JUAN 16
16
1Cancunaca ñucata ña mana catishachu ama nichunmi caicunataca huillacuni. 2Cancunataca sinagogacunaman ama cutin yaicuchun llujshichishpa cachangacunami. Cancunata maijanpish huañuchishpaca, Taita Diospajtami ruracuni nishpa yuyana punllacunapish chayamucunmi. 3Ñuca Yayatapish, ñucatapish mana rijsishcamantami chashna rurangacuna. 4Ña chashna ruracujpica, caicunata ñuca huillashcata yuyarichunmi cunanman huillacuni. Caicunataca sarunmanca cancunahuan cashpami manaraj huillarcani.
5Cunanca ñucata cachajpajmanmi rigrini. Shina cajpipish cancunamanta shujllapish: “¿Maimantaj ricungui?” nishpa mana tapunguichijchu. 6Ashtahuanpish caicunata ñuca nijpica llaquirinallatami yallitaj llaquiringuichij.
Jucha illaj Espíritu imallata ruranami
7Chashna cajpipish, caitaca cancunapaj allipaj huillanatajmi cani: Cancunapaj allipajca ñucaca rinatajmi cani. Ñuca mana rijpica, cushichijca cancunapajmanca mana shamungachu. Ñuca rishpamari paitaca cachasha. 8Chai Espíritu shamushpaca cai pachapaj cajcunataca juchayuj cashcatami yuyachinga. Taita Diosca cashcata ruraj cashcata, paica imalla rurashcata ricuchishpa llaquichina cashcatapishmi yuyachinga. 9Juchayuj cashcata yuyachinaca, ñucata mana crishcamanta, jucha cashcata yuyachinami. 10Cashcata ruraj nishcaca, ñuca Yayapajman rijpi cancuna ñucata ña mana ricunami. 11Ima shina cashcata ricuchinaca, cai pachata mandajtaca jatun llaquiman rinapaj ña churashcami nisha ninmi.
12Cancunata yachachinataca achcata charinirajmi. Ashtahuanpish cunanca mana tucuita entendi tucunguichijchu. 13Imatapish chaitataj huillaj Taita Diospaj Espíritu shamushpami, cancunataca ima shina cashcatataj yachachinga. Paipaj quiquin yuyaimantaca mana rimangachu. Ashtahuanpish tucui imalla uyashcatami rimanga. Shamuj punllacunapi imalla tucuna cashcatapishmi yachachinga. 14Jucha illaj Espíritu shamushpaca ñuca yachachicushcamanta japishpami tucui ima shinalla cashcata yachachishpa ñucataca jatunyachinga. 15Ñuca Yaya tucui charishcacunaca ñucapajmi. Chaimantami jucha illaj Espirituca ñuca yachachicushcamanta japishpa cancunataca tucuita yachachinga nircani.
Llaquilla cashcaca cushicuiman tigrangami
16Ashacama ñucataca mana ricunguichijchu. Chai q'uipaca cutin ashacama ricunguichijmi. Ñucaca Yayapajmanmi rigrini– nijpimi,
17paipaj yachacujcunamanta maijancunaca caishuj chaishuj cashna ninacurca:
–“Ashacama ñucataca ña mana ricunguichijchu. Chai q'uipaca cutin ñucataca ricunguichijmi. Ñucaca ñuca Yayapajmanmi rigrini” nishpaca ¿imatataj nisha ninchu imamí?
18Chai ashacama nishcatamari mana entendinchij ¿imatataj nisha ninchu imamí?– nircacuna.
19Jesusca paicuna tapushun yuyacushcata yachashpami cashna nirca:
–“Ashacama ñucataca mana ricunguichijchu, chai q'uipami cutin ñucataca ashacama ricunguichij” ¿nishcatachu cancunapura tapunacucunguichij imamí? 20Cashnatajmi tucunga: Cancunaca huacanguichijmi, achcatami llaquiringuichij. Ashtahuanpish cai pachapaj cajcunaca cushicungacunami. Chashna llaquilla cajpipish, cancunapaj llaquica cushicuimanmi tigranga. 21Shuj huarmica huachana pajtajpi huachacushpaca achcatami nanachin. Huahuata huachashca q'uipaca chai nanaita ña mana yuyarinchu, cai pachapi huahuayuj tucushcamanta achcatami cushicun. 22Chashnallatajmi cancunapish, cunanca llaquilla canguichij. Cutin ñuca ricuj shamujpimi, cancunaca cushicunguichij. Chai cushicuitaca, cancunamantaca pi manataj quichungachu. 23Chai punllaca ñucataca imata mana tapunguichijchu. Chaipica ricungui cashnatajmi canga. Tucui imatapish ñucamanta Yayata mañajpica, paica cungallami. 24Caicamaca ñuca Yayataca imata mana ñucallamantaca mañashcanguichijchu. Mañaichij chasquinguichijmi. Chashna cashpami cushicuihuantaj canguichij.
Ñucaca cai pachatami mishani nishcami
25Caicamaca cancunamanca parlocunahuan ch'imbapurashpallami parlarcani. Ña mana parlocunallahuan ch'imbapurashpa huillanami chayamucun. Chaimanta ñuca Yayamantaca cancunamanca allitajmi huillasha. 26Chai punllapica, ñuca Yayata cancunamanta mañashami mana ninichu. Ashtahuanpish cancunamari ñucallamanta ñuca Yayataca mañanguichij. 27Ñucataca Taita Diospajmanta shamushcata crishpa, ñucata c'uyashcamantami cancunataca ñuca Yayallataj c'uyan. 28Ñuca Yayapajmantami cai pachamanca shamurcani. Cai pachata saquishpa, ñuca Yayapajmanmi cutin tigragrini– nijpimi,
29yachacujcunaca:
–Cunantajca parlocunahuan ch'imbapurashpalla mana parlashpa allimari huillangui. 30Quiquinca tucuita yachaj cashcamanta pi tapujta mana shuyanguichu. Chaimantami Taita Diospajmanta shamushcata cunantajca crinchij– nircacunami.
31Chaimi Jesusca:
–¿Cunanchu cringuichij? 32Ñucallata saquishpa, cancuna maita ri tucushcata, caita chaita rinami chayamucun. Chaica ñami chayamun. Chashna rurajpipish mana ñucallachu cani, Yayaca ñucahuanmari. 33Ñucahuan shujlla cashpa sumaj causaita charichunmi, caicunataca rimarcani. Cancunaca cai pachapica llaquita apanguichijmi. Shina cajpipish cai pachata mandajtaca ñami misharcani, ñucapi shunguta churaichijlla– nircami.
Currently Selected:
JUAN 16: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.