JUAN 7
QCHI04
7
Jesustaca paipaj huauquicunapish mana crishcachu
1Chai q'uipaca Galileapimi Jesusca yachachishpa puricurca. Judiocuna ima shinapish huañuchishun nicushcamantami Judeamanca mana rirca. 2Ñaupa yayacuna carpa huasicunallata shayachishpa causamushcata judiocuna yuyarina fiestami chayamucurca. 3Chaimi Jesuspaj huauquicunaca:
–Caimanta llujshishpa Judeaman ri. Canta catijcunapish can imalla rurashcacunata ricuchun. 4Tucuicuna rijsishca casha nishpaca pi imata mana pacalla ruranchu. Chaimanta can ruracushcacunataca tucuicunapaj ñaupajpi rurashpa ricuchigri– nircacunami.
5Paipaj huauquicunapish Jesustaca Quishpichij cashcataca mana crircacunachu. 6Chaimi Jesusca:
–Ñuca rina punllaca manaraj chayamunchu. Ashtahuanpish cancunapajca ima horaspish rinallamari. 7Cancunataca cai pachapaj cajcunaca mana p'iñanchu. Ashtahuanpish ñucataca, paicuna rurashcacuna mana allichu nishpa huillajpimi p'iñancuna. 8Cancunaca chai fiestamanca richijlla. Ñuca rinaca manaraj chayamujpimi, chai fiestamanca ñucaca manaraj rini– nircami.
9Paicunaman chashna nishpaca, Jesusca Galileapimi saquirirca.
Jesusca judiocunapaj fiestapi cashcami
10Paipaj huauquicuna rishca q'uipami, Jesuspish chai fiestamanca pi mana yachajllapi pacalla rirca. 11Judiocunaca chai fiestapi Jesusta mashcacushpaca:
–¿Maipishi chai runaca?– ninacurcacunami.
12Chaipi caj achcacunaca Jesusmanta paicunapura achcata parlanacushpaca, shujcunaca: “Chai runaca allimari” nircacunami. Cutin maijancunaca: “Gentecunataca umacunllamari” nircacunami. 13Judiocunata manchashcamantami, tucuicunapaj ñaupajpica Jesusmantaca pi mana parlanacui tucurcacuna.
14Chai fiesta ña chaupiyagrijpica, Jesusca Taita Diospaj huasiman rishpa chaipi yachachi callarijpimi,
15judiocunaca:
–¿Ima shinataj caica, jatun yachanacunapi mana yachagrishca cashpapish cai tucuitaca yacharcari?– nishpa mancharircacuna.
16Chashna ninacucujpimi, Jesusca:
–Ñucaca mana ñuca yuyaimantachu yachachini. Ashtahuanpish ñucata cachaj Yaya yachachi nishcallatami yachachini. 17Maijanpish Taita Diospaj munaita rurasha nijmi, cai ñuca yachachicunca Taita Diospaj cashcata, mana cashpaca ñuca yuyaillamanta rimacushcata yachanga. 18Maijanpish paipaj quiquin yuyaillamanta huillajca, shujtajcuna paita alli nichunllami munan. Ashtahuanpish paita cachaj Yayata jatunyachichun huillacujca mana llullachu, mana ñahuita ricushpalla imatapish rurajchu. 19Moisesca ¿manachu cancunamanca Taita Dios Mandashcata curca? Chai mandashcataca cancunaca pi mana cazucunguichijchu. ¿Ima nishpataj ñucataca huañuchishun nicunguichigari?– nircami.
20Chaimi chaipi caj achcacunaca:
–Supai japishcami cangui. ¿Pitaj cantaca huañuchishun nicun?– nircacuna.
21Chaimi Jesusca cashna nirca:
–Pi mana rurai tucushcata rurashcamantami tucuicuna mancharinguichij. 22Moisesman cushca mandashcapica circuncisionta rurachun ninmi. Chaita pajtachingapajca samana punlla cajpipish ruranguichijllami. (Chai mandashcaca mana Moisespaj punllallamantachu callarirca, ashtahuanpish ñaupa yayacunamantami ña callarishca carca). 23Moisés mandashcata mana p'aquingapajca samana punlla cajpipish, circuncisiontaca ruranguichijllami. ¿Samana punllapi shuj runata tucuita alliyachishcamantachu ñucahuanca p'iñaringuichij? 24Mana alli yuyachijllapica ama juchachichijchu. Ashtahuanpish ima shina cashcata alli yachashpataj mana allichu nichigari– nircami.
Jesusca pai jahua pachamanta cashcata huillashcami
25Jesús chashna nijpimi Jerusalenpi causaj maijancunaca cashna nircacuna:
–Caica ¿manachu huañuchishun nishpa mashcacushca runa yuyachin? 26Riquichij, tucuicunaman huillacujpipish, paitaca pi imata mana ninca. ¿Mandajcunaca paitaca Cristo cashcatachu yuyancuna imashi? 27Ñucanchijca pai maimanta cashcataca yachanchijmi. Ashtahuanpish Cristo shamujpica, pai maimanta cashcataca pi mana yachangacunachu ninmi– nircacunami.
