2 TIMOTEO 1
1
Allillachu canguichij nishcami
1Taita Dios munashcamanta Jesucristopaj apóstol Pablomi cani. Cristo Jesusmanta huiñai causaita cusha nishcata huillajmi cani. 2Timoteo canca ñuca c'uyashca huahuami cangui. Dios Yayapaj, ñucanchijta Mandaj Jesucristopaj mana c'uyaipajta c'uyaj canapish, llaquij canapish, sumaj causaipish canhuan cashca cachun ninimi.
Cristomanta huillashcami
3Ñaupa yayacuna shinallatajmi ñuca Diostaca chuya yuyaihuan paipajta ruracuni. Tutapish punllapish paita mañacushpa canta yuyarishpaca, Diostaca pagui nicunillami.
4Can huacashcata yuyarishpaca, achcata cushicungapajmi canta ricuna munaihuan cani. 5Canca mana nij tucushcalla crijtaj cashcatami yuyarini. Cambaj abuela Loida, cambaj mama Eunicerajmi alli crij carca. Canpish chashnallataj cana cashcatami yachani.
6Canpi ñuca maquita churajpi, rurai tucunata Dios cushcataca, ninata causachij shinami causachichun cunani. 7Diosca ñucanchijmanca, manchana yuyaita cuj espiritutaca mana cushcachu. Ashtahuanpish poderta cuj, c'uyaita cuj, quiquinllataj jarcarij canata cuj espiritutami cushca. 8Chaimanta, ñucanchijta Mandaj Jesusmanta huillanatapish, ñucapish paimanta huillacushcamanta prezu cashcata huillanataca ama pingaringui. Ashtahuanpish alli huillaita huillacushcamanta llaquichijpipish Dios llaquita apai tucunata cushcahuanca canpish ñuca shinallataj llaquita apailla. 9Diosmi ñucanchijta jucha illaj cachun cayashpa quishpichirca. Mana ñucanchij imata rurashcamantachu chashna rurarca. Ashtahuanpish pai munashca shinami mana c'uyaipajta c'uyashpa Cristo Jesushuan shujllata rurashpa chashna rurarca. Chaitaca huiñai, huiñaimantami Diosca chashna rurasha nishca. 10Chaitaca ñucanchijta Quishpichij Jesucristota cachashpami ricuchirca. Paimi huañuitaca anchuchirca. Alli huillaimantaca mana ismuj causaiyujta rurashpami achijman llujshichirca.
11Cai alli huillaita mana judiocunaman huillachun, apóstol cachun, yachachij cachun churashcami cani. 12Chaimantami llaquita apacuni. Chashna cashpapish, pita crishcataca yachanimi. Chaimanta ñucaca mana pingarinichu. Paica huaquichingapaj poderyuj cashcamantaca ñuca mingashcataca shamuj punllacama huaquichinataj cashcatami yachani.
13Crinatapish, c'uyaitapish Cristo Jesusmanta cashca alli yachachinacunata ñuca yachachishcataca, ama saquishpa catirangui. 14Alli yachachinata Dios mingashcataca, ñucanchijpi causacuj jucha illaj Espirituhuan alli cuidangui.
15Asiamanta tucui cajcuna, ñucata shitashpa rishcataca ñami yachangui. Paicunapurapica Figelo, Hermogenespishmi carca. 16Cadenacunahuan huatashca cajpipish Onesiforoca mana pingashpami, achca cutin ñucataca cushichirca. Chaimanta Mandaj Jesusca paipaj huasipi cajcunataca llaquishca cachun. 17Shinallataj Romaman chayashpaca mana samarishpami, japingacama mashcarca. 18Efesopipish, ñucanchijtaca achcatami ayudarca. Chaitaca allimi yachangui. Chaimanta Mandaj Jesusca, paitaca shamuj punllapi llaquishca cachun.
Currently Selected:
2 TIMOTEO 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.