Yenesis 33
33
Yekọb Asoobo ye Isọ
1Yekọb amaadịppe anyen ase ndin se Isọ koo, asʌk adi ye ideen ikie inaañ; ndin Yekọb amaabakka nditọ amọ anọ Lia, Ratiel ye nditọufọk ibaan amọ iba. 2Anye amaasio nditọufọk ibaan ye nditọ ammọ asịn ke iso, Lia ye nditọ amọ ekeene, ndin Ratiel ye Yosef esaña ke edem. 3Anye ke idem amọ amaaboiyo iso akaa anyʌñ akenyuuk iwuod ke isọñ akañ itiaba ke anye amaakedisịm ayịneka amọ.
4Ado Isọ amaafeghe akaa akesoobo ye Yekọb, anyʌñ afat anye, adịppe ubọk awañ anye ke itọñ, anyʌñ atʌm anye inua. Ammọ emaenyʌñ etuaha. 5Ke Isọ amaakedịppe anyen akịt mme ibaan ye nditọ, anye amaabịp abo “Mme anie ido ami ye afo?”
Yekọb amaabọọrọ ate, “Ammọ edo nditọ A-Abasi akenọọhọ ayịnufọk mfo ke mfọn.”
6Akema nditọufọk ibaan ye nditọ ammọ emaesaña ekpere enyʌñ enyuuk iwuod. 7Ndin Lia ye nditọ amọ emaenyʌñ edinyuuk iwuod. Ke akpatre Yosef ye Ratiel ñko emaenyʌñ edinyuuk iwuod.
8Isọ amaabịp ate, “Afịd udịmedọñ ye udịmenañ añkịtte mi awuọñọ soo?”
Ndin anye amaabọọrọ ate, “Ado adiyem mfọn uto fiin, abọọñ mmi.”
9Ado Isọ amaabo, “Ayịneka mmi, ami mmenenie uwak. Nịm se afo anie nọ idem mfo.”
10Ado Yekọb amaabo, “Iyoo, mbọk!” “Adieke iso mfo anenne ye ami, bọ enọ ami nto miin. Sia adikịt iso mfo atie nte adikịt iso Abasi, sia unemme fiin adindaara miin mfọn-mfọn. 11Mbọk bọ enọ ekebenne usọk fiin, sia Abasi annọ miin mfọn adinie afịd se ñyem.” Sia Yekọb amaakeyịre, Isọ amaabọ.
12Akema Isọ amaabo, “Yak ñnyịn inyọñọ; ami ñyaasaña ye afo.”
13Ado Yekọb amaabo anye, “Abọọñ mmi adiọọñọ ke nditọ edoñño nsek-nsek, ndin ke ana nte ami nse mme umanedọñ ye mme umanenañ esʌkkọ enọ ammọ eba anyen. Adieke ebịneke ammọ akpọsọñ-akpọsọñ ke usen keed, afịd mme unam ami eyaekpañña. 14Ndin yak abọọñ mmi ambem miin ayịnufọk amọ iso akaa, ke ini ami nsañake usʌk-usʌk ke naña udịmedọñ ye udịmenañ e-ebaaha ye ami esaña, ñko ye naña ntəkayịn esaña, tutu ami ndisịme abọọñ mmi ke Sei.”
15Isọ amaabo, “Ndin yak ami ñkpọñ usʌk ideen mmi nọ esaña ye afo.”
Yekọb amaabịp anye ate, “Ntak a-afo anamma ntoro-o? Kap yak ami ñkịt mfọn ke iso mfo, abọọñ mmi.”
16Kpa ke usen ado Isọ amaatọọñọ isañ anyʌñ atịmme anyọñ Sei. 17Ado Yekọb, ke ukañ amọ, akekaa Sukọd,#33:17 Sukọd awuọñọ adịp itie a-anye akekebọppọ ufọk anọ idem amọ anyʌñ anam itie nnaa anọ mme ufene amọ. Ami ado ntak e-ekoodo itie ado Sukọd.
18Yekọb amaakewuọ akpọñ Padan Aram,#33:18 A-adooho Adoro usobutịn Mesopotemia ke ifuuro anye amaadisịm abio Sekem ke Kenan, anyʌñ anam itiennaa ke nsakiso abio. 19Anye amaadep isọñ a-anye akebọppọ atayad amọ ke ekpad akʌk silfa ikie ato nditọ ideen Hamọọ, ete Sekem. 20Ke itie ado ke anye akebọp itieukpono anyʌñ akoot ndo El Elohe Isrel.#33:20 El Elohe akeme ido El ado Abasi Isrel; akeme inyʌñ ndo andikpon ado Abasi Isrel.
Currently Selected:
Yenesis 33: ICB
Highlight
Share
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
