1 CORINTIOS 1
1
Allillachu canguichij nishcami
1Jesucristopaj apóstol cachun Taita Dios munashpa cayashca Pablomi cani. Huauqui Sostenesdijmi, 2Corintopi caj Diospaj tandanacushca crijcunaman quillcanchij. Cristo Jesuspi shujlla tucujpi jucha illajta rurashca, jucha illaj cachun cayashcacunami canguichij. Ñucanchijta Mandaj Jesucristopaj shutipi, maipipish tucui mañajcunandijmi chashna canguichij. Paicunapajpish, ñucanchijpajpish Mandaj Jesusmi. 3Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchijmi.
Mana c'uyaipajta c'uyashcamanta pagui nishcami
4Mana c'uyaipajta c'uyaj canata Cristo Jesuspi cancunaman Dios cushcamantami, ñuca Diostaca pagui nicunilla. 5Cristomantami tucui huillanapi, tucui yachanapi, tucuipi charijyashcanguichij. 6Cristomanta ima shina cashcatataj huillashcamantami, cancunapurapica chashnaca tucushcanguichij. 7Chashnallatajmi ñucanchijta Mandaj Jesucristo shamunata shuyacujcunaca, Taita Dios cushca rurai tucuna illajca mana canguichij. 8Ñucanchijta Mandaj Jesucristo shamui punllapi, pi mana juchachipaj cachunmi, tucuri punllacama paillataj sinchita charinga. 9Pai rurasha nishcataca pajtachij Taita Diosmi. Paipaj Churi, ñucanchijta Mandaj Jesucristohuan shujlla cachun cayashcacunami canguichij.
¿Cristoca chaupirishcachu?
10Huauquicuna, cancunataca ñucanchijta Mandaj Jesucristopaj shutipimi rogani. Cancunapurapi chaupirinacui ama tiyachun, tucuicuna chai shinallataj rimaichij. Yuyanapi, ruranapipish tucuicuna tandalla chai shinataj caichij. 11Ñuca huauquicuna, cancunapurapi p'iñanacushpa rimanacui tiyashcataca, Cloepajpuramanta huillajpimi yacharcani. 12Cancunaca: “Ñucaca Pablopajmi cani”, “Ñucaca Apolospajmi cani”, “Ñucaca Cefaspajmi cani”, “Ñucaca Cristopajmi cani” nishpami tucuicuna ninacucun ninmi. Chaitaca cashnami nisha nini: 13¿Cristoca chaupishcachari? ¿Cancunamantaca Pablotachu chacatarca? ¿Pablopaj shutipichu bautizarircanguichij?
14Cancunataca maijantapish mana bautizashcamantaca, Diostami pagui nini. Crispota, Gayollatami bautizarcani. 15Chaimanta Pablopaj shutipimi bautizarircanchij nishpa, pi mana ni tucunguichijchu. 16Estefanaspaj familiatapishmi bautizarcani. Maijan shujtajta bautizashcataca mana yuyarinichu. 17Cristoca ñucataca bautizachunca mana cacharcachu, ashtahuanpish alli huillaita huillachunmi cacharca. Chaimantami Cristopaj cruz ama yanga cachun, mana jatun yachaj shina rimashcahuan huillani.
Cristoca Diospaj poderta, paipaj yachaitapish ricuchijmi
18Chingarijcunapajca, cruzmanta huillashcaca musparishca shinallami. Ashtahuanpish ñucanchij quishpirijcunapajca, Diospaj podermi. 19Cashnami quillcashca tiyacun:
“Yachaisapacunapaj yachaitaca chingachishami.
Yuyaisapacunapaj
yuyaitaca muspachishami” ninmi.
20¿Maipitaj yachaisapaca? ¿Maipitaj quillcajca? ¿Maipitaj cai pachallamanta imatapish rimanacujca? ¿Manachu Diosca, cai pachapaj yachaitaca muspachishca? 21Dios rurashcacunaca, pai yachaj cashcatami ricuchin. Cai pachapi causajcunaca paicunapaj yachashcallahuan Dios tiyashcata crishun nishpami Dios tiyashcataca mana crircacuna. Chaimantami Diosca musparishpa huillacushca shina huillashcata crijpi, quishpichinata munarca.
22Judiocunaca ricuchinacunata ricuchichunmi mañancuna, griegocunaca yachaitami mashcancuna. 23Ashtahuanpish ñucanchijca, Cristota chacatashcatami huillacunchij. Chaica judiocunapajca ñitcanapajmi, mana judiocunapajca musparishca huillashca shinallami.
24Shina cajpipish Dios cayashcacunapajca, judiocunapaj cashpa, griegocunapaj cashpapish, Cristoca Diospaj podermi, paipaj yachaipishmi. 25Diosca yuyai illaj shina cashpapish, gentecunataca yalli yachajmari. Diosca irqui shina cashpapish, gentecunata yalli poderyujmari.
26Huauquicuna, ima shina cajpi cancunata Dios cayashcata yuyarichigari. Aichapajllata yachajcunahuan ricujpica, achca yachajcuna, achca poderyujcuna, alli nishcacunapish cancunapurapica mana achcacuna tiyanchu. 27Yachaisapacunata pingachingapajmi, cai pachapaj cajcuna imata mana yachajmi nishcacunataraj Diosca agllarca. Sinchicunata pingachingapajmi, cai pachapaj cajcuna irquimi nishcacunataraj Diosca agllarca. 28Diosca cai pachapi imapish mana caj p'iñashcacunatami agllarca. Allimi canchij nijcunata yanganchingapajmi, imapish mana cajcunataraj agllarca. 29Paipaj ñaupajpi pi ama jatun tucuchunmi chashna rurarca. 30Diosmi cancunataca, Cristo Jesushuan shujllata rurarca. Cristotamantami Diosca yachaj cachun, justificashca cachun, jucha illajta rurashca cachun, randishpa quishpichishca cachun churarca. 31Chashna cana cashcamantaca, cashnami quillcashca tiyacun: “Maijanpish allimi cani nirijca, Jatun Diospi allimi cani nirichun” ninmi.
Currently Selected:
1 CORINTIOS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.