28Chashna nishcamantami Jesusca Taita Diospaj huasipi yachachicushpaca sinchita rimashpa cashna nirca:
–Shinashpaca, ñucataca rijsishcanguichijmi. Maimanta cashcatapish yachashcanguichijmi. Ñucaca Taita Dios cachajpi shamujmi cani. Mana ñucallatajchu shamurcani. Paitaca cancunaca mana rijsinguichijchu. Paica mana llullachu. 29Ñucaca paipajmanta shamushcamantami paitaca rijsini. Paimari ñucataca cacharca– nircami.
30Shina nijpi paita japinata yuyacushpapish paita japina horas manaraj chayamushcamanta pi mana japi tucurcacunachu. 31Chaipi cajcunamanta achcacuna Jesusta crishpaca:
–Pai mana Cristo cajpica Cristo shamushpaca ¿cai runa rurashcacunatapish yallitachu ruranga imashi?– nircacunami.
Fariseocunaca Jesusta japinaman soldadocunata cachashcami
32Jesusmanta tucuicuna chashna parlanacucujta fariseocuna uyashpaca, curacunata mandajcunahuan, fariseocunahuan tucushpami Jesusta prezu japimuchun soldadocunata cacharcacuna. 33Chaipimi Jesusca:
–Ashacamallami cancunahuan cani. Chaimantaca ñucata cachajpajman tigrashpa rishallami. 34Cancunaca ñucataca mashcanguichijmi. Mashcashpapish mana japinguichijchu. Ñuca maipi canmanca, cancunaca mana shamui tucunguichijchu– nircami.
35Chaimi judiocunaca paicunapura cashna ninacurca:
–Ñucanchij mana japi tucuchunca ¿Caica maimanshi rigrin? ¿Griegocunapaj llajtapi causacuj israelcunapajman rishpa griegocunata yachachinamanchu ringa, imashi? 36Paica: “Ñucataca mashcanguichijmi, mashcashpapish mana japinguichijchu. Ñuca maipi canmanca, cancunaca mana shamui tucunguichijchu” nishpaca ¿imatashi nisha nin?– nircacunami.
Causaiyuj pajchacuj jatun yacumi
37Fiesta tucuri jatun punllapimi, Jesusca shayarishpa sinchita cashna nirca:
–Maijanpish yacunaihuan cashpaca ñucapajman shamushpa ubyaichij. 38Quillcachishcapi nishca shinaca: “Ñucata crijpaj shungu ucumantaca, causaiyuj achca jatun yacumi pajchacungalla” ninmi– nircami.
39Shina nishpaca, paita crijcuna Taita Diospaj Espirituta chasquina cashcatami huillarca. Jesusta manaraj sumajyachijpimi, jucha illaj Espirituca manaraj shamurca.
Jesusmantaca caita chaitami yuyarcacuna
40Chaipi caj achcacuna Jesús huillashcata uyashpaca maijancunaca: “Caitajca Taita Dios cachasha nishca profetatajmari” nircacunami. 41Shujtajcunaca: “Caitajca Cristomi” nircacunami. Maijancunaca: “¿Galileamantachari Cristoca shamungari?. 42¿Manachu Quillcachishcapica: David causashca Belén pueblomanta paipaj huahua huahuapuramantami Cristoca shamunga nin?” nircacunami. 43Chashna ninacushpami Jesusmantaca, caita chaita yuyarcacuna. 44Maijancunaca Jesustaca prezu japishun yuyashpapish, mana japi tucurcacunachu.
Jesustaca pai shinatajca pi mana rimashcachu nishcami
45Jesusta japinaman cachashcacuna tigramujpica, curacunata mandajcunapish, fariseocunapish:
–¿Ima nishpataj mana japimunguichij?– nishpa tapujpimi,
46paicunaca:
–¡Chai runa shinatajca pi mana rimashcachu!– nircacuna.
47Chaimi fariseocunaca:
–¿Cancunatapishchu crichirca? 48¿Mandajcuna, fariseocunaca maijanllapish paitaca crishcachari? 49Ashtahuanpish paita crijcunaca Mandashcata mana yachaj, llaquichishca canapaj cajcunallami– nijpimi,
50Jesuspajman tuta shamuj, fariseopuramanta Nicodemoca cashna nirca:
51–Ñucanchij Mandashcapi nishca shinaca maijantapish pai rimashcata manaraj uyashpa, pai imata rurashcata manaraj alli yachashpaca mana juchachinallachu ninmi– nircami.
52Shina nijpimi caishuj fariseocunaca:
–¿Canpish galileopurachu cangui? Quillcachishcata alli ricuiyari. Galileamantaca shuj profetallapish manaraj tiyashcachu– nircacuna.
53Chashna ninacushpaca paicunapaj huasicunaman rircallacunami.

Texto Bíblico © Sociedades Bíblicas Unidas, 1989.

Dios Rimashca Shimicunami © Sociedades Bíblicas Unidas, 1989.

Texto: Biblia en Quichua Chimborazo, 1989

Learn More About Dios Rimashca Shimicunami