna allpacunapish tucui chaquishca siricun. Shinallataj trigotapish, vinotapish, aceitetapish, allpapi imalla p'ucushcatapish tucuimi chaquichircani. Runacunatapish, animalcunatapish, runacunapaj maquihuan trabajashcacunatapish tucuimi chingachircani” nishpami huillachirca.
12Salatielpaj churi Zorobabelpish, Josadacpaj churi curacunata mandaj Josuepish, tucui shujtajcunapishmi paicunata Mandaj Dios chashna nichun cachashcata uyarcacuna. Dios ima nishcata huillaj Hageo chashna huillajta uyashpami, paicunaca Mandaj Diospaj ñaupajpica achcata mancharcacuna. 13Chashna manchajpica, Mandaj Dios cachashca Hageoca Mandaj Diosllataj huillanaman cachajpimi: “Mandaj Diosca: Ñucaca cancunahuanmi cani ninmi” nirca.
14Mandaj Diosca chashna huillachishpami, Judá llajtata mandaj Salatielpaj churi Zorobabelpaj yuyaitapish, curacunata mandaj Josadacpaj churi Josuepaj yuyaitapish, chaipi tucui causajcunapaj yuyaitapish pascarca. Chaimantami tucuita Mandaj, paicunapaj Taita Diospaj huasitaca allichinata callarircacuna. 15Jatun mandaj Darío ña ishqui huatata mandacui sujta quillapaj ishqui chunga chuscu punllapimi, chai huasitaca allichinata callarircacuna.
Currently Selected:
HAGEO 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.